Mark 6 - MEY HAYNA WAYNA MA YEZU KRISTE MA MEVEY

A pamar 'ar a Yezu da Nazaret kakay

¹ Andza Yezu ma mbəkadərawa wuraw ana hana ba na, ŋga ma daway a wuraw aŋga. Gawla ŋga hay ma səpamar bəzay.

² Ta pas ma mesley na, ŋga ma tatəkadata ndaw hay da 'ay me ɗuley mey. Ndaw me pey sləmay ana hay haɗadzidzay ma rəzlaya, ma ləvam: «Ɗagay tek ana a sərawa na da may? Ɗagay neney na ma səra ’ar waray ma vəladəmərawa na na, ha ɗeɗew hay a kam ta har aŋga na na?

³ Ŋga na na, ndaw me tseɗey tuwaw, bəzey ma Mariya, malam mandza Zak ta Zozey, Zud andza Simoŋ kakay ɗaw? Malam aŋga diŋgwas ana hay na, taya ka sləna da 'ay lakwa na hay kakay ɗaw?» A da kafata ka taya na, tek me tsey metsembeɗ aha.

⁴ Yezu ma ləvatar: «Ndaw sek na, da wuraw aŋga, da walaŋ ma ndaw aŋga hay, da veɗ 'ay ŋga na, a rəsama.»

⁵ A slafa me key zeheɗ da wuraw ana, kwa asləta kakay. Amana, ŋga ma bezləhey har ka ndaw dzedzey ana hay nekəɗey dada na, ma ndalam.

⁶ Me pey 'ar ata kakay ana na, a rəzla. Yezu ma halata sa ma wuraw a sana hay, ta ma tatəkadata ndaw hay.

Yezu a sləradata gawla ŋga kurow kava tsew ana hay

⁷ Ŋga ma zəlatərawa gawla ŋga kurow kava tsew ana hay. Arka ŋga ma zlar ma sləradata tsew ta tsew; ma vəlatar slam har ma watar 'ar a mesəfrey ma zləɓa na hay.

⁸ Ŋga ma ləvatar ka da zəgam tek a har zlay, sey dugwar, peŋ zlay, gabal zlay, sumkwo a gabal zlay.

⁹ Ama tahərak na pam a sek, ka da həlam zana hay tsew zlay.»

¹⁰ Ŋga ma ləvatar: «Haɗaw da slam, kuray ka fuləkwam ba ’ay ndaw na, ndzam da huɗa, ha ka ma da bey kwar da slam ana.

¹¹ Haɗaw andza da wuraw ana a wuɗam ma ŋgələmakwar kakay, a pafəmakwar sləmay kakay na, bəmawa ba, bəzləmama burhway ma wuraw ana ba, ka sek a kwar; aza a da təratar seydewe ta ha.»

¹² Arka, taya ma dawam, ma tələkam mey, ma ka mbəɗadama mendzey.

¹³ Taya ma ɓəlam fakalaw hay haɗadzidzay. Taya ma fəɗafəmata mal ka ndaw dzedzey ana hay haɗadzidzay, taya ma ndaladəmata.

Herode ta Yezu

¹⁴ Bay ɗuhwa na Erod ma tsənada a tsam aha ka Yezu. Hərway mezəley ŋga a tsəney aha, ka bəla tabiyaha. A ləvafama waya: «Zaŋ-Batist ka mbəlawa ba da walaŋ ma ndaw ma mətsa na hay.» A da slafa ɗey me key ɗeɗew hay na, hərwuiya.

¹⁵ Sa ma ndaw hay, waya: «Neney na Elyi.» Sa ma ndaw mekele hiya sa tey na, waya: «Neney na ndaw sek kal kal andza sa ma ndaw sek a lakwa a sa na hay, tsa.»

¹⁶ Andza Erod ma tsənada guma neney hay ba na, me ləvey: «Ma mbəlawa neney na Zaŋ Batist aŋga na i ma rətsadara 'ar ba na.»

Me mətsey ma Zaŋ-Batist

¹⁷ Akwa na, Erod a zəga Zaŋ a daŋgay, ma dzuwa ta tsalalaw na, hərway Erod ana me zəgey Erodiyad, ŋgwas ma malam aŋga Filip.

¹⁸ Hərway Zaŋ a ləvar a Erod na: «Slam har eɗek ma zəga ŋgwas a malam eɗek na, dakay.»

¹⁹ Arka tsoy Erodiyad a ŋgəlada dey ta Zaŋ sakay na hərwuiya tok. A wuɗey na ma kəɗa ba vagay aha, amana a slafa kakay,

²⁰ hərway Erod a wasada ta Zaŋ, a wafa vaw na, hərway a sərada Zaŋ ana na, ndaw dzerey aha, kokwoɗ aha. Andza a tsar aha guma na, a rəzla. Ama sa tok na, a wuɗey ma pafa sləmay ka guma ŋga na hay.

²¹ Ama a da dar 'ar a Erodiyad na, ta pas ma Erod me key magurlam ma mayawa ŋga. Ŋga ma katar hwahwaɓay a ndaw ma mber aŋga ɗuhwa na hay, bay ma sidzew hay, ta ndaw ma fada ma Galiley hay.

²² Dem ma Erodiyad ana hana me gərvey, ha ma mbafata kandza Erod, ta ndaw aŋga ma wunatərawa na hay. Bay ɗuhwa na ma ləvar a dem ana hana: «Tsəhafaya tek ma mevel eɗek me wuɗey ana na, i da vəladaka.»

²³ Ŋga ma mbəɗar kava, andza neney: «Tek eɗek ma tsəhafaya tabiyaha na, i vəladaka, kwa andza rita ma slala ɗaw tekeɗe na.»

²⁴ Dem ana ma bawa, ma ləvar a may ŋga: «Haya i ka tsəhey na mey?» Ŋga ma mbəɗar kava: «Hayna, tsəhey na 'ar ma Zaŋ-Batist.»

²⁵ Ŋga na pəlasl ma mawa ka slam ma bay ɗuhwa na, ma tsəhafa: «A saya na vəladiyawa 'ar ma Zaŋ-Batist a kwatama deŋe, ka sləna ɗey.»

²⁶ A dar 'ar a bay ɗuhwa na sakay, ama hərway ma me mbəɗey ŋga ka slam dey ma ndaw hay ana na, a slafa ma mbəɗar mey sakay.

²⁷ Arka tsana, bay ɗuhwa na me slərey sidzew, ma da rətsərawa 'ar ma Zaŋ. Sidzew ana ma daw, ma da rətsərawa 'ar ma Zaŋ, da daŋgay ŋga.

²⁸ Ma sadərawa 'ar ana da kwatama, ma vəladara a dem ana tok. Dem ana tey, ma dadara a may ŋga.

²⁹ Andza gawla ma Zaŋ hay ma tsənadama na, ma dawam ma zəgama vagay ana, ma padama a tsəvay.

Yezu a vəlatar tek me zəmey a ndaw hay gabal zlam da palah

³⁰ Andza maslaŋ hay ma məmawa ba na, ma kusam ka tsakay ma Yezu. Taya ma ɓadəmara tek ata, ma kəmawa na hay, ta tek ata, na ma tatəkadəmatərawa na.

³¹ Ŋga ma ləvatar: «Kuray eɗey na, səmawa ba gədzah a slam palah aha, sasəkam vaw nekəɗey ɗagay.» A tsey andza ha na, hərway ndaw hay kambəlaɓa. Sa na a səmawa ha, sana a dawam, kwa bəzay a rafata me zəmey tek dakay.

³² Taya ma tasam tek ata ta kombiwal a slam palah aha gədzah a tsakay.

³³ Andza ndaw hay ma nəkadəmata a dam aha da dəreŋ na, ndaw hay haɗadzidzay ma səradəmata, arka ndaw hay tabiyaha da wuraw ma hwam ta sek, 'ar a slam ata, ma dawam a huɗa na, ma husafəmata ba ka mey.

³⁴ Andza ma hardəmawa ta ba da kombiwal na, Yezu a da nəkey dey na, ndaw hay ma kusa hiya tam tamma. A kamar da vaw a Yezu zləna, hərway a nəkafata na, andza təɓaŋ hay, mandzara ndaw me tsukurey ana kava. Arka ŋga na, ma zlar ma tatəkadatara tek hay haɗadzidzay.

³⁵ Andza ma hakwaɗ me key ba na, gawla ŋga hay ma gurafama, ma ləvamar: «Hakwaɗ ka key tsoy, slam a neney palah aha sana,

³⁶ hayna ləvatar a ndaw a neney hay, ka dawam a wuraw a neney bəse na hay, ka da haɗəkəmawa tek me zəmey.»

³⁷ Ama ŋga ma mbəɗatar kava: «Kuray ana, vələmatar tek me zəmey ana kwa.» Taya ma ləvamar: «A saka na, la ka dawam ka haɗəkəmawa pəŋ, ma gabal temere tsew, la ka vəladəmatara ɗaw?»

³⁸ Ŋga ma ləvatar: «A rafakwar daha na, peŋ nday? Aŋga dawam da nəkəmərawa ɗagay.» Andza taya ma nəkəmərawa ba na, ma ləvamar: «Peŋ zlam, ta kəlef tsew.»

³⁹ Ŋga ma ləvatar: «Ndzadəmata ndaw hay dzo dzo, ka 'ar ma guzer ŋgərez ana.»

⁴⁰ Taya na, ma ndzam dzabal ahiya. Ka dzabal asləta na, a key ndaw temere, dakay na, ndaw kokurow zlam.

⁴¹ Yezu ma həlata peŋ a hana hay zlam ana, ta kəlef tsew ana, ma tsakafada dey a 'ərlam, ma pəsafa mey, ma tsada peŋ a hana hay, ma vəladatara a gawla ŋga hay, ma ka wanəkadəmatara a ndaw hay. Ŋga ma tsadata kəlef ana hana tsew ana hay satsa, ma wanəkadəmatara a ndaw hay tabiyaha.

⁴² Taya ma zəmam tabiya ta ha, ha ɓah ka me rəhey ta.

⁴³ Taya ma həlama sa ma peŋ ma zawa na na, me rəhey tsakarak kurow kava tsew, ta sa ma kəlef ma zawa na satsa.

⁴⁴ Ndaw ma zəmam peŋ ana hay na, a kam ndaw hay gabal zlam.

Yezu a heley ka 'ar ma yam

⁴⁵ Arka tsana, Yezu ma təkatar ɗay a gawla ŋga hay, ka mam a kombiwal, ka dawam ka mey ta 'ar ma bəlay, a tsakay naŋgar, 'ar a Betəsayda. Da har ana na, ŋga na tey na, a ləvatar a ndaw ana ma kusa na hay ka dawam tek a ta.

⁴⁶ Andza ma ləvatar ba a ndaw hay, ka dawam tek ata na, ŋga me tsəley a mamba, ma da ɗulawa mey.

⁴⁷ Ma hakwaɗ me key na, andza kombiwal ŋga da wuzlah ma bəlay na, Yezu na, ŋga makəraŋga ka dala.

⁴⁸ Andza ma lamɗa, ŋga ma nəkadata gawla ŋga hay, a ndalamam ahiya, ma gezləwerey yam na, hərway memeɗ a madata ta dəba na, Yezu ma daway ka tsakay ta, ta sek ka 'ar ma bəlay, ha mazlambar aha a da tsafata mey.

⁴⁹ Andza taya ma nəkadama a heley ha ka 'ar ma bəlay na, ka taya na tek ma tərafata. Taya na ma kəlamar a me wudey.

⁵⁰ Hərway taya ka nəkadama ba tobiya ta ha, zluwer a mbəɗatar 'ar. Ama ŋga ma tsatar guma tsa, ma ləvatar: «Sadama 'ərev, ka wasam zlay, neney na, yah.»

⁵¹ Ŋga me tsəley ka tsakay ta, a kombiwal. Arka na, memeɗ me rey ba ɗeɗek. A katar na, wadaŋ wadaŋ.

⁵² Akwa na taya ka tsənadama guma ma peŋ aŋga na kakay. Hərway mevel ata təɗo təɗo.

Yezu a ndeley ndaw da Zenezaret

⁵³ A dəba ma me tesey ta ba na, taya ma husam a dala ma Zenezaret.

⁵⁴ Andza ma hardəmawa ta ba da kombiwal na, ndaw hay ma səradama Yezu tsa.

⁵⁵ Taya ma hwam, ma pam mey da dala na, tabiyaha, ma hələmatərawa ndaw dzedzey ana hay tabiyaha, ta merdek ahiya, ka slam ma ndaw hay ma səradama, Yezu ŋga kava na.

⁵⁶ A wuraw ana, ŋga ma daway a huɗa na na, ka key na wuraw ɗuhwa ha, bəza ha na, a padəmata ndaw dzedzey ana hay, ka slam me kusey hay. Arka, a kamar amboh a Yezu, ma taya ka ləmamar na, a mey ma zana ŋga na dada tsa. Arka, ndaw ma ləmamar ana hay tabiyaha na, ma ndalam ba.