Mber 17 - MEY HAYNA WAYNA MA YEZU KRISTE MA MEVEY

Pol ta Silas da Tesalonik

¹ Taya ma tazlaram ta Amfipolis ta Apoloni, arka taya ma husam a Tesalonik; da huɗa na, 'ay me ɗuley mey ma Zuif hay daha.

² Andza ma ta kete ana na, Pol ma daway, ma ndzafata. Mesley a key dey makar na, re Pol a tsatar guma, zla da guma Mewindey Kokwoɗ ana hay na,

³ a wandzaladatara, a ɓadatara na, Ndaw ma vaha 'ar ana a dafa na, ka key tsetseh, a da mbəlawa da walaŋ ma ndaw mamətsa na hay. Ŋga ma ləvatar: «Ndaw ma vaha 'ar ana na, Yezu a neney i ma tsakwar kava na.»

⁴ Zuif ana sa na hay ma təɓama guma, mandza Pol ta Silas, ta sa ma Grek hay haɗadzidzay ma namar dəba a Bay ma Bəla na hay ta ŋgwas ana slam ata daha da walaŋ ma ndaw ma səka na hay.

⁵ Amana a ndalatar a Zuif hay, ma wunəmata buɗare hay na ma halam ka buwal sa lamba na hay, ma tosam mey da walaŋ ma ndaw ma kusa hiya na hay, ma kam tek so da wuraw. Ma kəlam mey'ay Zazoŋ, ma da səpatərawa andza Pol ta Silas, a wuɗam akwa na, ma dadəmata, ka slam dey ma səkway ma kusa ha.

⁶ Andza taya ma ndzafəmata sakay na, ma vahəmatərawa andza Zazoŋ ta sa ma malam hay daha nekəɗey, ka slam ma bay ma wuraw hay. Taya ma wudam: «Ndaw a neney hay ma ŋgəsadəmərawa bəla tabiyaha na, ka husəmawa ba taya ekəɗey ka sləna,

⁷ Zazoŋ na ma ŋgəlata a 'ay ŋga. Ndaw a neney hay tabiyaha, 'ar ata madzeley na andza ma bay ɗuhwa na ma dala na, kakay. A ləvam na waya bay daha mekelehe, Yezu.»

⁸ Me wudey ta na ma həladatara bəzay a ndaw ma kusa hiya na, ta bay ma wuraw hay,

⁹ ha ma ləvəmatar andza Zazoŋ ta sa ma ndaw sa na hay ka vəlam sumkwo na, azambay a da mbəkadəmata.

Pol ta Silas da Berey

¹⁰ Malam hay ma dadəmata andza Pol ta Silas ta dəvaɗ aha. a Berey. Me husey tana, taya ma dawam a 'ay me ɗuley mey ma Zuif hay.

¹¹ Taya na haya hiya a fənəmata ndaw ma Tesalonik hay, taya ma təɓama Guma na ta mevel ata dzay, ka pas ka pas na, Zuif hay na a səpama da Mewindey Kokwoɗ ana hay, ma aza ka səradama Guma ta na ma tsam ana na, dərka na ɗaw?

¹² Ndaw hay haɗadzidzay da walaŋ ata ma pam 'ar ta ŋgwas grek hay daha da walaŋ ma ndaw ɗuhwa na hay, ta mawal hay haɗadzidzay.

¹³ Ama andza Zuif ma Tesalonik hay, ma tsənadama waya Pol a ɓey aha guma ma Bay ma Bəla da Bere satsa na, taya ma dam ma da dzuŋgufadəmatara 'ar ma ndaw ma kusa hiya na hay da huɗa sa.

¹⁴ Arka tsana, malam hay ma dadama Pol ba, kasl ka mey ma bəlay; ama andza Silas ta Timotey na ma ndzam tek ata da huɗa.

¹⁵ Ndaw ma kəsadama Pol ana hay, ma husam kasl a Aten, arka ma ma mawa ta, ta guma ma Pol ma ləvatərawa andza Silas ta Timotey ka səmawa ka da ndzafama ka sləna tsam tsam.

Pol da Aten

¹⁶ Andza Pol a hutata ha da Aten na, mevel ma tsar, hərway ŋga ma nəkadata ndaw hay a nəmatar dəba a ’ərlam so na hay haɗadzidzay.

¹⁷ Ŋga ma tsatar guma da 'ay ma me ɗuley mey a Zuif hay, ta ndaw ma namar dəba a Bay ma Bəla na hay, ka pas ka pas ka slam me kusey na, a tsatar guma a ndaw ma səmawa ana hay.

¹⁸ Kwa ndaw ma sərada tek ana hay, ndaw na epikuriyeŋ hay, ta ndaw ma stoysiyeŋ hay tekeɗe na, a tsam guma dzaya. Sa na hay a ləvafama: «Ɗiyeŋ a neney me bebəley tek ana, a ləvey na teŋgey tey?» Sa na hay tey waya: «Ka zəgawa ba na, ndaw a neney a tələkey mey ta 'ərlam hay, ma dala mekele hiya, hegey?» Pol a tələkey mey na ta Yezu, ta ma mbəlawa ŋga.

¹⁹ Taya ma zəgama, ma dadama ka slam ma tsəhey ’ar ma wuraw. Taya ma ləvamar: «Ka slafa ma ɓadandar me tetəkey ɗek a neney, kah ma tsamdar wayaha na ɗaw?

²⁰ Akwa na ka dəkandar sləmay, ta bəzay ma guma na, la ma səradama kakay ana. La wuɗam la ka səradama a ləvey da huɗa na, teŋgey?»

²¹ Akwa na ndaw ma Aten hay, ta mbəlak na ma ndza hiya da huɗa na hay, da mendzey ta na a təkəram, a dzəkam sləmay na, ka guma na ma sawa dokw da dəba na hay.

²² Pol me lətsey da walaŋ ma ndaw ma Eropaz ana hana na hay, ma zlar me tsey guma: «Ndaw ma Aten a neney hay, i ma nəkada ka slam dey ɗaw na, ha vəladəmara vaw ba a kuley hay kambəlaɓa.

²³ Andza i hala buwal a kwar hay na, dey ɗaw a nəkey zarra na, ka tek a kwar ma ləmaya 'ərlam ahiya na, i me ndzefey da walaŋ ana na, ŋgwa ma kuley ma winda ha kava «A 'ərlam na ma səradama kakay ana.» Na kuray ma namar dəba mandzara ha səradama na tok na, i sawa i da ɓakwar na, ŋga tok.

²⁴ Bay ma Bəla na ma kərawa bəla gədem, ta tek na da huɗa na hay dzay, ŋga Bay’ərlam ma ndasl ma 'ərlam ta dala, ŋga na a ndzey da 'ay ma kuley na ma ndəra hiya ta har ma ndaw hay ana, tikay.

²⁵ Ŋga na a wuɗey ndaw hay ka kamar tek ka har tikay, hərway me vəley mendzey ta mesəfrey na ŋga, ta sa ma tek a sana hay tabiyaha.

²⁶ A zlar ta ndaw asləta na, ŋga ma katərawa səkway hay tabiyaha ka ndzam ka dala, ka watərawa har ana hay ba, ma patərawa kwakway ma dala ma ndaw hay, ma da ndzam kava na.

²⁷ A ka tərawa andza ha na, ma ndaw hay ka səpama Bay ma Bəla, naŋgərhay ka ɗaɗəfama na, a ndzafama, akwa ŋga dəreŋ kakay, ŋga daha ka ndaw ka ndaw da walaŋ a lakwa.

²⁸ «Hərway i ndzakwama ka bəla, i ɓəlakwama», andza ma sa ma ndaw ndaraw a kwar hay ma ləvam ana: ‹Hərway lakwa na, me Səmbərey ŋga hay›.

²⁹ Azlakwa lakwa na, ndaw ma me Səmbərey ma Bay ma Bəla hay sana, ka slafakwa me dzeley Bay'ərlam a nəkey andza gura, andza sulay, dakay na andza ŋgwa, ndaw hay ma ɗakam andza ma medzeley 'ar ma ndaw, kakay.

³⁰ Arka ekəɗey na, Bay ma Bəla ana mətaradata 'ar ba, ta har aŋga na hay, ndaw hay a səradama tek kakay ana, a ɓadatara ekəɗey tabiyaha a ndaw hay, kwa ka waray ka waray na, ka mbəɗadama mendzey ta hay.

³¹ Akwa na, ka pawa meney ana ba, pas asləta na, a da kadara sariya ma bəla ta dzerey, ta har ma ndaw ana daha, ŋga ma gaɗəma: andza ŋga ma ɓafatara a ndaw hay da ŋga ma mbəladərawa da walaŋ ma ndaw ma mətsa na hay.

³² Ama andza ma tsənadama guma ma ma mbəlawa tsana, sa na hay ma saŋgərafama, sa na hay tey ma ləvam: «I da pafəmaka sləmay kava, ta pas mekelehe»

³³ Kəɗey na, Pol ma mbəkadata.

³⁴ Sa na hay na, ma tapa hiya ka bəzay ŋga, ma təram ndaw me pey 'ar aya. Da walaŋ ata na na, Denis ndaw asləta da walaŋ ma ndaw ma Ariyopaz hay, ŋgwas ana daha a zəlamar Damaris, ta sa na hay sa.