Matiyew 2 - MEY HAYNA WAYNA MA YEZU KRISTE MA MEVEY

Ndaw ma sərada me zazərey wurzla hay a səmawa ma da tsəraɓa guma a Yezu

¹ A yəmərawa Yezu da Betlehem ma Zudey, da har Erod ŋga bay ɗuhwa na. Nəkafama ndaw ma sərada me zazərey wurzla hay, ma səmawa da bəzay lam a Zeruzalem na,

² arka ma tsəham: «Bay ɗuhwa na ma zuif hay ma yəmərawa ekəɗey ana na, ŋga ka waray? La ma nəkadəmərawa wurzla ŋga na ma sləlawa da bəzay lam, la səmawa ma da gərdey ka mey dey ŋga.»

³ Ka mey a neney wayna na, bay ɗuhwa na Erod me dzəmey ka vaw, ta ndaw ma Zeruzalem ahiya dzay tabiyaha.

⁴ Ŋga ma kusata baba ɗuhwa na me key kuley ana hay tabiyaha, ta ndaw me sesəkey mewey ma səkway, ma tsəhafata slam ana ndaw ma vaha 'ar ana na, ma yaha na, ka waray?

⁵ Ma mbəɗafəmara kava: «Da Betlehem ma Zudey, hərway na ndaw sek ma windərawa na na:

⁶ ‹Kah Betlehem, dala ma Zuda, dey ta kava kah na wuraw bəzaha ma dala ma Zuda kakay, hərway bay a da bawa da kah, a da tsəkura Israyel, səkway ɗaw.›»

⁷ Arka Erod ma zəlata ndaw ma zazərey wurzla na hay ta masasuɗok aha, ma tsəhafata har ma wurzla na ma ɓatar vaw ana;

⁸ arka ma sləradata a Betlehem, ta ma ləvatar aha: «Dawam da tsəhəmərawa wawa na haya hayaha, kendzey aza kuray ka ndzafama ba na, aza ka ɓadəmaya tey, i daway i da gərdawa ka mey dey ŋga tiyatsa.»

⁹ Ka guma ma bay ɗuhwa ha na hana ma tsatar ana na, taya ma zəgam tsəveɗ; nəkafama wurzla ta hana na, ma nəkadəmərawa ma sləlawa na na, ma kəlatar ka mey, ma daway a da lətsey na, ka slam ma wawa na ŋga da huɗa na.

¹⁰ Andza ma nəkadama wurzla na na, a datar 'ar bəza kakay.

¹¹ Ma fuləkwam a 'ay ana, ma nəkadama wawa na, ta Mariya may ŋga, ma gərdam, ma namar dəba. Ma wurama akwetey ta hay, ma vəlamar tek ma hayaha: gura, tek me bəzləmey me zey hayna, kaw mal me fəɗey ka vaw.

¹² Arka, Bay'ərlam ma ɓadatara da dey mesəney ka da mam ta tsakay ma Erod sazlay. Ma dawam tek ata a dala ta, ta tsəveɗ mekelehe.

Zozef ta Mariya a hwadama Yezu a Ezipte

¹³ A dəba ma ma daw ta ba na, nəkafa madurlam ma Bay’ərlam ma ɓar vaw a Zozef da dey mesəney; ma ləvar: «Lətsey, zəga wawa na ta may ŋga, hwam a Ezipte. Ndzey da huɗa kasl ka pas a ɗaw ma da tsəkaɓa guma mekelehe, hərway Erod a da səpa wawa na, ma da kəɗa ba vagay aha.»

¹⁴ Zozef me lətsey, ma zəga wawa na ta may na, ma hwam tek ata ta dəvaɗ aha a Ezipte.

¹⁵ Ŋga ma ndzawa da huɗa, ha kasl ka memətsey ma Erod, ma aza ka ndesley andza na ma Bay’ərlam ma tsərawa ta huɗa mey ma ndaw sek ana: I zələrawa bəzey ɗaw na, da Ezipte.

Erod a bazlata wawa hay da Betlehem

¹⁶ Arka andza Erod ma nəkada ndaw ma zazərey wurzla a ŋga na hay ka pətənama ba na, mevel ma tsar kambəlaɓa, ŋga me slərey ka da sləmata wawa hay ba da Betlehem ta sa ma dala ŋga na sa na hay tabiya ha, mendzey ma wawa hay tabiya ha kasl ka mevey tsew, zla da har ma ndaw ma zazərey wurzla hay ma ɓadəmara na.

¹⁷ Kəɗey tok na, me ndesley na andza ma ndaw sek Zeremi ma tsərawa na:

¹⁸ «Vəɗe ma ɗay ma tsənawa da Rama, ma tuway ta sesermey aha zaɗaɗa: Rasel a tuway wawa ŋga hay, a bədey vaw kakay, hərway wawa ŋga hay dasakay.»

Ma mawa ta da Ezipte a Nazaret

¹⁹ A dəba ma memətsey ma Erod na, madurlam ma Bay’ərlam ma ɓar vaw a Zozef da dey mesəney da Ezipte.

²⁰ Ŋga ma ləvar: «Lətsey, zəga wawa na ta may ŋga, zəgey tsəveɗ me mey 'ar a dala ma Israyel, hərway ndaw ma səpam ma da kəɗa wawa na na, ka mətsam tsoy.»

²¹ Zozef me lətsey, ma zəga wawa na ta may ŋga me mey a dala ma Israyel.

²² Ama andza ŋga ma tsənada ba Arkelaws bay aha da Zudey da veɗ ma baba ŋga Erod na, ŋga me wesey ma daway a huɗa. Arka andza ma Bay'ərlam ma ɓadara da dey mesəney na, ŋga ma daway a dala ma Galiley

²³ arka ŋga ma sawa me ndzey da wuraw ana daha a zəlamar Nazaret; hərway aza ka ndesley andza ma ndaw sek me ləvawa na: A da zəlamar na ndaw Nazaret.