Mber 13 - MEY HAYNA WAYNA MA YEZU KRISTE MA MEVEY

A waləmata andza Barnabas ta Sol ma da sləradata

¹ Da Antiyos, da Egliz ma slam ana na, ndaw sek hay ta ndaw ma tatəkadəmata ndaw ana hay daha: andza Barnabas ta Simeiyoŋ, na ma zəlamar Nizer ana, ka zəgawa Lusiyus ndaw Sireŋ, Manayieŋ na ma gələmawa ka maslətaha ta bay Erod Tetrark ana, ka zəgawa Sol.

² Pas ana daha a kam aha kuley ma Bay’ərlam, a kam aha sumaya na, Mesəfrey Kokwoɗ ana me ləvey: «Padəmataya andza Barnabas ta Sol slam ata gəle, ka mber ana i ma zəlata kava na.»

³ Arka a dəba ma sumaya ta ma ɗuley mey ta na, ma bazləhafəmata har, arka ma ləvəmatar ka dawam da zoy.

Barnabas ta Sol da Sipre

⁴ Andza Mesəfrey Kokwoɗ ana ma sləradata ba na, Barnabas ta Sol ma harɗam a Selewsi. Arka da huɗa na, ma tsəlam a kombiwal ma dawam a Sipre.

⁵ Andza taya ma husam ba a Salamin na, taya ma tələkadama mey ta Mey ma Bay ma Bəla da 'ay me ɗuley mey ma Zuif hay, taya andza Zaŋ, a dzənata ka mber ana.

⁶ Andza taya ma tazlaradama dala na ma ɗawa ha ta yam ana kasl a wuraw ma Pafos, taya ma tsam 'ar andza ndaw ana daha a key hila, a ləvey waya ŋga na ndaw sek; ŋga ndaw Zuif, a zəlamar Bar-Yezu.

⁷ Ŋga ndaw ma fada ma Serzus Pawlus, guverner ma Slam ana, ŋga ndaw ma sərada tek aha, ŋga ma wunata andza Barnabas ta Sol, hərway a wuɗey me pey sləmay ka guma ma Bay ma Bəla.

⁸ Amana, Elimas ndaw hila hana na -hərway mezəley ŋga na na andza ha- ma kadata səleŋ, ma pafa wuiya ka guverner ma ka pey 'ar zlay.

⁹ Arka Sol dakay na Pol ka dəba na, ma rəha vaw aha ta Mesəfrey Kokwoɗ ana na, ma zazura a huɗa dey ŋga,

¹⁰ arka ma ləvar: «Kah a neney wewer ma hərɗaka ta’ar ana, bəzey ma Sataŋ, ndaw dugwan ma dzerey, ka da mbəkada ma tərŋgwaladara tsəveɗ ma Bay’ərlam na, varay?

¹¹ Nəkafa, ekəɗey na, Bay’ərlam a da hətaka: ka da tərey wulaf aha kasl ka har aŋga me wuɗey, kwa pas tekeɗe na ka da nəkada ha sakay.» Arka tsana, ləvaŋ ma sahəta andza dəvaɗ, a tewey ka slam ana, a səpey ndaw ka zəgafa har.

¹² Andza Guverner ana ma nəkada tek a neney me key ana na, ŋga me pey 'ar hərway ma me tetəkey ka Bay’ərlam a neney ma ɓadəmara na na, ka dar ba a mevel aŋga.

Pol ta Barnabas da Antiyos ma Pizidi

¹³ Pol ta ndaw taya dzaya na hay ma dawam ta kombiwal a Pafos, ma husam kasl a Perzey da Paməfili, arka na Zaŋ ma mbəkadata, ma mey təŋga a Zeruzalem.

¹⁴ Arka taya tok na, ma lətsam da Perzey, ma zəgam tsəveɗ ata, ma dawam a Antiyos ma Pizidi. Ta pas ma mesley na, taya ma fuləkwam a 'ay maɗuley mey, ma ndzam ta ndzey.

¹⁵ A dəba ma ma dzaŋgama guma ma mewey ta na ma ndaw sek hay ba na, bay ma 'ay me ɗuley me ləvey ka ləvəmatar: «Malam a ɗaw hay, haɗaw guma kwar daha ma ma həladara bəzay a səkway na tsama!»

¹⁶ Arka Pol me lətsey, ma katar ta har, ma ləvatar: «Bəzey ma Israyel hay ta kuray a neney ma wasam ta Bay ma Bəla na hay na, pafəmaya sləmay.

¹⁷ Bay ma Bəla ma səkway lakwa Israyel na, ka walata baba lakwa hay ba, ŋga ka gəladərawa səkway ana ba, da har ma ndzawa ta da dala ma Ezipte, arka ta gədaŋ ma har aŋga na, ka badatərawa ba.

¹⁸ A key da mevey kwakurow faɗ da palah na, ŋga ka vəlatərawa tek me zəmey ba;

¹⁹ arka a dəba ma ma bazlata ndaw ma ŋgwa na hay tsəla ba da dala ma Kanaŋ na, ŋga ma wənəkadatara dala na, ma ka zəmama a taya.

²⁰ Tek a neney hay ma kəmawa tabiyaha na na, ma ndzawa a key mevey temere faɗ ta kwakurow zlam. Arka a dəba na na, ma vəlatar ndaw me key sariya hay ha kasl ka ndaw sek Samuwel.

²¹ Arka taya ma tsəham ka pəmatar bay. Arka Bay ma Bəla ma patar Sawl bəzey ma Kis, ndaw ma gedzek ma Beŋzameŋ, ŋga me key bay mevey kwakurow faɗ.

²² Andza ma kəlada Saul ba na, Bay ma Bəla ma patar David bay aha a veɗ ana, ma ka seydewe neney na ŋga: ‹I da ndzefey na, David bəzey ma Zesey, ndaw na andza mevel a ɗaw me wuɗey ana, a da ndasladataya tek a ɗaw me wuɗey ana hay tabiya ha.›

²³ Bay ma Bəla a da badərawa Yezu, Ndaw me buwey Israyel ana da ŋga, andza na matsawa na.

²⁴ Andza mba ka sawa na, Zaŋ ka tələkey mey ba, ta me dzuhəɓey vaw a yam, ma mbəɗadata mendzey ma səkway ma Israyel tabiyaha.

²⁵ Arka andza mazlambar a da husada ha mendzey ŋga na, ŋga me ləvey: ‹Ka kuray ekəɗey ɗagay yah ana na way? Yah na Ndaw aŋga na kakay, amana, ndaw ana a sawa ha da dəba ɗaw, yah ɗa ndaw aha ma pəsəkey ledze ma tahərak aŋga kakay.›

²⁶ Malam a ɗaw hay, kuray ka kam na bəzey ma hwaɗ ma Abraham hay, dakay ma ndaw da walaŋ a kwar ma wasam ta Bay ma Bəla na hay na, a sləradəmərawa guma me me buwey a neney na a lakwa.

²⁷ Ndaw ma Zeruzalem hay ta bay ta hay ka wuɗam ma səradama Yezu tikay, da ma dzuwama ta na, a da ndaslam na ma guma ma ndaw sek hay, na ma dzaŋgama ka pas ka pas, ta pas ma mesley ana.

²⁸ Mandzara taya ka ndzafafama bəzay ma guma na ma dzuwa, ka da kəɗama vagay aha na na, taya ma tsəhafama ka Pilat ma ka zəɗadara 'ar ba.

²⁹ Andza ka ndasladama tek na ma windəmawa ka ŋga na tsoy na, taya ma harɗadəmərawa ba ka 'ar ma tuwaw, ma padama a tsəvay.

³⁰ Ama Bay ma Bəla na, ka mbəladərawa ba da walaŋ ma ndaw ma mətsa na hay.

³¹ Arka ŋga ma ɓatar vaw da meney gəle gəle haɗadzidzay a ndaw na ma tsələmaɓa da Galiley a Zeruzalem dzaya na hay, ekəɗey taya na, ka təram ba ndaw seydewe ŋga hay ka slam dey ma səkway.

³² La ekəɗey tiyatsa na, la tələkadəmakwar mey ta mey a neney Hayna Wayna, ta guma na ma tsəmatərawa kava na a baba tete hay ana.

³³ Bay ma Bəla na ka ndaslada ba kassla hərway lakwa wawa ta na hay, andza ma ŋga ma mbəladərawa Yezu, andza na ma winda ha da ɗeriwel ma Pəsom ma tsetsew ana: ‹Kah na bəzey ɗaw, yah teseɗey na, i ka yadəkawa ba.›

³⁴ Bay ma Bəla ma mbəladərawa ba da walaŋ ma ndaw ma mətsa na hay, a da mey aha vaw ma da zey sakay, andza ma ŋga me tsawa na: ‹I da vəlakwar tek na kokwoɗ ana hay, na ɗerre dərka na ma David.›

³⁵ A tsey da bəzay ma guma mekelehe andza neney sa na hərwuiya: ‹Ka da mbəkada ha ndaw eɗek kokwoɗ ana, ka sərada mezey kakay.›

³⁶ Arka David, a dəba ma ma kadara mber ma Bay ma Bəla, andza ma ŋga me wuɗey ana ba na, ma mətsey ŋga, ma padama a tsəvay ka slam ma baba tete ŋga hay, ŋga ka sərada mezey ba.

³⁷ Ama Ndaw na Bay ma Bəla ma mbəladərawa na na, ka sərada mezey tikay.

³⁸ Hayna səradama tok malam a ɗaw hay, me tələkey mey ma sey yam ka meŋgəsey a sawa na, kuse ma ŋga, ta ma tərey dzerey a neney ana kuray ka ndzafəmawa da mewey ma Moyiz kakay ana,

³⁹ ma vəladatara a ndaw me pey 'ar ka ŋga na hay tabiyaha na Yezu.

⁴⁰ Wam daw ka vaw tok zləna, guma ma ndaw sek a neney me tsey ana, ka da husafukurawa zlay:

⁴¹ Nəkam dey, kuray a neney ndaw səkom ana hay, ka rəzlakwar na, zlaɗam 'ar! Ekəɗey kuray ta dey mba na, i da key tek ɗuhwa ha, tek ana na, kendzey haɗaw ndaw a təkəradəmakwar na, ka da təɓama ha kakay.»

⁴² Andza ma bawa ta na, ma kəmatar ambahw andza Pol ta Barnabas ka da madama guma na ta pas ma mesley mekelehe.

⁴³ Andza ndaw ana ma kusa na hay ma zlaɗam 'ar ba na, ndaw hay haɗadzidzay da walaŋ ma Zuif hay ta ndaw ma tələkam a səkway ma zuif hay ma nam dəba na hay na ma kəsadəmata andza Pol ta Barnabas. Da guma ta me tsey na, a həladəmatara bəzay ma taya ka wənəkam ka vaw ta hahaya ma Bay ma Bəla zlay.

Pol ta Barnabas a mbəɗam dey 'ar 'ay ndaw Zuif ahiya kakay ana hay

⁴⁴ Pas ma mesley mekelehe na, har a var a ndaw ma wuraw ana hay ka kusəmawa ba, ma da pey sləmay ka guma ma Bay'ərlam.

⁴⁵ Andza Zuif hay ma nəkadama ndaw hay ka kusəmawa ba haɗadzidzay na, a tsatar mevel kambəlaɓa, a mbəɗamar ka guma ma Pol na ta metseɗey aha.

⁴⁶ Andza Pol ta Barnabas ma sadama mevel ma ləvəmatar: «Akwa təɗe na, a da ɓadəmakwar guma ma Bay ma Bəla ka mey na a kuray, amana, kuray ka mbəɗamar dəba ba a guma na, kuray ka nəkafama ba ka vaw kwar haya hiya, ɗa me ndzefey mendzey me ndəvey kakay ana kakay sana, kəɗey na la mbəɗam dey tek ala a 'ay ndaw na Zuif ahiya kakay ana hay.

⁴⁷ Hərway slam har ma Bay’ərlam ma vəlandərawa na andza neney: ‹I ka padaka ba waw me nəkey dey ma ndaw ma dala hay, ma kah ka dada guma ma me buwey kasl ka halay ma dala tabiyaha.›»

⁴⁸ Andza ndaw Zuif ahiya kakay ana hay, ma tsənadama guma neney na, a datar 'ar, taya ma hasəkadəmara bəzay a guma ma Bay'ərlam. Mendzey ma ndaw ma vəla hiya ma mendzey me ndəvey kakay ana hay na, ma pam 'ar.

⁴⁹ Guma ma Bay'ərlam me pey mey tabiyaha da dala na.

⁵⁰ Ama Zuif hay na, ma həladəmatara bəzay a ŋgwas na slam ata me ndzey daha da walaŋ ma ndaw ma səka na hay, na ma namar dəba a Bay ma Bəla na hay, ya satsa na, ta ndaw ma fada ma wuraw hay, ma səpam ma zerey mey, ka kadəmata tatakway andza Pol ta Barnabas, ma harəmata ba da dala ta.

⁵¹ Taya tey na, ma bazləmama burhway ma wuraw ana ba, ka sek ata, ma dawam tek ata a Ikoniyum.

⁵² Gawla ma Yezu hay tey na, ma rəha hiya ta wuiya, ta Mesəfrey Kokwoɗ ana.