Matiyew 12 - MEY HAYNA WAYNA MA YEZU KRISTE MA MEVEY

Yezu a fənar 'ar a mesley

¹ Da har ana ŋga na ta pas ma mesley ana daha na, Yezu a tezlerey aha ta ley daw, may ma tsafata ka gawla ŋga hay, taya ma sarɓam 'ar ma daw ma pəɗam.

² Andza Fariziyeŋ hay ma nəkadəmata andza ha na, ma ləvamar a Yezu: «Nəkafa gawla ɗek hay a kam aha tek na ma kam ta pas ma mesley kakay ana.»

³ Ama Yezu ma mbəɗatar kava: «Kuray ka dzaŋgama tek ma David me key, ta ndaw aŋga hay, ta pas ana daha, may ma tsafata na, tikay ɗaw?

⁴ Ɗagay a da fuləkwey a 'Ay me key Kuley ma Bay ma Bəla na teŋgey? Ɗagay taya ma zəmama peŋ ma 'ar ma kuley ba na teŋgey? Akwa na, kwa ŋga na, kwa ndaw aŋga na hay na slam har ata me zəmey dakay, ama ma slafa me zəmey na sey baba me key kuley hay dada.

⁵ Dakay na, kuray ka dzaŋgama da ɗeriwel ma Mewey, ta pas ma mesley da 'Ay me key Kuley na, baba hay ma kam kuley na, akwa a ŋgəsadama mesley ba kakay ɗaw? Amana ka ŋgəsam kakay.

⁶ Ama i ɓadakwar ekəɗey, kasləna na, tek ma fənada 'Ay me key Kuley na daha.

⁷ Kendzey hana akwa kuray ka tsənadama bəzay ma guma neney ba na: I wuɗey na ndaw me key da vaw a ndaw ana zləna, kuley kakay, akwatay na kuray dzuwəmata ndaw a neney malay ta hay dakay ana kakay.

⁸ Hərway Bəzey ma Ndaw na, a war 'ar a mesley.»

Yezu a ndeley ndaw ma mbara har aha ta pas ma mesley

⁹ Da slam ana na, Yezu ma daway a 'ay me ɗuley mey ta, me fuləkwey.

¹⁰ Azlakwa da 'ay ana hana na, ndaw ma mbara har aha daha da huɗa. Taya ma tsəhafama: «Mewey lakwa a vəley tsəveɗ me ndeley ndaw ta pas ma mesley ɗaw?» A key na a səpafama na guma.

¹¹ Ama ŋga ma ləvatar: «Ndaw ana andza da walaŋ a kwar, təɓaŋ aŋga ndekelek asləta, ka kəley ba a tsəvay ta pas ma mesley na, a daway a badərawa a zəgərawa kakay na, way?

¹² Arka ndaw a fəna təɓaŋ na, a key dey nday? Kəɗey na slam har daha me key tek hayna ta pas ma mesley.»

¹³ Arka ŋga ma ləvar a ndaw ana hana na: «Marɗada har.» Ŋga ma marɗada tsana, har aŋga me ndeley, kal kal andza naŋgar.

¹⁴ Andza taya ma bəmawa ba na, Fariziyeŋ hay ma ŋgəlafama mawa, me səpey wewer ma da zəɗada.

Yezu na gawla ma 'ay Bay ma Bəla

¹⁵ Andza Yezu ma tsənada ba na, ŋga ma daw təŋga da huɗa. Ndaw hay haɗadzidzay ma səpamar bəzay, ŋga ma ndaladata tabiyaha.

¹⁶ Ŋga ma katar say haya hayaha, mala ka da ɓadama zlay.

¹⁷ Ma aza ka ndesley andza ma ndaw sek Ezayi ma tsərawa na:

¹⁸ Nəkafama ka gawla ma 'ay ɗaw i ma pada na. Ŋga Bəzey ma mey 'ərev aɗaw. Na i ma wala ma daya 'ar ana, i pada Mesəfrey ɗaw ka ŋga. A da ɓada sariya ma slam har, a ndaw ma dala hay tabiyaha.

¹⁹ A da səpey aha dzendzey tikay. A da wudey aha lamba ha kakay. A da tsənadama ha vəɗ ma ɗay ŋga ka slam me kusey kakay.

²⁰ Kwa zeleŋ ma dzaŋgwava ha na, a da pəslada ha kakay; kwa waw a zawa hwezeze na, a da mətsada ha tikay atsa, ha aza ka kəsada slam har a me zəgey ’ar ma sleɗ ba ɗagay.

²¹ Ka mezəley ŋga na ndaw ma dala hay a da pamar dey.

Yezu a ɓəley fakalaw hay

²² Arka ma sadəmərawa ndaw ana daha, ta fakalaw aha da 'ar, wulaf aha, a tsey guma kakay. Ŋga ma ndalada, a da key na ndaw ana hana me tsey guma kakay ana a tsey guma, a nəkada dey.

²³ Ndaw ma kusa hiya tabiya ha ma rəzla hiya, ma ləvam: «Ndaw a neney na bəzey ma David kakay ɗaw?»

²⁴ Ama andza Fariziyeŋ hay ma tsənadama andza ha na, ma ləvam: «Ndaw a neney a herey fakalaw hay na, ta gədaŋ ma Belzebul bay ma fakalaw hay.»

²⁵ Andza ŋga ma sərada medzeley 'ar ata na, Yezu ma ləvatar: «Slala waray waray ma tsa vaw ha ka 'ar vaw ta na na, a da tərey ideŋ aha. Wuraw ana, dakay veɗ 'ay ana, ma tsa vaw aha ka 'ar vaw ta na na, a da ndzey aha kakay.

²⁶ Haɗaw Sataŋ a hara Sataŋ tsəla ŋga ba na, na ŋga na na, ma tsa vaw aha ka 'ar vaw ŋga na: arka slala ŋga na, a da ndzey na, teŋgey?

²⁷ Azlakwa i herey fakalaw hay na, ta gədaŋ ma Belzebul na, gawla kwar hay a haram na, ta gədaŋ aŋgway tok? Kendzey andza ha na, ma da ka sariya kwar ana na, taya tok.

²⁸ Ama haɗaw i herey fakalaw hay na, ta gədaŋ ma Mesəfrey ma Bay ma Bəla na, na ŋga na na, sərafama Slala ma Bay'ərlam ka husafəkurawa tsoy.

²⁹ Dakay satsa na, ndaw ana ma slafa me fuləkwey a 'ay ma ndaw gədaŋ aha, ma da həlawa zleley ŋga na, mandzara ka dzuwada ndaw ana hana gədaŋ ana na, way? Arka tok na, azambay a həla zleley ana, da 'ay ŋga na tok.

³⁰ Haɗaw ndaw ana ŋga ta yah kakay na, ŋga ndaw dugwan a ɗaw. Ndaw ana ma dzənaya ma tsəhadara 'ar kakay na, a zlaɗada.

³¹ Nəkafama hərway i ɓadakwar na, mendzey ma meŋgəsey ta me tseɗey Bay'ərlam tabiyaha na, me sey yam a ŋga na daha ka ndaw hay, ama me tseɗey Mesəfrey Kokwoɗ ana na, me sey yam ŋga na, dakay.

³² Haɗaw ndaw a tseɗey Bəzey ma Ndaw na, na ŋga na na, a safama yam ba; ama, haɗaw a tsafa haykakay aha ka Mesəfrey Kokwoɗ ana na, na ŋga na na, a da safama ha yam kakay, kwa da bəla neney, kwa ka bela na ma da sawa ka mey ana.

A səradama vəɗe ma tek na ka bəzey ŋga na

³³ «Padakwa andza vəɗe ma tek ana, hayaha na, bəzey ŋga na hayaha tey; padakwa dzedzey aha na, bəzey ŋga na a da key dzedzey aha tey: hərway a səradama vəɗe ma tek na, ka bəzey ŋga na.

³⁴ Gwalay ma kutsesl a neney hay, ka da slafəmərawa ma tsawa guma hayaha na, ta waray? Kuray haya hiya kakay tabiyaha tok na. Hərway huɗa mey a tsey na, guma ma bawa da mevel ana.

³⁵ Ndaw hayaha na, da zleley ŋga hayna na, a bawa tek hayna hay. Ndaw haykakay ana tey na, da zleley ŋga haykakay ana tey na, a bawa tek haya kakay ana hay tey.

³⁶ Ekəɗey i ɓadakwar, ta pas ma sariya na, ndaw hay a da sərafəmata, ka guma ta ma nafam kakay taya ma tsəmawa na.

³⁷ Hərway ma da təradaka dzerey aha na guma ɗek ma tsawa na hay, ma da dzuwaka na guma ɗek ma tsawa na hay».

A tsəham zeheɗ ka Yezu

³⁸ Fariziyeŋ hay, ta ndaw me sesəkey Mewey hay nekəɗey, ma ləvamar a Yezu: «Miter, a sandar na, kandar zeheɗ, la ka nəkafama.»

³⁹ Yezu ma mbəɗatar kava: Ndaw ma bəla neney haykakay ana hay, ma kam madama na hay, ma tsəham zeheɗ ana! Akwa na, zeheɗ na, a da vəlamar aha mekelehe dakay, a dəba ma zeheɗ ma ndaw sek Zonas na.

⁴⁰ Hərway andza ma Zonas ma kawa dəvaɗ makar, rəpas makar da hwoɗ ma kəlef ɗuhwa na ma bəlay na, Bəzey ma Ndaw a da kawa dəvaɗ makar, rəpas makar da hwoɗ ma dala andza ha tiyatsa.

⁴¹ Ta pas ma sariya na, ndaw ma Niniv hay a da lətsafəmata ka ndaw ma bəla neney hay, a da dzuwəmata ta sariya, hərway taya na, ka mbəɗadama mendzey ta ba ka me tələkey mey ma Zonas. Ama ekəɗey na, ndaw ma fəna Zonas ka sləna na daha.

⁴² Ta pas ma sariya na, ŋgwas bay aha da Bəzay lam a da safatərawa ka ndaw ma bəla neney hay, a da dzuwata ta sariya, hərway ŋga na ka sawa ba zla da bəzay lam, ma da paɓa sləmay ka ma səra ’ar ma Salomoŋ. Ama ekəɗey ka sləna na, ndaw ma fəna Salomoŋ daha.

Ma mawa ma mesəfrey ma zləɓa na

⁴³ «Kendzey mesəfrey ma zləɓa na ka bawa ba da vaw ma ndaw na, a daw a heley so lamba ha da slam palah ana hay, me səpey slam me sesəkey vaw, amana ka ndzefey kakay.

⁴⁴ Arka a ləvey ka 'ar vaw aŋga na: ‹Ŋgama i mey tek a ɗaw a 'ay ɗaw aŋga na i ma bawa da huɗa na.› Andza ma mawa ŋga na, ka ndzefey ndaw da huɗa dakay, ma patsa ha, ma ləma ha təɗe təɗe.

⁴⁵ Arka a daway a ŋgəlawa mesəfrey mekele ahiya tsəla haya ahiya kakay a fənama ŋga sa. Ma fuləkwam, ma ndzam da huɗa. Arka na tek ma ndaw ana hana a zakafa a fəna na tsəfəmey ana. A da key andza ha satsa, ka ndaw ma bəla neney haya hiya kakay ana hay na.»

Ndaw ma veɗ 'ay ma 'ay Yezu dərka na hay

⁴⁶ Andza Yezu a tsatar aha guma a ndaw ana ma kusa na hay mba na, arka may ŋga, ta malam aŋga hay ma səmawa. Taya ma lətsəm aha da bəla, a wuɗam ma tsamar guma.

⁴⁷ Ndaw ma ləvar: «Nəkafa may ɗek ta malam eɗek hay taya da bəla, a səpam ma tsəmaka guma.»

⁴⁸ A ndaw a hana na, ma sawa ma tsar guma na na, Yezu ma mbəɗar kava: «Ɗagay may ɗaw na, way? Malam a ɗaw hay na, way hay.»

⁴⁹ Arka ŋga ma ɓafata har, ka gawla ŋga hay, me ləvey: «May ɗaw ta malam a ɗaw hay na, taya ekəɗey;

⁵⁰ kwa way way me key tek andza ma Baba ɗaw da 'ərlam me wuɗey ana, na ŋga na na malam a ɗaw, malam a ɗaw diŋgwas ana, may ɗaw na, ŋga tok.»