Mber 18 - MEY HAYNA WAYNA MA YEZU KRISTE MA MEVEY

Pol da Koreŋt

¹ Andza ŋga ma mbəkada Aten ba na, Pol ma daway təŋga a Koreŋt.

² Ŋga mazlam 'ar ta ndaw zuif ana daha a zəlamar Akilas, ŋga ndaw Pont. A səmawa da Itali ta ŋgwas aŋga Prisil, hərway Klod me key ɗeriwel na, waya Zuif hay tabiyaha ka lətsam ba da Rom. Pol na ma dzəmam mey ta asləta.

³ Arka andza mber ata ma kam ana asləta na, mber ata na na, me ləmey gwadzavok hay ma petekeɗ, ŋga me ndzey da 'ay ta, me key mber da huɗa.

⁴ Ta pas ma mesley tabiyaha na, a tsey guma da 'ay me ɗuley mey, a səpey na, Zuif hay ta Grek hay ka tsənadama guma ŋga na, me tsey ana na, dərka na.

⁵ Ama andza Silas ta Timotey madəmaɓa ba da Masedowan na, Pol ma vəlada vaw ŋga kərem me ɓey guma ka slam dey ma Zuif hay. A ɓadatara haya hayaha, waya Yezu na, Ndaw ma vaha 'ar ana.

⁶ Andza da ɗay ta ma dzəmey kakay na ta ma tsaɗama na, Pol ma bazləma zana ŋga hay ma ləvatar: «Mambaz a kwar ana ka ma kwar, ka 'ar a kwar ana, yah na mey ɗaw da huɗa dakay, zla ekəɗey na, i daw tek aɗaw, 'ar 'ay ndaw Zuif ahiya kakay ana hay.»

⁷ Andza ma mbəkadərawa slam ana hana na, ŋga ma daway a 'ay ndaw ana daha, a zəlamar Titiyus Zustus ndaw me ney dəba a Bay ma Bəla ha 'ay ŋga na kəreh ka slam ma 'ay me ɗuley mey.

⁸ Krispus, bay ma 'ay me ɗuley mey ana, me pey 'ar ka Bay’ərlam, ta ndaw ma 'ay ŋga hay dzay. Arka Koreŋtiyeŋ hay haɗadzidzay ma tsənadama mey ma Pol na, ma pam 'ar, ma ndzafam medzuhəɓey.

⁹ Dəvaɗ ana daha asləta na, Bay’ərlam ma ləvar a Pol da tek ma nəkar a dey: «Tete, ka da wesey zlay, ka mətsaka har me tsey guma zlay, ka da ndzey tete zlay,

¹⁰ akwa na, yah daha ta kah, ɗaɗa ndaw ma da zəgaka ma da sadaka banay na dakay, hərway da wuraw a neney na, səkway ɗuhwa ha ma vəla ha ŋga ɗaw.»

¹¹ Pol me ndzey da huɗa mevey pal ta rita, a tatəkadatara guma ma Bay ma Bəla.

Zuif hay ma zəgama Pol a slam ma sariya

¹² Da har ma Galliyoŋ bay ma dala ha da Akayi na, Zuif hay ma kam seweɗ, taya ma dzəmam mey ta, tabiyaha ka Pol, ma zəgama, ma dadama a slam ma sariya.

¹³ Taya ma ləvam: «Ndaw a neney a tatəkadata ndaw hay na, kuley ma Bay ma Bəla na ma dzəmam ta mewey kakay ana.»

¹⁴ Andza Pol a da tsey guma na, Galiyoŋ ma mbəɗafatara kava a Zuif hay: «Zuif a ɗey hay, hana na a kəɗey ndaw vagay aha, dakay na ka ŋgəsey ba gədaŋ aha a key hwaray na, akwatay i dzəkafakwar sləmay ka me wudey kwar ana da dərka.

¹⁵ Ama, me tərey vaw kwar ana a tsey na, ka me tetəkey ndaw, ka mezəley hay ta mewey kwar hay dada sana, na ŋga na na, a nəkafakwar dey na, ka kuray ana dada, yah na, i wuɗey me key sariya, ma tek hay andza neney tikay.»

¹⁶ Arka ma mbəkadatərawa ba da slam ma sariya.

¹⁷ Ndaw hay tabiyaha ma zəgama Sosten bay ma 'ay me ɗuley mey, ma kəɗama haya hayaha ka slam ma sariya na, amana ka kar da ’ar a Galioŋ tikay.

Pol a mey a Antiyos

¹⁸ Pol me ndzey da Koreŋt haɗadzidzay sa, arka ma gəradatərawa malam hay na, me tsəley a kombiwal, ma daway a Siri, Akilas ta Prisil ma kəsadama. Andza a da zəgey kombiwal na, ŋga ma həza 'ar ba da Senkres, hərway ŋga ka hwohuney tek ba.

¹⁹ Taya ma husam a Efez, da huɗa na, Pol ma mbəkadata ndaw aŋga ma dəmaɓa dzaya na hay, ŋga na ma daway a 'ay me ɗuley mey, ma da tsatar guma a Zuif hay.

²⁰ Andza ndaw hay ma tsəhafama ka ndzey adiya na, a wuɗey kakay.

²¹ Ama ma mbəkadata ta guma neney: «Kendzey Bay ma Bəla ka wuɗey ba na, i da mawa a 'ay kwar ta pas mekelehe.» Da Efez na, ŋga ma daw təŋga ta kombiwal.

²² Ma harɗawa da kombiwal da Sezarey, me tsəley ma da tsərawa guma a Egliz, arka na me hərɗey a Antiyos.

²³ Da huɗa na, ŋga me ndzey nekəɗey, arka na, ŋga me mey, ma hala dala ma Galasi tabiyaha, ha kasl a Firzi, ma səmadata gawla ma Yezu hay tabiyaha.

Apolos da Efez ta Koreŋt

²⁴ Ndaw zuif ana daha a zəlamar Apolos, ma yaha da Aleksaŋdri, me husey a Efez, a sərada tek kambəlaɓa, a səradata Mewindey Kokwoɗ ana hay haya hayaha.

²⁵ Ka ɓadəmara Tsəveɗ ma Bay’ərlam ba, ma həla vaw aha, perkeke ha, a tələkada mey, a tatəkadata ndaw hay ɗerre ta guma me tsey ka Yezu ana. Ama a sərey na me dzuhəɓey ndaw ma Zaŋ dada.

²⁶ Ŋga ma zlar ma tsatar guma fandar fandar a ndaw hay, da 'ay me ɗuley mey. Ama andza Akilas ta Prisil ma tsənadama guma ŋga na na, taya ma ŋgəlama ka tsakay ta, ma ɓadəmara tsəveɗ ma Bay ma Bəla ɗerre a fəna satsa.

²⁷ Andza a wuɗey aha ma daway a Akayi na, a mbafata ka malam hay, ma windamar ɗeriwel a har ka vəladatara a gawla ma Yezu hay na, ma ka ŋgəlama mambay mambay aha. Andza me husey ba ta hahaya ma Bay ma Bəla na, ka nafatar ba a ndaw me pey 'ar ana hay, haɗadzidzay.

²⁸ Hərway gədaŋ ma guma ŋga na me tsey na, ka fənatara 'ar ba a Zuif hay ka slam dey ma ndaw hay tabiyaha, andza a wandzaladatara da Mewindey Kokwoɗ ana hay na, waya, Ndaw ma vaha 'ar ana na, Yezu.