Mber 19 - MEY HAYNA WAYNA MA YEZU KRISTE MA MEVEY

Pol da Efez

¹ Andza da har ma me ndzey ma Apolos da Koreŋt na, Pol me husey a Efez, a tezlerey ta dala na daha mamba ha, ŋga me ndzefey gawla ma Yezu hay nekəɗey da huɗa.

² Ma tsəhafata: «Andza kuray ma təram ndaw me pey 'ar ahiya na, kuray ka ndzafam Mesəfrey kokwoɗ ana ba ɗaw?» Taya ma mbəɗamar kava: «Akwa na kwa la ka tsənadama a tsam aha ka Mesəfrey Kokwoɗ ana tikay!.»

³ Pol ma tsəhafata: «Ka ndzafam azlakwa na, me dzuhəɓey waray?» Taya ma mbəɗafəmara kava: «Me dzuhəɓey ma Zaŋ.»

⁴ Pol ma mbəɗatar kava: «Zaŋ a dzuhəɓey ndaw na, ma ka mbəɗadama mendzey, a tsəhafata ka səkway hay ka pam 'ar ka ndaw ma da sawa da dəba ŋga na, ka ləva na Yezu»

⁵ Taya ma pafama sləmay, taya ma ndzafam me dzuhəɓey da mezəley ma Bay’ərlam Yezu.

⁶ Pol ma bəzləhafata har, arka Mesəfrey Kokwoɗ ana ma safatərawa: a tsam guma hay gəle gəle, a tsam guma na na, andza, ma ndaw sek hay.

⁷ Ndaw ana hay a kam tabiyaha, ndaw kurow kava tsew.

Me tələkey mey ma Pol da Efez

⁸ Pol ma daway a 'ay me ɗuley mey; da kiya makar na, a tsatar guma ma Slala ma Bay'ərlam, mandzara ka wesey. A kəɗey vaw na, ma ndaw ma pafama sləmay ana hay, ka təɓama guma ŋga.

⁹ Amana sa na hay na, mevel ata təɗo təɗo, a wuɗam ma təɓama guma na tikay, a zlamar a tsafama ka Tsəveɗ ana waya haya kakay da walaŋ ma ndaw hay ma kusa hiya. Arka andza ha tok na, Pol ma gəradatara tsəveɗ ata, ŋga ma həlata gawla ma Yezu hay slam ata gəle, ka pas ka pas a ɓadatara guma da likol ma Tiranos.

¹⁰ Tek ana me key andza ha na, a key mevey tsew, ha ndaw ma Azi hay tabiyaha: Zuif hay, ta Grek hay, ma tsənadama guma ma Bay’ərlam tabiya ta ha.

Tek ma Bəzey ma Seva hay tsəla

¹¹ Bay ma Bəla a key ɗeɗew me gegətsey ndaw ahiya ta har ma Pol kambəlaɓa.

¹² andza ha tok na, ndaw hay a həlam adiko ta petekeɗ na ma ləmar a vaw ma Pol ana hay, a da dama a ləmadəmatara a ndaw dzedzey ana hay, arka na dzedzey ma ndaw ana hay a ndalafata, dakay na, fakalaw hay a bəmawa ba da vaw ta.

¹³ Zuif hay daha, mber ata me key na, me herey fakalaw hay, ma zəlama mezəley ma Bay’ərlam Yezu ka ndaw ta fakalaw da 'ar ana hay, a ləvam andza neney: «Ta mezəley ma Yezu a neney, na Pol ma tələkada mey ana!»

¹⁴ Ma dzadama me key tek ana ŋga na na, bəzey ma Baba ɗuhwa na me key kuley ana daha, taya tsəla, a zəlamar Seva.

¹⁵ Fakalaw ana ma mbəɗatar kava: «Yezu na i sərada, ya i sərada Pol ana na way, ama ekəɗey kuray na, way hay tey tok?»

¹⁶ Arka ndaw ana hana ta fakalaw da 'ar ana ma harɗafata, ma fənatar gədaŋ, ma kəɗata na, ha da mey ta dakay; a da ləhəmawa da 'ay ana na, matsəlay kəna hiya, vaw tabiyaha mbəlek ahiya.

¹⁷ Tobiyaha ndaw ma Efez hay, Zuif hay, ta Grek hay, ma sərafama ka tek a neney me key ana; taya ma wasam ka vaw tabiyaha, arka taya ma səmbərama mezəley ma Bay’ərlam Yezu.

¹⁸ Ndaw me pey 'ar ana hay haɗadzidzay ma səmawa, ma ɓadama meŋgəsey ta ma kəmawa na, ta magala ha.

¹⁹ Ndaw me key hila na hay ma hələmatərawa ɗeriwel ma hila ta hay, ma mbadama, ma vəlamar waw ma dey ma ndaw hay tabiyaha. Andza ma kəɗama lisafi ma sumkwo ma ɗeriwel ana hay na, a key sulay gabal kokurow zlam.

²⁰ andza ha tok na, ta gədaŋ ma Bay’ərlam na, Guma na a gəley, ma zəga ’ar ma sleɗ ta ma slafa.

Tek me deləhwesey da Efez

²¹ A dəba ma tek a neney ma kawa na hay na, Pol me dzeley 'ar da Mesəfrey Kokwoɗ ana na, ma daway a Zeruzalem, me tesey ta Masedowan, ta Akayi. Ŋga me ləvey: «Andza aza i ka husey ba a huɗa na, haya satsa na, i ka daway a Rom.

²² Ŋga ma sləradata andza Timotey ta Erast ndaw na ŋga ma kam mber dzaya na hay a Masedowan, arka ŋga na na, me ndzey nekəɗey adiya, da dala ma Azi.

²³ Da har ana ŋga na na, tek ana me dzuŋgufey kambəlaɓa kavəday ma Tsəveɗ ana.

²⁴ Ndaw me ŋgəzey gura na daha, a zəlamar Demetriyus, a ŋgəzey 'ay ma kuley ma Artemis ta sulay, ndaw me key mber ana hay a ndzafam sumko haɗadzidzay.

²⁵ Ŋga ma kusata ndaw ma mber aŋga hay, ta ndaw me key mber andza ma ta na hay, ma ləvatar: «Dzam a ɗaw hay, ka səradama ha, ka ndzafakwa zleley na, ta mber a lakwa neney,

²⁶ kuray ana ka nəkadama ha, ka tsənadama ha tek ana me key ana da Efez dada kakay, amana ka dala ma Azi tabiyaha, Pol a neney a dzoŋgufadata ndaw ma kusa na hay haɗadzidzay, a pafata wuiya a ləvey na, waya 'ərlam neney lakwa ma ləmakwa ta har a lakwa na hay na, ’ərlam ahiya tikay.

²⁷ Guma neney na a da ŋgəsey na, mber a lakwa dada tsa kakay, amana, satsa na 'ay me kuley ma Artemis, 'ərlam ŋgwas ana, arka na, ndaw a da ɗar aha ndaw sakay, ɗuhwa ŋga na a da yeyihey, ŋga a ŋga na ndaw ma Azi hay ta ndaw hay ka bəla gədem ma namar dəba na.»

²⁸ Ka guma neney na ndaw ma tsənadama na hay na mevel ma tsatar, kwa a mbəkadama me wudey sakay: «Ɗuhwa ha na, sey Artemis ma Efez.»

²⁹ Guma na na me pey mey da wuraw ana tabiyaha, ndaw hay haɗadzidzay ma tsam ɗay ma hway a slam me key wasa, ma gaɗəmata Masedoniyeŋ hay daha tsew da har, Gayius ta Aristark, ndaw ma halam andza Pol ana hay.

³⁰ Pol na, akwa ka dzala tsoy, a sar ma daway a slam me tsəhey ’ar ana, amana gawla ma Yezu hay a gəramar tsəveɗ kakay.

³¹ Dzam aŋga hay nekəɗey daha da walaŋ ma ndaw ɗuhwa na ma Azi ana hay ma tsamar guma a ’ar ma ka da wuyey vaw a slam ma wasa na zlay.

³² kwa way a wudey gəle ta na ma ndaw ka tsakay ŋga na, me tsəhey ’ar ana ma dalhwasa ha lamba ha. Har a var a sa ma ndaw na, ɗagay a tsəham 'ar ana, ka mey na, a səradama kakay.

³³ Ndaw hay daha da walaŋ ma ndaw ma kusa hiya na hay, ma təkəradamara guma na a ndaw ana daha a zəlamar Alekzaŋdre, na Zuif hay ma dahəɗama ka mey ana. Alekzaŋdre ma katar ta har a ndaw hay, hərway a wuɗey ma wandzaladatara ka slam dey ma ndaw ana ma tsəha ’ar ana hay.

³⁴ Andza ndaw hay ma səradama ba ŋga ndaw Zuif na, tabiya ta hiya ma zlamar me wudey kamasləta ta hiya: «Ɗuhwa ha na, Artemis ma Efez», ha a key ndzemdey tsew.

³⁵ Ndaw me windey tek ma wuraw ana ma ndzefey ma kəɗadatara ’ar a ndaw ma kusa hiya na hay, ka ndzam tete, ŋga ma ləvatar: «Efeziyeŋ hay, ndaw ana ma sərada wuraw ma Efez, wuraw kokwoɗ ana, ma Artemis ɗuhwa na, ta mey dey ŋga na ma ləma ha ma kəlawa da 'ərlam ana na, kakay na, way?

³⁶ Hərway me mbəɗey ana kava na, waway kava dakay sana, mətsadəmara 'ar ta mawudey ana na, mbəkadama ma da key tek haya kakay ana hay.

³⁷ Kuray ma hələmatərawa ndaw a neney hay na, taya ka kəmawa kwa tek haya kakay aha, da 'Ay me key Kuley kakay, kwa ka tsaɗama 'ərlam a lakwa ŋgwas ana kakay.

³⁸ Haɗaw azlakwa Demetriyus ta ndaw ma mber aŋga hay, guma ta ka vaw daha, ta ndaw na, slam ma Sariya hay daha, ndaw me key sariya ma dzerey ana hay daha sana, ka dawam a huɗa kwa.

³⁹ Kendzey guma kwar daha mekelehe me tsey na, i slafakwa ma ləmada ta pas makusey andza na ma mewey me ləvey ana.

⁴⁰ Lakwa ka wakwa vaw kakay na, me tsəhey'ar a lakwa me teseɗey ana a da sadandukurawa guma haya kakay aha, hərway guma lawa ma da tsey ɗagay i kusakwama 'ar na, hərway ma mey ana na, dakay seŋgey.» Ka guma ŋga neney na, ma ləvatar a ndaw ma kusa hiya na hay, ka mam a mbaw.