Mber 11 - MEY HAYNA WAYNA MA YEZU KRISTE MA MEVEY

Piyer a təkəradatara tek aŋga ma kawa na, a ndaw ma Egliz ma Zeruzalem hay

¹ Maslaŋ hay ta malam na ma ndza hiya da Zudey na hay, ma tsənadama waya ndaw ma dala na Zuif ahiya kakay ana hay, ka dzafama guma ma Bay ma Bəla ba tiyatsa.

² Andza Piyer me tsəley a Zeruzalem na, ma təram vaw andza ndaw ma sla kuɗey ana hay.

³ Taya ma ləvamar: «Kah na, kah ka fuləkwey ba, a 'ay ndaw ma sla kuɗey kakay ana, ma səram ɓa ana hay, kah ma zəmawa tek ta taya.»

⁴ Arka Piyer ma zlar a guma na zla da bəziya, ma ɓadatara ta tsəveɗ ta tsəveɗ.

⁵ «Andza i da wuraw ma Zopey, i ɗuley aha mey na, tek ana ma nəkaya a dey: tek ana ma hərɗawa da 'ərlam, a wey vaw kakay, tek ana andza petəle ɗuhwa ha, ma zəga ha da tsakay hay faɗ, ma hərɗawa da 'ərlam kasl ka tsakay ɗaw.

⁶ I ma zazura, i ma nəkada gənaw ma dala na ta sek faɗ ana hay, gənaw ma ley hay, na ma vey ta hwaɗ ana hay ta na ma tsəvey ta 'ərlam ana hay.

⁷ Arka i ma tsənada vəɗe ma ɗay, ma ləvaya: ‹Arka Piyer, kəɗey na, pəɗey!›

⁸ I me mbəɗey kava: ‹Bay’ərlam a ɗaw, ɗaɗa a key vaw kakay zləna, hərway da mendzey ɗaw na, i ka zəmey tek me key tsatsaŋ aha dakay na tek me zləɓey ndaw ana kakay.›

⁹ Dey ma tsetsew ana, vəɗe ma ɗay ana ma tsənawa da 'ərlam ana sa: ‹Tek na Bay ma Bəla ma nəkafa andza ma bazləma ha na na, kah na ka da ləvafa a key tsatsaŋ zlay!›

¹⁰ Ma mada andza ha dey makar, a dəba na na, tek a hana, ma mey təŋga a 'ərlam tabiyaha.

¹¹ Arka ka slam ana tsana, ndaw hay makar ma husəmaɓa a 'ay na, la da huɗa na; a sləradəmatəraɓa na da Sezarey, ka tsakay ɗaw.

¹² Arka Mesəfrey Kokwoɗ ana ma ləvaya la ka dawam dzaya, ka da kaya da 'ar zlay. Malam a neney mukwa na hay ma kəsadəmaya. Arka la ma fuləkwam a 'ay ma ndaw ana ma tsəhaya na.

¹³ Ŋga ma təkəradandar andza ma ŋga ma nəkada madurlam da 'ay ŋga, ma ləvar ana: ‹Slərey ndaw a Zopey, ka da zələmərawa Simoŋ na ma zəlamar Piyer ana.

¹⁴ A da ɓadaka tek na ma kawa na hay, ma da buwaka, ta ndaw ma 'ay ɗek ana hay dzay.›

¹⁵ Andza i ma zlar ba me tsey guma tsa na, Mesəfrey Kokwoɗ ana ma hərɗafatərawa andza na ŋgalakwa da me zley ana.

¹⁶ Arka na i ma sərafa ka guma ma Bay’ərlam a neney me tsey ana, me ləvey: ‹Zaŋ a vəley ma dzuhəɓey da yam ana, ama kuray na, ka da ndzafam na ma dzuhəɓey na da Mesəfrey Kokwoɗ ana.›

¹⁷ Haɗaw Bay ma Bəla ma katar hahaya a ndaw a neney hay, hərway taya ma pam 'ar ka Bay’ərlam Yezu Kriste andza na ŋga lakwa na, yah ana na, ɗa ndaw aha ma təka Bay ma Bəla ba, me key mber aŋga ɗaw?»

¹⁸ A dəba ma guma ŋga neney na, ndaw ma pafama sləmay ana hay ma ndzam tete, arka na, ma səmbərama Bay ma Bəla: «Nəkafama Bay ma Bəla ka vəlatərawa me mbəɗey mendzey ba a ndaw ma dala na Zuif ahiya kakay ana hay, ma da kəsadata a mendzey hayna.»

Egliz ma Antiyos

¹⁹ Arka ndaw ma zlaɗam 'ar ana hay da har ma kadəmata tatakway, ma kəɗama Etiyen ana na, ma husam kasl a Fenisi, a Sipre ta Antiyos, ka ɓam Mey Hayna Wayna a ndaw hay mekele hiya kakay, sey a Zuif hay dada.

²⁰ Ama tok na, sa ma ndaw hay da walaŋ ata na, ndaw ma Sipre ta ndaw ma Sireŋ hay, ma husam a Antiyos, taya ma ɓadəmatara Mey Hayna Wayna ma Bay’ərlam Yezu a Grek hay tiyatsa.

²¹ Bay’ərlam ma vəlatar gədaŋ ta har aŋga, ha me mbəsley ma ndaw ma mbəɗam dey ka Bay’ərlam ana hay, ma təram ndaw ma pa 'ar ahiya na ma kam haɗadzidzay.

²² Tek ana me key ana hay me husey a veɗ sləmay ma ndaw ma Egliz ma Zeruzalem hay, arka taya ma sləram Barnabas a Antiyos.

²³ Andza ŋga ma nəkada hahaya ma Bay ma Bəla, a key aha mber da huɗa na, a mbafa bəza kakay, ŋga ma həladatara bəzay ma ka zəgam har ka Bay’ərlam na, ta mevel ata dzay.

²⁴ Ŋga na na, ŋga ndaw dzerey aha, ma rəha vaw aha ta Mesəfrey Kokwoɗ ana, ta me pey 'ar. Ndaw ma kusa hiya haɗadzidzay ma səpamar bəzay a Bay’ərlam.

²⁵ Arka Barnabas ma daway a Tars, ma da səpərawa Sol,

²⁶ ŋga ma ndzafa da huɗa, ma ŋgələrawa a Antiyos. Taya ma vam teŋ, ma kam mber tsetsuwe da Egliz ana ŋga na, ma tatəkadəmata ndaw ma kusa hiya haɗadzidzay. A zlamar ma zələmata gawla ma Yezu hay «Kretieŋ hay» tsəfəmey ana na, da Antiyos ana.

Zeheɗ ma me dzəney vaw

²⁷ Da varay ana ŋga na na, ndaw sek hay da Zeruzalem ma hərɗam a Antiyos.

²⁸ Ndaw pal da walaŋ ata a zəlamar Agabus, ta gədaŋ ma Mesəfrey kokwoɗ ana, ma ɓadatara waya may a da sawa ka bəla tabiyaha, a da key na da har ma Klod ŋga da bay.

²⁹ Arka gawla ma Yezu hay ma dzalam 'ar, ma tsakalam tek paɗ ka gədaŋ ma ndaw me vəley, ma sləradəmatara a malam hay da Zudey.

³⁰ Arka na, ma kama andza ha dərka, a slərdəmatara a ndaw ma səka na hay, ta har ma ndza Barnabas ta Sol.