Matiyew 19 - MEY HAYNA WAYNA MA YEZU KRISTE MA MEVEY

Yezu me tsey ka me ɓəley ŋgwas

¹ Arka andza Yezu ma ndəvada me tetəkey a neney hay ba na, ŋga ma mbəkada Galiley, ma daw a dala ma Zudey, a diya ma wayaŋ ma Zurdeŋ.

² Ndaw ma kusa hiya haɗadzidzay ma səpamar bəzay, ka slam na na, ŋga ma ndaladata.

³ Fariziyeŋ hay ma guram ka tsakay ŋga. A wuɗam ma ŋgafama gendeɗ; ma ləvamar andza neney: «Mewey a vəley slam har daha me ɓəley ŋgwas ka guma waray waray ɗaw?»

⁴ Ŋga ma mbəɗatar kava: «Kuray ka dzaŋgama guma neney me ləvey: ‹Ɗa mezley na, Bay'ərlam a ləmatərawa mawal ta ŋgwas.› ana tikay ɗaw?

⁵ Arka me ləvey sa: hərway ma mey na, mawal a da mbəkadata baba ŋga ta may ŋga, ma da dzəmey vaw ta ŋgwas aŋga. Arka tsetsuwe tahiya na, a da təram vaw ma ndaw asləta.

⁶ Kəɗey na taya tsew sakay, amana, vaw ma ndaw asləta. Kəɗey na ndaw ka da wanəkadata tek ma Bay ma Bəla ma dzəmadata na hay zlay!»

⁷ Taya ma ləvamar: «Azlakwa Moyiz a ləvey ɗagay waya a sar a ndaw me ɓəley ŋgwas aŋga na, ka kar ɗeriwel me ɓəley vaw a har na, ka mey?»

⁸ Ŋga ma ləvatar: «Moyiz a vəlakwar tsəveɗ me ɓəley ŋgwas a kwar hay na, hərway mevel a kwar hay təɗa təɗa. Zləna, da mezley ana na, andza ha kakay.

⁹ I ləvakwar: Ndaw ma ɓəla ŋgwas aŋga, a zəgey mekelehe na, a key madama. A da key madama kakay na, sey a zəga ŋgwas ana na, mewey ka vəlar tsəveɗ kakay.»

¹⁰ Gawla ŋga hay ma ləvamar: «Haɗaw ma da ndzey ta ŋgwas andza ha na, ŋgama ndaw me zəgey ŋgwas ana zlay tabiyaha seŋgey.»

¹¹ Ŋga ma mbəɗatar kava: «Ndaw hay tabiyaha a tsənadama bəzay ma guma neney ana kakay seŋgey, amana sey na Bay'ərlam ma vəladatara na hay.

¹² Akwa sa na hay ma la hiya na zla da hwaɗ ma maya ta, Sa na hay ndaw hay ma ləmata ta ley. Sa na hay tey na, taya na ma tərada ma vaw ta andza ma laya kavəday ma Slala ma 'ərlam. Na ma tsənadama tata daha na, ka tsənada.»

Yezu ta bəza hay

¹³ Arka ndaw hay ma sadəmatərawa wawa hay ma Yezu ka bazləhafata har, ka ɗulafata mey. Ama gawla ŋga hay na, ma kəmatar say.

¹⁴ Arka Yezu me ləvey: «Mbəkadəmata wawa hay, ka təkəmata zlay, ka səmawa ka tsakay ɗaw, hərway Slala ma 'ərlam na, ma ndaw andza taya neney hay.»

¹⁵ A dəba ma bazləhafata har ba na, ŋga ma daw ba ka slam ana.

Yezu ta gawla ana daha zleley aha

¹⁶ Arka ndaw ana daha me gurey ka tsakay ma Yezu, ma ləvar: «Miter, i ka key na hahaya waray, ma da ndzafada mendzey me ndəvey kakay ana na?»

¹⁷ Yezu ma ləvar: «Ka tsəhafaya tek hayna hay na, ka mey? Ndaw hayna na, ŋga asləta. Haɗaw a saka me fuləkwey a mendzey na me ndəvey kakay ana na, tsənatar sləmay a mey ma mewey hay.»

¹⁸ Ndaw ana ma tsəhafa: «Mewey waray hay?» Yezu me mbəɗey kava: «Ka da kəɗey ndaw vagay aha zlay, ka da key madama zlay, ka da huley zlay, ka da key seydewe haya kakay ana zlay.

¹⁹ hasəkadatara bəzay a baba ɗek ta may ɗek. Arka madakwaydok ana tok na, wuɗa ndaw ka tsakay ɗek ana na, andza vaw ɗek ana.»

²⁰ Gawla a hana, ma ləvar: «Mewey eɗey hay tabiyaha na, i kakata ba; ma zafiyawa na na waray sa waray?»

²¹ Yezu ma ləvar: «Haɗaw a saka ha tərey kərem hayaha na, daway, haɗəkadata tek eɗek hay, vəladatara a ndaw mbarga na hay, ka da ndzefey zleley da 'ərlam. Arka tok na, sawa, səpaya bəzay!»

²² Ka guma neney na, gawla a hana, ma daw təŋga ta mevel aha, hərway ŋga zleley aha bəza kakay.

²³ Arka Yezu ma ləvatar a gawla ŋga hay: «I ɓadakwar dərka na, ma da fuləkwey ma ndaw zleley a Slala ma 'ərlam na, ta ger aha.

²⁴ Ayaw, i madakwar sa, ka ləvamar a zlegweme fuləkwey ta veɗ ma batal na, a fuləkwafa ba ka ndaw zleley me fuləkwey a Slala ma Bay'ərlam na.»

²⁵ Ka guma neney na, a rəzlata gawla ŋga hay bəza kakay. Taya na ma ləvam: «Haɗaw azlakwa andza ha na, a da buwam na way hay tok?»

²⁶ Ma zazərata na, Yezu ma ləvatar: «Ka ndaw hay na a key vaw kakay, ama ka Bay ma Bəla na, ta dəba har.»

²⁷ Arka Piyer me mbəɗey kava, me ləvey: «Kəɗey na, la ma mbəkadəmatərawa tek ala hay ba tabiyaha ma da səpaka bəzay. Ekəɗey ma da key la na teŋgey tey tok?»

²⁸ Yezu ma ləvatar «I ɓadakwar dərka na, ta pas ma tek hay tabiyaha ma da mbəɗam waya ahiya na, andza Bəzey ma Ndaw ka da ndzey tsoy ka koriwal ma maram aŋga na, kuray a neney ma səpəmaya bəzay ana hay na, ka da ndzam a koriwal ma bay hay kurow kava tsew tiyatsa, ma da kadatara sariya ma səkway ma bəzey ma Israyel kurow kava tsew ana hay.

²⁹ Kwa way way ma mbəkada 'ay ŋga hay, malam aŋga mawal ana, ta na diŋgwas ana hay, baba ŋga, may ŋga, wawa ŋga hay, dakay ley ŋga hay hərway ma mezəley ɗaw na, a da ndzefey haɗadzidzay afəna sa, a da ndzefey mendzey me ndəvey kakay ana.

³⁰ Ndaw tsəfəmey ana hay haɗadzidzay a da təram ndaw madakwaydok ana hay. Ndaw madakwaydok ana hay haɗadzidzay a da təram ndaw tsəfəmey ana hay.»