Mber 15 - MEY HAYNA WAYNA MA YEZU KRISTE MA MEVEY

Me tərey vaw da Antiyos

¹ Ndaw hay nekəɗey ma harɗam da Zudey, a wuɗam ma tatəkadəmata malam hay andza neney: «Haɗaw kuray ka slama kuɗey andza ma me tsekesley ma Moyiz kakay na, ka da slafama ha me tərey ndaw ma buwa hiya na kakay.»

² Me tərey vaw ma sawa ɗuhwa ha, dzendze me key da walaŋ ma ndaw me tetəkey ndaw ana hay Pol ta Barnabas. Arka taya ma dzalam me slərey andza Pol ta Barnabas ka zəgawa ndaw hay nekəɗey, ka dawam a Zeruzalem ka da ndzafəmata maslaŋ hay ta ndaw ma səka na hay kavəday ma guma na.

³ Ndaw ma Egliz ma Antiyos hay ma vələmatar tek a har ma sada yam ka tsəveɗ ata. Ma tazlaram ta Fenisi, ta Samari na, ma təkəradəmatara me mbəɗey mendzey ma ndaw ma dala Zuif ahiya kakay ana hay, arka kəɗey na ma vəlatar wuiya a malam hay tabiya ha.

⁴ Me husey ta a Zeruzalem na, ndaw ma Egliz hay ma ŋgələmata, maslaŋ hay ta ndaw ma səka na hay ma ɓadəmatara tek ma Bay ma Bəla ma kawa ta har ata na hay tabiyaha.

Metsehey ’ar ma Zeruzalem

⁵ Fariziyeŋ na ma pam ’ar ka Yezu ana hay nekəɗey ma zəgafama har ka guma na, ma ləvam: «Ndaw Zuif ahiya kakay ana hay na, ka slama kuɗey ba, ma ɓadatara ka tsənamar sləmay a mewey ma Moyiz.»

⁶ Maslaŋ hay ta ndaw ma səka na ma tsəham 'ar ma da dzadzəma bəzay ma guma na.

⁷ Andza guma na a səkey aha adiya na, Piyer me mbəɗey kava me ləvey: «Ka səradama ha seŋgey, malam a ɗaw hay, Bay ma Bəla ka zəgaya ba zla da bəziya, da ’ay kwar, ndaw ma dala na Zuif ahiya kakay ana hay, ka tsənadama Mey Wayna ba ta huɗa mey ɗaw, arka na ka təram ba ndaw me pey 'ar ahiya.

⁸ Bay ma Bəla ma sərada mevel ma ndaw hay ana na, ka kadatara seydewe ta na ba, da ŋga ma vəlatərawa Mesəfrey Kwokwoɗ ana andza a lakwa na tiyatsa.

⁹ Kwa ka waladandakwar ka vaw ta taya ta lakwa kakay, a da bazləmadatara mevel ata na, ta me pey 'ar ata.

¹⁰ Zla ekəɗey na, ka zarafakwa mey ka Bay ma Bəla ta ma patar zlamla ka ɗay ma maslaŋ hay na ka mey, na kwa baba lakwa hay, kwa lakwa na kaslafəkurawa ma zəgawa kakay ana na.

¹¹ I mada dey asləta adiya sa, i təɓakwa ka mevel a lakwa, Bay’ərlam Yezu a da buwandakwar na, hərway ma hahaya ŋga, kal kal andza ma ta na tey!»

¹² Arka da me tsəhey ’ar ana tobiya ta ha ndaw hay ma ndzam tete, arka na ma pafəmata sləmay kandza Barnabas ta Pol ma təkərama zeheɗ hay tabiyaha, ta tek ma Bay ma Bəla ma kawa me rəzley ndaw ana hay ta har ata, da walaŋ ma ndaw na Zuif ahiya kakay ana hay.

¹³ Andza ma ndəvadama guma na ba na, Zak me lətsey sa tey, me ləvey: «Malam hay, pafəmaya sləmay.

¹⁴ Simioŋ a ɓadandakwar ekəɗey ana na, zla da mezley na, Bay ma Bəla ka wuɗey ba me gəɗəmey səkway aŋga na da walaŋ ma ndaw ma dala Zuif ahiya kakay ana hay da mezəley ŋga.

¹⁵ Tek a neney dzadzak me key ana na, a dam ka vaw na ta guma ma ndaw sek hay, hərway ma windaha da da ɗeriwel kokwaɗ ana:

¹⁶ ‹Arka a dəba na na, i da mawa, i da zlada 'ay ma David ana ma mbəzla na ideŋ ana, ma mbəzla ha na na, i da zlada, i da lətsada ka slam aŋga.

¹⁷ Zla da na ŋga na na, sa ma ndaw hay a da səpama Bay’ərlam, ta ndaw ma dala na sa na hay i ma zəlatərawa ka təram na ŋga ɗaw a hiya na. Nəkafama Bay’ərlam a ləvawa na andza neney, a ndasladata andza ma ŋga ma dzalawa na hay.

¹⁸ Ma səraha ba zla ekəɗey kakay.›

¹⁹ Yah na, da walaŋ ma ndaw ma pəmatar tek ta ger ana hay, ka tsəveɗ ma ndaw na Zuif ahiya kakay ana hay tikay, ma mbəɗam dey ka Bay ma Bəla ana hay.

²⁰ Windəkwatar tsana: «Ka mbəkadama me zləɓey hay, ’ərlam so na hay, me tsəney sləmay kakay, slaw ma mətsa ha te mətsey ana ta mambaz.»

²¹ Zla da mezley ana na, akwa na ndaw ma Moyiz hay ma paya ka wuraw ka wuraw, me dzeŋgey da 'ay me ɗuley mey ta pas ma mesley hay tabiya ha.

Ɗeriwel ma windəmatar a ndaw me pey 'ar zuif aya kakay ana hay

²² Maslaŋ hay, ta ndaw ma səka na hay ma dzəmadama mey da Egliz kamaslətaha na, ma dzalam ma ka gaɗəmam ndaw hay da walaŋ ata, ma da sləradata a Antioche, andza Pol ta Barnabas. A da gaɗəmam na, Zudas na ma zəlamar Barsabas ana ta Silas, ndaw ɗuhwa hiya, ma səram ka slam dey ma malam hay ana.

²³ Ma vəladəmatara ɗeriwel ana, ma winda ha andza neney ana: «Maslaŋ hay, ndaw ma səka na hay ta malam hay tabiyaha ka tsadəmukuraɓa guma, a kuray malam na ma bəmawa da səkway na Zuif ahiya kakay ana hay, na da Antiyos, da Siri ta Silisi.

²⁴ La ka tsənadama ba ndaw hay daha da walaŋ ala ma dəmaɓa ma da dzuŋgufadəmakwar, ma pəsladəmakwar 'ar ta guma ta, ma tsəmakwar ana, amana ndaw ka sləradatəraɓa tikay.

²⁵ La ma dzalam 'ar ka maslətaha, ma gəɗəmey ndaw ma slərəkuraɓa ka kəsadəmatəraɓa andza Pol ta Barnabas, na la ma wuɗəmata bəza kakay ana,

²⁶ ndaw na ma vəladama mendzey ta hərway ma mezəley ma Bay’ərlam a lakwa Yezu Kriste na hay.

²⁷ La sləradəmatəraɓa andza Zudas ta Silas, ka ɓadəmakwar mewey a neney na re andza ha atsa na ta huɗa mey ta.

²⁸ Mesəfrey Kokwoɗ ana ta la na, ma dzalama na, ma pakwar tek mekelehe me ləhey aha ka 'ar na hayaha kakay, sey neney hay me gərey vaw kakay ana hay:

²⁹ Mbəkadama slaw ma kuley ma ndaw Zuif ahiya kakay ana hay ba, ka da zəmam mambaz zlay, ka da pəɗam slaw ma gənaw ma mətsa ha ta mətsey ana hay zlay, tsənam sləmay. Haɗaw kuray ka kəmata tek a neney hay ba tabiyaha, ta me wey daw aha ka vaw na, na ŋga na na kuray ka kama ba hayaha. Da zoy!»

³⁰ Andza ma mbəkadəmata ba na, ndaw ma sləradəmata na hay ma harɗam a Antiyos, da huɗa na, taya ma kusəmata ndaw hay, ma da ɓadəmatara guma na hana da ɗeriwel ana.

³¹ Guma na ma dzaŋgama na ka mbafata ba kambəlaɓa, hərway a həladatara bəzay.

³² Zudas ta Silas andza taya ndaw sek aya seŋgey na, ma tsəmatar guma ta huɗa mey ta, mendzey haɗadzidzay, ma həladəmatara bəzay, ma səmadəmata.

³³ Taya ma ndzam da huɗa meney nekəɗey, arka a dəba na na, malam hay ma ləvəmatar ka dawam da zoy, ka tsakay ma ndaw ma sləradəmatəraɓa na hay.

³⁴ Silas na me dzeley me ndzey, ama Zudas na, ma daw təŋga.

³⁵ Ama andza Pol ta Barnabas na ma ndzam da Antiyos. Ta sa ma ndaw hay daha haɗadzidzay sa na, a tatəkadəmata ndaw hay, a tələkadama mey ta Mey Hayna Wayna ma guma ma Bay’ərlam.

Pol ta Barnabas a wunəkam 'ar

³⁶ Mendzey nekəɗey a dəba na na, Pol ma ləvar a Barnabas: «Makwa da nəkwakwatərawa malam na da wuraw na lakwa ma ɓəkwatərawa guma ma Bay’ərlam ana hay, aza lakwa ka nəkukwatərawa ɗagay taya ka waray.»

³⁷ Barnabas a wuɗey ma ŋgəla Zaŋ na, ma zəlamar Mark ana.

³⁸ Ama Pol na a wuɗey ma zəgada ka vaw ka dam dzaya andza ndaw aŋga na ma mbəkadatərawa da Pamfili, me wuɗey ma wunəkadəmarawa mber ta dzaya kakay ana sakay.

³⁹ Me tərey vaw ta na na ka key ba haɗa, a da wunam 'ar na, kwa way way me zəgey tsəveɗ aŋga. Barnabas ma ŋgəla Mark, ma dawam ta kombiwal a Sipre.

⁴⁰ Pol tey me zəgey me tsetsew aŋga Silas; a dam aha na, malam hay ma vəladəmata a har ma hahaya ma Bay’ərlam.

⁴¹ Ma halama dala ma Siri ta Silisi, Pol ma madatara 'ərev a Egliz hay.