Mark 9 - MEY HAYNA WAYNA MA YEZU KRISTE MA MEVEY

¹ Arka, ŋga ma ləvatar: «I ɓadakwar dərka na, ndaw da walaŋ ma ndaw a neney hay ka sləna na hay na, sa na hay a da mətsam aha mandzara ka nəkadama Slala ma Bay'ərlam ma sawa ta ma slafa ŋga ha, kakay.»

Yezu me mbəɗey a wezley dey

² Meney mukwa a dəba na na, Yezu me ŋgəley ka bəzay Piyer, Zak ka zəgawa Zaŋ. Ma dadata slam ata gəle, ka 'ar ma mamba sololo ha. Ŋga me mbəɗey pəla, ka slam dey ta.

³ Arka, zana ŋga hay ma təram a wazlam dey, babara ŋga na na, kwa ndaw a slafa ma pəra zana babara ha, ka dala, andza ha na, dakay.

⁴ Arka Eli ma ɓatar vaw ta Moyiz, a tsam aha guma a vaw andza Yezu.

⁵ Piyer me mbəɗey kava, ma ləvar a Yezu: «Rabi, lakwa ka ndzakwa ka sləna na, hayaha seŋgey; ləmakwa gwadzavok hay makar, asləta a kah, asləta a Moyiz, ka zəgawa a Eli.»

⁶ A tsey na, a sərada ka ləvey teŋgey, kakay. Hərway zluwer a katar aha.

⁷ Pazlay ma sawa ma sahətata, arka vəɗe ma ɗay ma tsənawa da pazlay ana: «Neney na, Bəzey ɗaw ma wuɗa haɗa na, tsənamar sləmay.»

⁸ Arka tsana, ma nəkam dey ka slam ata na na, a nəkam aha ndaw dasakay, sey Yezu ana asləta ta taya na dada.

⁹ Andza a harɗəmawa ha da mamba na, ŋga ma katar say ma ka təkəradəmara kwa a ndaw zlay tek ata ma nəkadəmərawa na. Ha kasl aza Bəzey ma Ndaw ka mbəlawa ba da walaŋ ma ndaw ma mətsa na hay, ɗagay.»

¹⁰ Taya ma tsənamar sləmay andza ma Yezu ma tsatar ana, ama na, taya ma tsəham ka 'ar vaw ta na hay: «Ma mbəlawa da walaŋ ma ndaw ma mətsa na hay, na ka ləva na teŋgey?»

Ma tsam ka Eli

¹¹ Arka, taya ma tsəhafama: «Ɗagay ndaw me sesəkey mewey hay, a ləvam na waya, sey Elyi a sawa ba ka mey ɗagay na, ka mey?»

¹² Yezu ma ləvatar: «Ayaw dərka na, Eli na a sawa ba ka mey ɗagay, a da ləmadata tek hay tabiyaha. Azlakwa tok na, Mewindey Kokwoɗ ana hay a ləvam: «Bəzey ma Ndaw a da key tsetseh haɗadzidzay, a da rəsama na, ka mey?»

¹³ Ayaw i ɓadakwar, Eli na ɓa, ka sawa tsoy, ka kamar tek ata ma wuɗam ana hay tsoy, andza na ma winda ha ka ŋga na»

Yezu a ndeley wawa na daha ta fakalaw aha da 'ar

¹⁴ Andza a səmawa ha ka slam ma gawla ŋga hay na, taya ma nəkadəmata ndaw hay haɗadzidzay, ma kusa hiya ka tsakay ta. Ndaw me sesəkey mewey hay a kəɗam aha waway ta taya.

¹⁵ Andza ndaw ma kusa hiya na hay ma nəkadama Yezu na, a katar hasəkakka. Taya ma hwam, ma tsamar guma.

¹⁶ Ŋga ma tsəhafata ka gawla ŋga hay: «Ɗagay ka kəɗam waway, andza ndaw a neney hay na, ka mey?»

¹⁷ Ndaw da walaŋ ma ndaw ana hana hay ma kusa hiya na, ma mbəɗar kava: «Miter, i ma sadəkawa wawa ɗaw, fakalaw da vaw ŋga, a tsada guma kakay.

¹⁸ Andza fakalaw ana, ka zlar ba ka waray ka waray na, a bazlada buɗa ka dala, mahwasləpay da mey, ta me pəɗey sler aha, vaw ŋga tabiyaha a mberey, tsaɗ tsaɗaɗɗa. I ma ləvatar a gawla ɗek hay, ka ɓəlama fakalaw ana ba da vaw ma wawa na, amana, taya ka ndzafam gədaŋ ana kakay.»

¹⁹ Yezu me mbəɗey kava, me ləvey: «Kuray ndaw ma bəla a neney hay, me pey 'ar kakay ana hay, i da ndzey andza kuray na, kasl ka waray? I da ɓəsakwar na, kasl ka waray? Aŋga sadəmiyawa wawa na.»

²⁰ Taya ma zəgəmərawa. Andza wawa na ma nəkada Yezu ba na, fakalaw ana ma zlar ma gwagutsada wawa na, ma bazlada ka dala, ma tsada ɗay ta mahwasləpay aha da mey.

²¹ Yezu ma tsəhafa ka baba ma wawa na: «Ɗagay tek ana a zlar ma zəga andza neney na, zla varay?» Ŋga me ləvey: «Zla ta bəza ha.

²² Dey haɗadzidzay andza ka zlar ba na, a kəlada a waw, dakay na, a yam, hərway a wuɗey na, ma zəɗada ba. Ama haɗaw ka slafa me key tek daha na, sawa dzənandar, la ka kəmaka da vaw tey»

²³ Yezu ma ləvar: «Haɗaw ka slafa na…tabiyaha ta dəba har ma ndaw me pey 'ar ana na.»

²⁴ Arka tsana baba ma wawa na, me ləvey: «I pey 'ar, ama na, sawa dzənaya da 'ar aɗaw a neney me pey, ma hətsaya na.»

²⁵ Andza Yezu ma nəkada ndaw hay a kusəmawa hiya na, ŋga ma babətsafa ka mesəfrey ana ma zləɓa na: «Mesəfrey a neney mandak ana, me weley mey kakay ana, i ləvaka na, bawa ba da vaw ma wawa neney, kwa ka fuləkwey a vaw ŋga sazlay

²⁶ Fakalaw ana ma gwagutsada wawa na, ta me wudey aha, arka na ma bawa ba. Wawa na ma ɓerzley, ha ndaw hay ma ləvafama waya ma mətsa ha ba.

²⁷ Ama Yezu na, ma zəga da har ana, ma lətsada, arka na ŋga me lətsey ta lətsey.

²⁸ Andza Yezu ma husey a mbaw na, gawla ŋga hay ma tsəhafama taya makərata: «Ɗagay la da slafama ma ɓəla fakalaw ana tikay na, ka mey?»

²⁹ Yezu ma ləvatar: «Gwalay ma fakalaw ana ŋga na na, tek ma slafərawa ma badərawa na dakay, sey ta me ɗuley mey.» Yezu ma ɓada me mətsey ta ma da mbəlawa ŋga, dey metsetsew ana.

³⁰ Andza taya ma dam ba da slam ana ŋga na na, ma tazlaram ta Galiley. Ama Yezu a wuɗey na, ndaw hay ka da sərafama zlay.

³¹ Hərway a tatəkadata ha gawla ŋga hay, a ləvatar: «A da haɗəkadama Bəzey ma Ndaw a har ma ndaw hay; a da kəɗama ba vagay aha. Andza ka kəɗama tsoy na, meney makar a dəba na na, a da mbəlawa.»

³² Gawla ŋga hay na, a tsənadama bəzay ma guma na, kakay, ama na, a wasam ma tsəhafama.»

Ma da key ɗuhwa ha na, way?

³³ Taya ma dawam a Kafarnawom, andza taya ma husam ba a mbaw na, Yezu ma tsəhafata: «Ɗagay ka trəmawa vaw hana ka tsəveɗ na, ka mey?»

³⁴ Ama taya na, tete tek ata. Hərway ka tsakay tsəveɗ na, taya ka tərəmawa vaw ba. A wuɗam ma səradama ɗuhwa ha da walaŋ ata na, way?

³⁵ Yezu na, me ndzey ɗar, ma zəlata gawla ŋga na kurow kava tsew ana hay, ma ləvatar: «Haɗaw ndaw a wuɗey ma tərey ndaw tsəfəmey ana na, ka tərada vaw ŋga gudar ma ndaw hay tabiya ha, gawla ma 'ay ma ndaw hay tabiyaha.»

³⁶ Arka na, ŋga me zəgey bəzey bəza ha, ma pada a wuzlah ata. Andza ma surma ba na, ma ləvatar:

³⁷ «Ndaw me ŋgəley bəzey bəza ha andza neney da mezəley ɗaw na, a ŋgəley na, yah ana ta 'ar a ɗaw ana. Ndaw ma ŋgəlaya na, a ŋgəley na yah kakay, ama a ŋgəley na, Ndaw ma sləradiyawa na.»

Yezu a tatəkadata gawla ŋga hay

³⁸ Zaŋ ma ləvar: «Miter, la ma nəkadama ndaw ana daha, a ɓəley aha fakalaw hay ta mezəley ɗek, la wuɗam ma təkama ba zləna, a səpandakwar aha bəzay tikay.»

³⁹ Ama Yezu na, me ləvey: «Ka da təkama zlay, hərway ndaw ka key ɗeɗew ba ta mezəley ɗaw na, arka satsa a da tsafaya ha guma haya kakay aha sakay.

⁴⁰ Haɗaw ndaw ana ndaw dugwan a lakwa kakay na, ndaw a lakwa.

⁴¹ Kwa way way, ma vəlakwar yam me sey da kokwam, ma vəday kuray ndaw ma Kriste hay na, dərka na i ɓadakwar, masa ŋga a da zəɗey aha, kakay.

Mekey ka ’ar ɗaf

⁴² Kwa way way, ma zləgada ndaw asləta da walaŋ ma wawa neney, ma pam 'ar ana hay na, ŋgama ma ŋga na, ka ramar melez ɗuhwa ha a ɗay, ka kəladama a bəlay.

⁴³ Haɗaw ma dahəɗaka ma zləgadaka na har eɗek na: ŋgama rətsa ba, ŋgama ma daway ta har asləta a mendzey, ta neney kah ma daway, ta har eɗek tsetsuwe ta hiya, a waw ma laɓa ha na, a waw me mətsey kakay ana na. [

⁴⁴ ]

⁴⁵ Haɗaw ma dahəɗaka ma zləgadaka na sek a ɗek na: ŋgama rətsa ba, ŋgama kah ma daway ta sek asləta a mendzey, ta neney kah ma da daway, ta sek eɗek tsetsuwe ta hiya, a waw ma laɓa ha na na. [

⁴⁶ ]

⁴⁷ Haɗaw ma dahəɗaka ma zləgadaka na dey ɗek na, tsursla ba: ŋgama kah ka fuləkwey ta dey asləta a Slala ma Bay 'ərlam, ta neney ma da kəladəmaka ta dey ɗek hay tsetsuwe ta hiya a waw ma laɓa ha na na.

⁴⁸ Da huɗa na, tol a mətsey kakay, waw a mətsey kakay.

⁴⁹ Hərway kwa way way na, mandaŋ a da kafərawa da waw.

⁵⁰ Mandaŋ na tek haya ha, ama haɗaw mandaŋ a vəɗey sakay na, ka da təradama ka tsəray na, ta mey sa mey? Təram mandaŋ ahiya ka 'ar vaw kwar ana, ndzam da zozoy ka 'ar vaw kwar ana.»