Matiyew 9 - MEY HAYNA WAYNA MA YEZU KRISTE MA MEVEY

Yezu a ndeley ndaw ma mbara vaw aha

¹ Yezu me tsəley a kombiwal tok na, ma tasawa ta ’ar ma bəlay ma sawa a wuraw aŋga.

² Arka ma zəgəmərawa ndaw ana daha ma mbara vaw aha, ta merdek aha. Andza Yezu ma nəkada me pey 'ar ata na na, ŋga ma ləvar a ndaw a hana ma mbara vaw ana: «Tete dem a ɗaw, meŋgəsey ɗek hay ma sa yam ahiya ba.»

³ Azlakwa ka slam ana na, ndaw me sesəkey Mewey hay daha nekəɗey, taya ma ləvam ka 'ar vaw ta na: «Ndaw a neney a key na, a tseɗey Bay'ərlam!»

⁴ Andza Yezu ma sərada me dzeley 'ar ata na, ma ləvatar: «Ɗagay ka dzalam tek haya kakay ana hay da mevel a kwar na, ka mey?

⁵ Ger aha da huɗa na, na waray? Me ləvey: ‹meŋgəsey ɗek hay ma sa yam ahiya ba na tsukuɗu›, mala me ləvey: ‹lətsey heley ana ɗaw›?

⁶ Ekəɗey na, ha səradama Bəzey ma Ndaw na, slam har aŋga daha ma sey yam ka meŋgəsey ma ndaw hay ka dala. Arka ŋga ma ləvar a ndaw a hana ma mbara vaw ana: Lətsey, zəga merdek eɗek, daway a mbaw.»

⁷ Arka ndaw ana me lətsey ma daway a mbaw ŋga.

⁸ Andza ma ndaw ana ma kusa na hay ma nəkadama tek a neney na, ma wasam ka vaw. Arka taya ma hasəkadəmara bəzay a Bay ma Bəla ma vəlatərawa slam har andza neney ana a ndaw hay.

Yezu a zəley Matiyew

⁹ Andza Yezu a daw aha təŋga na, ŋga ma nəkada ndaw ana daha, a zəlamar Matiyew, ma ndzaha da biraw me tsekeley dzaŋgal. Ŋga ma ləvar: «Səpaya bəzay.» Matiyew me lətsey ma səpar bəzay.

¹⁰ Arka andza Yezu a zəmam aha tek da 'ay Matiyew ana na, a da key na, ndaw me tsekeley dzaŋgal hay haɗadzidzay, ta ndaw ma ŋgəsa na hay, ta gawla ŋga hay a zəmam aha tek ka maslətaha.

¹¹ Taya ma nəkadama andza ha na, Fariziyeŋ hay ma ləvəmatar a gawla ma Yezu hay: «Ɗagay miter a kwar a zəmam tek ka maslətaha andza ndaw me tsekeley dzaŋgal hay, ta ndaw ma ŋgəsa na hay na, ka mey?»

¹² Ama andza Yezu ma tsənada na, ma ləvatar: «Me səpey ndaw ma sidem na, ndaw dzedzey ana hay zləna, ndaw zozoy ana hay kakay.

¹³ Dawam da tatəkadama guma neney da Mewindey Kokwoɗ ana hay: ‹I wuɗey na ndaw me key da vaw a ndaw zləna, kuley kwar ma kəmaya na kakay›. Hərway i sawa na ma da zəley na ndaw ma ŋgəsa na hay zləna, ndaw dzerey ana hay kakay.»

Yezu a mbəɗafa ka guma ma sumaya

¹⁴ Arka gawla ma Zaŋ Batist hay ma guram ka tsakay ma Yezu, ma ləvamar: «Azlakwa la andza Fariziyeŋ hay la kam sumaya, ɗagay gawla ɗek hay a kam tikay na, ka mey?»

¹⁵ Yezu ma ləvatar: «Da magurlam me zəgey kokwa na, zel ma kokwa na ŋga daha ka tsakay ta na na, ndaw ma wuna na hay a slafama me ndzey andza da 'ay vagay ɗaw? Ama har ana aza ka da slawa ba na, ka da zəgafəmata zel ma kokwa na ba tok na, azambay a da kam sumaya tok.

¹⁶ Ɗaɗa ndaw ka tepey zana wayna ka na guram ana ba ɗaw? A tapam kakay zləna, na wayna a ndəɗa na gurma na na, meŋgerɗey ana a səkey adiya kakay ɗaw?

¹⁷ Ɗaɗa ka mbəɗam zom lelem ana a kulom madzahway aha ɗaw? Haɗaw ka mbəɗam ba na, kendzey andza zom a mbəsley aha na, a nɗuhwada kulom ana ba. Arka na masaka ma kulom, ta zom ana adzay. Dzadzak na a mbəɗam zom lelem ana na, a kulom wayna hay, arka na, kulom ta zom adzay taya daha.»

Yezu a ndalada ŋgwas, ta ma mbəladərawa dem ana daha

¹⁸ Andza Yezu a tsatar aha guma mba na, arka ndaw ma fada ma bay ana daha, ma gurafa. Ma nar dəba, ma ləvar: «Dem a ɗaw ka mətsey ba ekəɗey ana, ama sawa bazləhafa har na, aza ka səfrey»

¹⁹ Arka Yezu me lətsey, ma səpama andza gawla ŋga hay.

²⁰ Ama ŋgwas ana daha a sey aha banay ta ma guvawa mambaz a key mevey kurow kava tsew, ma gurafərawa ka Yezu ta dəba, ma ləmar a mey ma zana ŋga na.

²¹ Ŋga me ləvey ka 'ar vaw ŋga na: «Haɗaw i husey ba ma ləmar a zana ŋga na tsana, i da ndeley aha ba.»

²² Ama Yezu me mbəɗey dey, ma nəkada, me ləvey: «Tete dem a ɗaw, me pey 'ar eɗek ka buwaka ba.» Deŋe ka slam ana hana tsana, ŋgwas ana me ndeley.

²³ Ma husey ŋga ba 'ay ndaw ma fada na na, ma nəkadata ndaw hay a fam aha fagwom ta mekəsuwey ma ndaw ma kusa ahiya na na, Yezu me ləvey:

²⁴ «Kadama vaw ba: ma mətsa ha kakay, dem ana ma nara ha» Taya ma saŋgərafama dəla da 'ar.

²⁵ Andza ŋga ma badatərawa ndaw ana ma kusa na hay ba a bəla na, ŋga me fuləkwey, ma zəga dem ana da har, arka dem ana me pərkey.

²⁶ Arka mey ana me pey mey da dala na tabiya ha.

Yezu me ndeley ndaw wulaf hay tsew

²⁷ Andza Yezu a daway aha təŋga na, wulaf hay daha tsew ma səpama, ta me wudey aha: «La ka kəmaka da vaw tey, Bəzey ma David!»

²⁸ Andza ŋga me fuləkwey a ’ay na, wulaf ana hana hay ma gurafama. Arka Yezu ma ləvatar: «Kuray ma dzalama na, i slafa ma ndaladakwar ɗaw?» Taya ma mbəɗamar kava: «Ayaw, Bay’ərlam.»

²⁹ Arka ŋga ma ləmatar a dey ta na, ta me ləvey aha: «Ka key andza ma me pey 'ar a kwar ana.»

³⁰ Arka dey ta hay ma wuram. A dəba na na, Yezu ma katar say: «Wam daw ka vaw, kwa ndaw ka da sərafa zlay!»

³¹ Ama taya na, andza ma bawa ta ba tsana, ma tsam ka ŋga da dala na tabiya ha.

Yezu me ndeley ndaw mandak aha

³² Andza ma bawa ta ba na, ma sadəmarawa ndaw ana daha ta fakalaw aha da 'ar, a tsey guma kakay.

³³ Andza ma harama fakalaw ana ba na, ndaw ana me weley mey kakay ana, ma zlar me tsey guma. A rəzlata ndaw ana ma kusa na hay kambəlaɓa, ha taya ma ləvam: «Ɗaɗa ndaw ka nəkada tek ana andza neney da Israyel dakay!»

³⁴ Ama Fariziyeŋ hay ma ləvam: «A ɓəlata fakalaw ana hay na, ta gədaŋ ma bay ma fakalaw ana hay.»

Ndaw ana ma kusa na hay a kamar da vaw a Yezu

³⁵ Yezu ma halata wuraw ɗuhwa na hay, ta na bəza na hay tabiyaha, a tatəkadata ndaw hay da 'ay me ɗuley mey ta hay. A tələkada mey ta Mey Hayna Wayna ma Slala ma 'ərlam. A ndaladata ndaw dzedzey ana hay, ta ndaw ma təra na hay tabiyaha.

³⁶ Andza ŋga ma nəkadata ndaw hay ma kusa hiya na, a kamar da vaw, hərway ma ndza hiya, ma ya vaw ahiya, ma dawara hiya andza təɓaŋ hay mandzara ndaw me tsukurey ta na.

³⁷ Arka ŋga ma ləvatar a gawla ŋga hay: «Tek ka həvey ba kəras kəras, amana ndaw ma mber ana hay na a hətsam;

³⁸ ɗulamar mey a bay ma ley ana tok na, ka slərawa ndaw ma mber hay, ma da ɓətsadatara 'ar ta tek ana hay.»