Matiyew 11 - MEY HAYNA WAYNA MA YEZU KRISTE MA MEVEY

Gawla ma Zaŋ Batist hay a tsəham guma ka Yezu

¹ Andza Yezu ma ndəvada ma tsadatara bəzay ma guma neney hay ba a gawla ŋga kurow kava tsew ana hay na, ŋga ma daw ba ka slam ana, ma da tatəkadata ndaw hay, me tələkey mey da wuraw ata hay.

² Arka andza Zaŋ ŋga da daŋgay na, ŋga ma tsənada ma tsam ka tek ma Kriste me key ana hay, ŋga me kəley gawla ŋga hay, ma ka da tsəhafama:

³ «Kah na ndaw aŋga na ma da sawa na tsukuɗu, mala, la ka hutam mekelehe ɗaw?»

⁴ Yezu ma mbəɗatar kava: «Dawam da ɓadəmara a Zaŋ tek a kwar na ma tsənadama na, ta na ma nəkadama na hay:

⁵ wulaf hay a nəkadama dey ka dəba, vədal hay a halam aha tseriye, malawa hay ma bazləma hiya ba. Mandak hay a tsənadama sləmay, ndaw ma mətsa na hay a mbələmawa ha. Mey Hayna Wayna ma ɓa ba a ndaw mbarga na hay;

⁶ ndaw na guma ɗaw ma təɗadata kakay ana hay na, ŋga da wuiya!»

⁷ Andza a dam aha tek ata na, Yezu ma tsatar ka Zaŋ a ndaw ma kusa hiya na hay: «Ɗagay ka da nəkəmawa da palah ana na mey? Zeleŋ ana, ŋga na memeɗ ma ɓəlada na ɗaw?

⁸ Azlakwa ka da nəkəmawa na ka mey? Ka ndaw ma kəla zana mambay ana hay ka vaw ɗaw? Ama, ndaw ta zana mambay ana hay ka vaw ana hay na, taya da 'ay ma bay hay seŋgey.

⁹ Ka da nəkəmawa azlakwa mey tok? Ka ndaw sek ɗaw? Ayaw, i ɓadakwar, afəna ndaw sek.

¹⁰ Ŋga ndaw aŋga na Mewindey Kokwoɗ ana hay ma ləvafama na: Nəkafa, i sləraɓa maslaŋ a ɗaw ka mey ɗek, ma aza ka da ləmadaka tsəveɗ, ka mey ɗek.

¹¹ I ɓadakwar dərka na, kerker da walaŋ ma bəzey ma ŋgwas hay na, ndaw ma lətsa 'ar ɗuhwa ha a fəna Zaŋ Baptist na dakay. Ama da Slala ma 'ərlam na, bəzey bəza ha ketekuɗey na, a fəna ŋga.

¹² Zla da har ma Zaŋ Batist, kasl ekəɗey na, a zarafama mey ka Slala ma 'ərlam ma sukom, ma buwa na ndaw sukom ana hay.

¹³ Akwa na mendzey ma ndaw sek hay tabiya ha ta Mewey adzay a taləkəmawa mey kasl ka Zaŋ.

¹⁴ Haɗaw a sakwar kuray ka tsənadama hayahaya na, ŋga na Elyi aŋga na ma ləvam a da sawa na.

¹⁵ Kendzey sləmay ma ndaw ana daha na, ka tsənada!

¹⁶ I da wadata ndaw ma bəla neney hay na, ta way? Ma meley ŋga na na ta bəza hay ma ndza hiya ka dala ma wasa, a zəlama aha bəza hay mekele hiya:

¹⁷ «La ka fəməkuraɓa fogwom ba, amana kuray ka gərvam kava kakay. La ka kələmukuraɓa walay vagay ba, amana ka wuɗam ma tuwafəmandar kakay.»

¹⁸ Da ma sawa ma Zaŋ na, a zəmey tek kakay, a sey zom kakay, ka ləvafama ‹'ar a mbəɗar›.

¹⁹ Bəzey ma Ndaw ma sawa, a zəmey tek, a sey zom, a ləvam: ‹Nəkafama ndaw ma hwoɗ, ŋga ndaw ma 'ay zom, dzam ma ndaw me tsekeley dzaŋgal hay, ta ndaw ma ŋgəsa na hay!› Ama ma səra ’ar a da sərey dzerey aha na da mber aŋga hay»

Yezu a tuway hərway ma ndaw ma pam 'ar kakay ana hay

²⁰ Arka Yezu ma zlar ma katar say a wuraw ana, har a var me key zeheɗ aŋga da huɗa na hay, hərway ndaw ma wuraw ana hay, ka mbəɗadama mendzey ta hay, kakay:

²¹ «Kah da viya Korazim! Kah da viya Betəsayda! Hərway zeheɗ a neney hay, ma ka hiya da 'ay kwar ana hay na, kendzey ma ka hiya da Tir ta Sidoŋ na, akwatay na ka babuhwam pətsaw ba ka vaw, ka kəlam zana ma burhwa ba ka vaw, ka mbəɗadama mendzey ta tsoy.

²² Ayaw i ɓadakwar dərka na, ta pas ma sariya na, sariya mandza Tir ta Sidoŋ na, a da key ŋgama, ka na ma kwar.

²³ Arka kah tey Kafarnawom, andza a kafaka na, a da tsakafəmaka kasl ka ndasl ma 'ərlam ɗaw? Ka da rəɗey na a tsəvay, ka slam ma vagay hay! Hərway zeheɗ a neney hay, ma ka hiya da 'ay ɗek ana na, haɗaw ma ka hiya da Sodom na, akwatay ŋga daha mba ha teseɗey.

²⁴ Ekəɗey i ɓadakwar satsa na, ta pas ma sariya na, dala ma Sodom na, sariya ŋga na na a da key na, ŋgama ka na ŋgeɗek.»

Ma səradata Yezu ta Baba ŋga

²⁵ Da har ana ŋga na na, Yezu ma zlar a guma me ləvey: «I səmbəraka Baba, Bay’ərlam ma 'ərlam ta dala, hərway kah ma kəzlafata tek a neney hay ba, ka ndaw ma səradama 'ar ana hay, ta ndaw ma səradama tek ana hay, ma da ɓadatara a ndaw bəza na hay.

²⁶ Ayaw, Baba, me wuɗey andza hana, kah ana, ta kokwoɗ eɗek.

²⁷ Tek hay tabiyaha ma vəladiyawa na Baba ɗaw. Ndaw ma sərada Bəzey ana na way na, dakay, sey Baba na dada. Ndaw ma sərada Baba na na way na, dakay, sey Bəzey ana dada. Dakay na, sey ndaw ana ŋga na, Bəzey ana me wuɗey ma ɓadara na.

Zəgama dambəla ɗaw

²⁸ Səmawa ka tsakay ɗaw, kuray a neney tabiya ha, yah na, i da vəlakwar me sesəkey vaw.

²⁹ Hayna zəgam na dambəla ɗaw, da tatəkam na ka yah, hərway yah na kokwoɗ aha, i ləfeɗeɗe ha da mevel. Arka tok na, mezek a kwar hay a da sasəkam vaw.

³⁰ Ayaw, dambəla ɗaw na, me zəgey ŋga na na, ger aha kakay. Tek a ɗaw me zəgey ana na, a ləhey tikay.»