Matiyew 20 - MEY HAYNA WAYNA MA YEZU KRISTE MA MEVEY

Bəzay ma guma ma bay me həley ndaw hay a ley

¹ «Akwa ma malada ma Slala ma 'ərlam na, andza ma bay ana daha, ma bawa da 'ay ŋga ma pərek, ma da həley ndaw hay 'ay dzerne ŋga.

² Taya ma dazlama ta ndaw ma mber ana hay na, ka sulay gabal kasl ka pas me təɗey; ma sləradata 'ay dzerne ana tok.

³ Ma ndzemdey tsəfaɗ ma pərek na, bay a hana ma bawa da 'ay, ma nəkadata ndaw hay ma ndza hiya ka slam ana daha, mber a rafata dakay.

⁴ Arka ŋga ma ləvatar: ‹Dawam da kam mber da 'ay dzerne ɗaw ana tiyatsa kwa, aza i vəlakwar sumkwo na kava kassla.›

⁵ Arka taya na ma dawam. Bay ana hana ma bawa da 'ay sa ma rəpas, arka ma ndzemdey makar ma hakwaɗ na, me həley ndaw a hay satsa.

⁶ Ma bawa ma ndzemdey zlam ma hakwaɗ satsa na, me ndzefey ndaw hay mandza hiya, ma ləvatar: ‹Ka ndzam tedehe hwoy pas aha na, ka mey?›

⁷ Taya ma mbəɗamar kava: ‹Hərway ndaw ka zəlandar ka mber dakay›. Arka ŋga ma ləvatar: ‹Dawam 'ay dzerne ɗaw ana tiyatsa kwa›.

⁸ Arka ma dey me zəgey na, bay ma ley ana ma ləvar a gawla ma 'ay ŋga: ‹Zəlatərawa ndaw ma mber hay, vəladatara sulay ta, zlar ka mey na ta ndaw madakwaydok ana hay, ma da ndakada ta ndaw tsəfəmey ana hay.›

⁹ Arka ndaw ma ndzemdey zlam ana hay ma dawam, ma təɓam gabal gabal.

¹⁰ Arka ka husey ka ndaw tsəfəmey ana hay tok na, ka taya na a dzalam waya, ‹la da ndzafam na a fəna ma ta.› Ama tok na, ma ndzafam na ka ndaw na gabal gabal ana, tiyatsa.

¹¹ Andza a təɓama ha na, ma gwaŋguɗam mey ka bay ma 'ay ana.

¹² Taya ma ləvam: ‹Ka maladandar ta ndaw a neney dok ana hay na, taya na ma kam mber na ma ndzemdey asləta dada seŋgey. La na, la ma kam mber hwoy pas, ha pas ma təlandar tok na.›

¹³ Ama ŋga ma mbəɗafara kava a ndaw asləta da walaŋ ata ana: ‹Dzam a ɗaw, malay ɗaw dakay zləna, i tsama hana na ma pərek na, ka sulay gabal ana seŋgey.

¹⁴ Ekəɗey təɓa tek ma merɓey ɗek na, daway tek eɗek. I wuɗey ma vəlar a ndaw a neney madakwaydok ana na, andza na ŋgeɗek.

¹⁵ I slafa ma kada ta zleley ɗaw andza na ŋga ɗaw me wuɗey kakay ɗaw? Tsukuɗu ka naya dey na, ma vəday yah kokwoɗ aha ɗaw?›

¹⁶ Andza neney tok na, ndaw madakwaydok ana hay na, a da təram ndaw tsəfəmey ahiya. Yaw ndaw tsəfəmey ana hay tey na, a da təram ndaw madakwaydok ahiya.»

Yezu a ɓada me mətsey ta ma mbəlawa ŋga dey ma makar ana

¹⁷ Andza Yezu a tsəley aha a Zeruzalem na, ŋga me ŋgəley ka bəzay na, gawla ŋga kurow kava tsew ana hay dada. Paɗ tsakay tsəveɗ na, ma ləvatar:

¹⁸ «Ekəɗey la tsəlakwama ha a Zeruzalem, a da gərafama har ka Bəzey ma Ndaw a har ma baba ɗuhwa na me key kuley ana hay, ta ndaw me sesəkey Mewey hay. A da dzuwama na a mətsey.

¹⁹ A da mbəkafama har a har ma ndaw Zuif ahiya kakay ana hay, ma ka saŋgərafama, ma ka kəɗama ta lagwada, ma ka darama ka 'ar ma tuwaw ma gəzləla ha. Ama da meney ma makar ana na, a da mbəlawa.»

Maya mandza Zaŋ ta Zak a tsəhatar slam hayna a wawa ŋga hay

²⁰ Arka maya ma bəzey ma Zebedey hay, ma gurafa ka Yezu ta wawa ŋga hay, ma gərdey, ma tsəhafa tek.

²¹ Yezu ma ləvar: «Ka wuɗey mey?» Ŋgwas aha na ma ləvar: «Vəley slam har ma wawa ɗaw neney hay tsew ana, ka da ndzam da Slala ɗek, naŋgar ta har zəmay ɗek, naŋgar ta har gula ɗek tey.»

²² Yezu me mbəɗey kava: «Ka səradama tek a kwar ana ma tsəham kakay. Ka slafama ma da sey vəliyem ma tsetseh ana, i ma da sey ana ɗaw?» Ma ləvamar: «La slafama.»

²³ Yezu na ma mbəɗafatara kava tok: «Ayaw, ka slafama ma da sey vəliyem a ɗaw, ama, ka ma da ndzey ta har zəmay ɗaw, ta har gula ɗaw na, slam har a ɗaw ma da vəlada dakay, a da vəladəmatara, a ndaw na Baba ɗaw ma ləmadatara aha ka vaw ana hay.»

²⁴ Andza sa ma gawla ŋga kurow ana hay ma tsənadama ŋgey, ma tərəmatar a ndaw a hay tsew ta malam aŋga na.

²⁵ Ama Yezu ma zəlata, arka ma ləvatar: «Ka səradama ha bay ma dala hay na, a wumata ndaw hay na ta mazlaɓ ata, arka ndaw ɗuhwa na hay tey na a kərəmata.

²⁶ Ama ma kwar na andza ha tikay; ta meterŋgəleŋ, haɗaw ndaw ana a wuɗey me tərey ɗuhwa ha da walaŋ a kwar na, ka tərey gawla ma 'ay kwar aha.

²⁷ Ndaw ana a wuɗey me tərey ndaw tsəfəmey ana da walaŋ a kwar na, ka tərada vaw ŋga beke kwar aha.

²⁸ Kwa Bəzey ma Ndaw ana tekeɗe a sawa na, ma ndaw hay ka da kamar meslərey ka har kakay, amana, me key meslərey, ma da vəlada mendzey ŋga ma da mbəɗadatərawa ndaw hay haɗadzidzay.»

Yezu a ndeley wulaf hay tsew

²⁹ Andza ma bawa ta ba da Zeriko na, ndaw ma kusa hiya haɗadzidzay ma səpəmərawa.

³⁰ Arka wulaf ana hay daha tsew, ma ndza hiya ka tsakay tsəveɗ, ma tsənadama ma sawa na Yezu na, ma zlamar me wudey: «Bay’ərlam bəzey ma David, la ka kəmaka da vaw tey!»

³¹ Ndaw ma kusa hiya na hay ma kəmatar say, ma taya ka ndzam tete. Ama taya ma səkadama me wudey adiya ta gədaŋ: «Bay’ərlam bəzey ma David, la ka kəmaka da vaw tey!»

³² Arka Yezu me lətsey aha, ma zəlata, ma ləvatar: «A sakwar ekəɗey na, i ka kakwar na, mey?»

³³ Taya ma mbəɗamar kava: «Bay’ərlam, a sandar na, dey la hay ka wuram!»

³⁴ A kamar da vaw a Yezu, ma ləmatar a dey ta na hay. Arka tsana, dey ta hay ma wuram wunet, ma səpamar bəzay.