Mber 1 - MEY HAYNA WAYNA MA YEZU KRISTE MA MEVEY

Luk a ɓada ɗeriwel aŋga

¹ Teofil, i ma windəkaɓa ɗeriwel a ɗaw tsəfəmey ana na, ma vəla ha kərem ma tek ma Yezu ma kawa tabiyaha na, ta na ŋga ma tatəkadatərawa a ndaw hay zle da mezley ana,

² kasl ka har aŋga me tsəley a 'ərlam. Amba ŋga ka tsəley a 'ərlam na, ŋga ma vəlatar me tetəkey ŋga hay a maslaŋ na ŋga ma walata na hay, ta gədaŋ ma Mesəfrey Kokwoɗ ana.

³ A dəba ma memətsey ŋga na, Yezu a ɓatar vaw ŋga ta dey na, a taya. Ta ndaraw gəle gəle na, ma ɓadatara vaw, ŋga daha ta dey dərka na. Da meney kokurow faɗ na, a ɓatar vaw, a tsatar ka Slala ma Bay'ərlam.

⁴ Da har ana daha a zəmam aha tek dzaya na, ŋga ma ləvatar mewey a neney: «Ka da dawam da Zeruzalem tsaray zlay. Amana, hutama tek ma Baba me ləvey a da vəlakwar ana ba ɗagay, na ŋga na, i ma tsəkurawa kava na kuray ma tsənadama da huɗa mey ɗaw ana:

⁵ Zaŋ na, a dzuhəɓey ndaw na, a yam dada, ama kuray na, da meney nekəɗey na, a da dzuhəɓadəmakwar na, a Mesəfrey Kokwoɗ ana.»

Yezu a tsəley a 'ərlam

⁶ Maslaŋ hay ma tsəha 'ar aya, arka ma tsəhafama bəzay ma guma neney: «Bay’ərlam Yezu, ekəɗey na har eɗek ma da ləmada Slala ma Israyel ka slam a ŋga, ka slawa ba tsoy tok ɗaw?»

⁷ Ŋga ma ləvatar: «Pas ana ta har ana na, mey kwar ma sərada kava dakay, tek ma Baba ma pərawa ta har ma Bay ŋga na;

⁸ ama ka da ndzafa ma slafa, ma slafa ma Mesəfrey Kokwoɗ ana, a da sawa ka kuray ana; ka da təram ndaw seydewe ɗaw ahiya da Zeruzalem, da dala ma Zudey tabiyaha, da Samari, ha kasl ka halay ma dala.»

⁹ A dəba ma guma neney na, ŋga ma tsekefey a 'ərlam ma dey ta na, arka pazlay ma sawa ma səhəta ka slam dey ta.

¹⁰ Andza a ndazlam aha dey a 'ərlam ka slam ma Yezu ma ndermeɗey ana mba na, a da sərafama na ndaw hay tsew ta zana babara hiya ka vaw ka tsakay ta.

¹¹ Arka taya ma ləvəmatar: «Ndaw ma Galiley eɗey hay, ka ndzam re ma zezərey dey a 'ərlam na ka mey? Yezu a neney, ma tsakafafemakwar ba a 'ərlam ana na, a da sawa na andza ma ŋga neney, kuray ma nəkadama a tsekefey aha a 'ərlam ana.»

Maslaŋ ma Yezu hay

¹² Andza taya ma mbəkadəmərawa bezey mamba na, ma zəlamar mamba ma Tetəɗez ana ba na, taya ma mam a Zeruzalem. Mabaŋ ma mamba na ta Zeruzalem na, diday ma meheley ta pas ma mesley.

¹³ Ma mawa ta ba na, taya ma tsəlam a 'ay ta kete na, tsaŋ da 'ərlam ana. Daha ka slam ana na: Piyer, Zaŋ, Zak ta Andrey, Filip ta Tomas, Bartelemi ta Matiyew, Zak bəzey ma Alfey, Simoŋ ndaw ma dziŋgrey ka dala ŋga na, ka zəgawa Zud bəzey ma Zak.

¹⁴ Tobiyaha ma dzəma mey aya asləta, a ɗulam mey zarra andza ŋgwas hay daha nekəɗey, andza Mariya maya ma Yezu, arka ka zəgawa malam ma Yezu ana hay.

Matiyas ma padama a veɗ ma Zudas

¹⁵ Da meney ana ŋga na hay na, ndaw me pey 'ar ana hay ma tsəha 'ar ahiya, a key ndaw temere ta kokurow tsew. Piyer me lətsey da walaŋ ma malam hay, me ləvey:

¹⁶ «Malam a ɗaw hay, hayna ka ndesley andza Mesəfrey Kokwaɗ ana da Mewindey Kokwaɗ ana ma tsərawa ta huɗa mey ma David kavəday ma Zudas me tərey ndaw ma kəley ka mey ma ndaw ma da zəgama Yezu ana hay.

¹⁷ Akwa ŋga na, ma mbəsla ha na, da dey lakwa, ŋga na ka ndzefey ma ŋga tsoy da mbera lakwa na.

¹⁸ Arka tok na, ndaw aŋga na na, ta sumkwo ma meŋgəsey ŋga na na, ŋga ma haɗəkada ley; ŋga ma təɗey da ley ana, ma nduhwey patsakay, tek ma hwaɗ aŋga hay tabiyaha ma vam.

¹⁹ Ndaw ma Zeruzalem hay tabiyaha ka sərafama ba, arka satsa na a da zəlamar a ley ana ta mey ma ŋgwa ta «Hakəldama» ka ləva na Ley ma mambaz na hərwuiya.

²⁰ Hərway ma winda ha ba da ɗeriwel ma Pəsom hay andza neney: «Ideŋ aŋga na ka da ndzey baŋgway aha, ɗaɗa ndaw ka da ndzey a huɗa zlay.» Arka ma winda ha satsa: «Ndaw mekelehe ka ndzey a veɗ aŋga na.»

²¹ Ndaw ana lakwa dzaya, ma səpəmandukurawa bəzay zla Bay’ərlam Yezu a kəlandakwar aha ka mey mba, lakwa dzaya na,

²² me zley zla ka medzuhəɓey ma Zaŋ kasl ka pas ma tsakafafəmandakwar ba na: hayna ndaw asləta da walaŋ ata ka tərey ndaw seydewe ma ma mbəlawa ŋga, a dey lakwa.»

²³ Ma ɓəmatar ndaw hay tsew: andza Zozef, na ma zəlama Barsabas, ma pafama mezəley Zustus ana, ta Matiyas.

²⁴ Arka ma ɗulam mey andza neney: «Bay’ərlam, kah na, ka səradata mevel ma ndaw hay tabiyaha sana, ɓawa ndaw ana, kah mazəgey da walaŋ ata tsew ana,

²⁵ ma da key mber ma maslaŋ a veɗ ma Zudas ma mbəkada ba, madaway təŋga a slam aŋga na.»

²⁶ Ma kama tsa tsa ha, a da təɗey na ka Matiyas, arka zla ta pas ana ŋga na na, Matiyas me dzəmey a dey ma maslaŋ kurow kava kasləta na hay.