Mber 16 - MEY HAYNA WAYNA MA YEZU KRISTE MA MEVEY

Timotey ma kəsadata andza Pol ta Silas

¹ Arka andza ha tok na, ŋga me husey a Derbey, arka a Listre. Da huɗa na, gawla ma Yezu ana daha a zəlamar Timotey, may ŋga na na dey Zuif hay me tərey me pey ’ar aha, ama baba ŋga na na ndaw Grek.

² Da me ndzey ŋga na, a mbafata ka malam na da Listre, ta na da Ikoniyum ana hay.

³ Pol a wuɗey ma ŋgəla ka bəzay, ŋga ma zəga, ma sladara kuɗey ba hərway ma Zuif hay da wuraw ana. A səradama dey ta kava akwa baba ŋga na na, ndaw Grek.

⁴ Da wuraw ana taya ma tazlaram ta huɗa na hay na, Pol ta Silas a ɓadəmatara guma ma maslaŋ hay, ta ndaw ma səka na hay ma tsəmatəraɓa kava da Zeruzalem ana, ma tsəhafəmata ka kama andza ha.

⁵ Egliz hay ma ndzafam gədaŋ ta me pey 'ar adiya, ka pas ka pas na, a səkam adiya.

Tek ma nəkar a dey a Pol da Trowas

⁶ Pol ta Silas ma halama dala ma Firzi ta ŋgwa ma Galasi, hərway Mesəfrey Kokwoɗ ana ka təkata ba me ɓey Mey Hayna Wayna da dala ma Azi.

⁷ Andza taya ma husam ba ka kokway ma Mizi na, akwa a satar me tesey a Bitini, amana Mesəfrey ma Yezu a wuɗey ma mbəkatar tsəveɗ kakay.

⁸ Arka taya ma tazlaradama dala ma Mizi, ma harɗam a Trowas.

⁹ Ma dəvaɗ na, tek ma nəkar a dey a Pol, ŋga ma nəkada ndaw Masedowan ana daha ma lətsaha, ma tsəhafa andza neney: «Sawa a Masedowan da dzənandar.»

¹⁰ A dəba ma tek a neney ma nəkar a dey a Pol ana na, la tsana, la ma səpam me zəgey tsəveɗ ma daway a Masedowan, hərway la ka səradama tsoy, Bay ma Bəla a zəlandar aha ma da ɓey Mey Hayna Wayna da huɗa.

Da Filip na, Lidi ma mbəɗada mendzey

¹¹ La ma tsəlam ba a kombiwal da Trowas na, la ma dawam sayoŋŋa a Samotras, ma medew ana na, la ma lətsam da huɗa, la ma dawam a Niyapolis.

¹² Arka da huɗa tey na, la ma dawam a Filip wuraw ɗuhwa na ma dala ma Masedowan, ma wa dala na na Romeŋ hay, la ma ndzam da wuraw ana meney nekəɗey.

¹³ Ta pas ma mesley na, la ma bəmawa ba da wuraw ana, la ma dawam ka mey wayaŋ ana daha, slam ana la ma dzalama na, la da ndzafam slam me ɗuley mey kava. Andza la ma ndzam ba ta ndzey na, la ma tsəmatar guma a ŋgwas hay daha ma kusa hiya ka slam ana.

¹⁴ Naŋgar asləta da walaŋ ata a zəlamar Lydi a filey veveze, ŋga dem ma wuraw ma Tiyatir. Ŋga na a ɗular aha mey a Bay ma Bəla ka dəba, a pey aha sləmay haya hayaha, hərway Bay’ərlam ka wuradara mevel aŋga ba, me pey sləmay ka guma ma Pol təɗe təɗe.

¹⁵ Andza me ndzefey me dzuhəɓey ba ŋga na ta ndaw ma ’ay ŋga hay na, ŋga ma wunandar a 'ay ŋga, ma ləvandar andza neney: «Kuray ma dzalama na, i pey aha 'ar ka Bay’ərlam sana, səmawa da nam da 'ay ɗaw.» Ha ma təkandar ɗay la ka dawam.

Da daŋgay da Filip

¹⁶ Pas asləta la dawam aha a slam me ɗuley mey na, dem ma ’ay ana daha ta fakalaw aha da 'ar, a tsey ka tek ma da key ka mey ana hay, ma sawa, la ma zlam 'ar. Mbəzla ŋga na me key ana a sadatərawa sumkwo haɗadzidzay a bay ’ay ŋga na hay.

¹⁷ A səpandar ta me wudey aha Pol ta la: «Ndaw a neney hay na, gawla ma Bay ma Bəla tsaŋ da mekekəle ŋga ana hay, a ɓəmakwar na tsəveɗ me ma buwey.»

¹⁸ Meney haɗadzidzay na re a mada andza ha. A ndalar a Pol, a da zlar na, me mbəɗey dey ma ləvar a fakalaw a hana na: «Ta mezəley ma Yezu Kriste, i ləvaka na, bawa ba da vaw ma ŋgwas a neney.» Deŋe ka slam ana tsana, fakalaw ana ma bawa ba.

¹⁹ Bay ma ’ay ŋga na hana hay ma nəkadama tek ma sadərawa zleley ta ka tsəvey tsoy na, ma zəgəmata andza Pol ta Silas, ma vahəmata kasl ka slam me kusey, ka mey ’ərdey ma ndaw me key sariya hay.

²⁰ Taya ma ɓadəmata ka 'ərdey ma ndaw me key sariya hay, ma ləvam: «Ndaw a neney hay a ŋgəsadama wuraw a lakwa ba, taya na Zuif hay,

²¹ a tatəkadəmata ndaw hay metsekesley ma mendzey ma lakwa Romeŋ hay ma təɓa kwa ma səpa kakay ana.»

²² Arka ndaw ma kusa hiya na hay, ma mbəɗafəmata dey ka taya. Ndaw me key sariya hay ma tsukwadəmatara zana ba ka vaw, arka ma ləvam ka kəɗəmata ta lagwada.

²³ A dəba ma ma kəɗəmata ba ta lagwada na, ma kuyadəmata a daŋgay. Arka ma ləvamar a sidzew ma daŋgay ana hay, ka dzaɗəmata hayahaya ha.

²⁴ Andza ma tsənada ba andza ha na, sidzew ana ma daw ma wuɗata a 'ay na da bəzay 'ay ma daŋgay ana, arka ma daradəmatara sek a tuwaw.

²⁵ A key wuzla dəvaɗ na, Pol ta Silas a ɗulam aha mey ta walay aha, a səmbərama Bay ma Bəla na, ndaw ma daŋgay a sana hay ma pafəmata sləmay.

²⁶ Dekeslef a da sərafama na, dala ma dederey ma gədaŋ, ha ma ɓəlada bəzay ma 'ay ma daŋgay ana. Arka tsa na, mambaw hay tabiyaha ma wuram, tsalalaw ma ndaw ma daŋgay hay tabiyaha ma pəsəkam.

²⁷ Arka tsa na ndaw me tsukurey daŋgay ana me pərkey, ma nəkada mambaw ma daŋgay hay tabiyaha ma wura hiya ba. Ŋga dzala waya ndaw ma daŋgay ana hay ka hwam tek ata na, ŋga ma zəgey sleɗ ma tsakay ŋga ma da slaka vaw ŋga ba.

²⁸ Ama Pol ma tsar guma ta magala ha: «Ka da slaka vaw ɗek zlay; la daha tabiyaha la hiya.»

²⁹ Sidzew ma daŋgay ana me tsəhey waw, ma hway 'ar a hwaɗ ma 'ay ana ta me wesey aha ka vaw, ma kəley ka slam sek ma Pol ta Silas.

³⁰ Arka andza ma badatərawa ba na, ma ləvatar: «Ndaw a ɗaw hay! Ma ka da buwəmaya na i ka key na teŋgey?»

³¹ Taya ma mbəɗamar kava: «Pey 'ar ka Bay’ərlam Yezu na, aza a buwəmaka kah ana ta ndaw ma 'ay ɗek ana hay dzay.»

³² Ma ɓadəmara guma ma Bay’ərlam, a ŋga na ta ndaw ma ndzaya da'ay ŋga na hay dzay tabiyaha.

³³ Da har ana deŋe ta dəvaɗ ana tsa na, sidzew ma daŋgay a hana ma ŋgəlata, ma da pərawa mbəlek ata hay, arka tsa na mendzey dakay na, ma ndzefey me dzuhəɓey, ŋga na, ta ndaw ma 'ay ŋga hay dzay tabiyaha.

³⁴ Ŋga ma tsəladata andza Pol ta Silas a 'ay ŋga, ma tatərawa tek me zəmey, ma kam wuiya da veɗ 'ay ma 'ay ŋga, hərway taya ma ndzafam me pey 'ar ka Bay ma Bəla ana.

³⁵ Ma zlemedew na, ndaw ma sariya na ma slərəmawa adziya ta hay, ma ka ləvamar a sidzew ma daŋgay ana ka kuyadata ndaw ana hay.

³⁶ Sidzew ana ma sawa ma ɓadatara andza Pol: «Ndaw ma sariya hay a slərəmawa adziya hay a ləvam la ka mbəkadəmakwar. Andza ha tok sana, dam tek a kwar da zoy.»

³⁷ Ama Pol me ləvey: «Ma kəɗəmandar ma dey ma ndaw hay tabiyaha mandzara sariya ka dzuwandar, la bəzey ma dala ma Romeŋ hay, taya ma kəladəmandar a daŋgay, ekəɗey na, a kuyadəmandar ta masasudokw aha ka dəba na, la wuɗam kakay, ka səmawa ta 'ar ata na, ka da badəmandəraɓa da daŋgay ana.»

³⁸ Adziya hay ma madəmatara guma mandza Pol, a ndaw me key sariya na hay. Andza taya ma tsənadama taya Romeŋ hay na, taya ma wasam ka vaw.

³⁹ Arka ndaw ma sariya na hay ma səmawa ma da tsəhey ambahw da har ata na, arka ma badəmatərawa, arka ma ləvəmatar ka dawam ba da wuraw ata.

⁴⁰ Andza ma bəmawa ta ba da daŋgay na, Pol ta Silas ma dawam ma ndzafama Lydi, ma nəkəmata malam ana sa na hay, ma həladəmatara bəzay, arka ma dawam tek ata.