Mark 5 - MEY HAYNA WAYNA MA YEZU KRISTE MA MEVEY

Yezu a ndeley ndaw ta fakalaw aha da 'ar

¹ Taya ma husam a diya naŋgar, a dala ma Zerazeniyeŋ hay.

² Andza ma harɗawa ma Yezu da kombiwal na, ndaw ana daha ta mesəfrey ma zləɓa na da ’ar, ma bawa da tsəvay, ma sawa dekeslef ma zlam 'ar.

³ Ma ndza ha da tsəvay, kwa ta megesele tekeɗe na, ndaw a slafa ma dzuwada sakay.

⁴ Hərway tsoy ka yam vaw ma daradama ta megesele ta tsalalaw na, amana a mburtsadata megesele na ta tsalalaw ana hay ba. Kwa gədaŋ ma ndaw ma slafa ma war ’ar na dasakay.

⁵ Ɗəvaɗ ta rəpas a dzay na, a heley lamba ha, da tsəvay, da mamba ta me wudey aha. A gwayza vaw ŋga ba ta ŋgwa hay.

⁶ Andza ŋga ma nəkada Yezu a sawa ha da dəreŋ na, ŋga ma hway ka tsakay ŋga, me gərdey ka mey dey ŋga.

⁷ Ŋga me wudey ta magalaha: «Ka wuɗafaya mey, Yezu, Bəzey ma Bay ma Bəla tsaŋ da mekekəle ŋga na? I mbəɗaka ta Bay ma Bəla, ka da margaɗaya zlay.»

⁸ Hərway a mey na, Yezu a ləvar: «Mesəfrey a neney ma zləɓa na, bawa ba da vaw ma ndaw a neney!»

⁹ Yezu ma tsəhafa ka ndaw ana: «Ɗagay mezəley ɗek ana mey?» Ŋga ma mbəɗar kava: «Mezəley ɗaw na ‹Wurmeɗ Wurmeɗ›, hərway la haɗadzidzay.»

¹⁰ Ŋga ma kar amboh a Yezu dey haɗadzidzay, ma ka da ɓəlata dəreŋ ta dala na zlay.

¹¹ Arka azlakwa ka ɗay mamba na, welde ɗuhwa ha ma gaduru hay ka slam ana, a pəɗam aha zəmay.

¹² Arka mesəfrey ana ma zləɓa a hana hay ma kamar amboh a Yezu, ta me ləvey aha: «Sləradandar a gaduru hay ma la ka fuləkwam a taya kwa.»

¹³ Arka ŋga ma vəlatar tsəveɗ. Taya ma bəmawa, ma fuləkwam a gaduru a hana hay. Arka welde ma gaduru a hana hay ma tsəmawa ɗay da mamba a hana na a bəlay. A key gaduru gabal tsew dzay ma mətsam da bəlay.

¹⁴ Ndaw ma tsukuram gaduru ana hay, ma hwam tek ata, ma ɓadama tek a hana, me key ana da wuraw ɗuhwa na, ta na bəza na hay. Arka ndaw hay ma səmawa ma da nəkaɓa tek ana ma kawa na.

¹⁵ Taya ma səmawa ka slam ma Yezu, ma nəkadama ndaw ana ta fakalaw aha da ’ar ana, zana ka vaw ka dəba, tsoy 'ar a mbəɗar sakay, ŋga a ŋga na ta fakalaw hay - Wurmeɗ Wurmeɗ - da 'ar ana. Taya ma wasam ka vaw.

¹⁶ Ndaw andza ma nəkadama ta dey ta na hay na, ma təkəradəmatara tek ma Yezu ma kar a ndaw a hana, 'ar ma mbəɗar ana, ta tek na ma safatərawa ka gaduru ana hay.

¹⁷ Arka taya ma kamar amboh a Yezu, ma ka daw ba da ŋgwa ta.

¹⁸ Andza Yezu a tsəley aha təŋga a kombiwal na, ndaw aha na 'ar ma mbəɗar ana, ma kar amboh, ma tsəhafa ka dam tsetsuwe.

¹⁹ Ama Yezu na ka vəlar tsəveɗ kakay, ma ləvar: «Mey a mbaw, ka tsakay ma ndaw ma 'ay ɗek hay, təkəradatara tek ma Bay’ərlam ma kəkawa tabiyaha da ndaw aŋga ma kar da vaw ana.»

²⁰ Ndaw a hana ma daway, ma tələkada mey da dala ma Dekapol tabiyaha, ta tek ma Yezu a hana ma kərawa na. A rəzlata ndaw hay tabiyaha.

Yezu me ndeley ŋgwas ta ma mbəladərawa dem ana daha

²¹ Andza ma Yezu me tsəley ba a kombiwal, me tesey ba a diya naŋgar na, ndaw hay haɗadzidzay ma kusam ka tsakay ŋga, ka ɗakal ma mey ma bəlay.

²² Bay ma 'ay me ɗuley mey ana daha ma husawa, a zəlamar Zayros. Andza ŋga ma nəkada Yezu ba na, ŋga me gərdey ka slam sek aŋga.

²³ Ŋga ma kar amboh dey haɗadzidzay ta me ləvey aha: «Dem a ɗaw vaw a tsafa, a zawa həɗek həɗek, sawa bazləhafa har na, aza ŋga ka ndeley, ka səfrey.»

²⁴ Yezu na ma dam tsetsuwe. Ndaw ma kusa hiya haɗadzidzay ma səpəmatar bəzay, ha ndaw hay a ŋgəɗətsama.

²⁵ Ŋgwas ana daha tey dzedzey aha, a guvey mambaz, ka key mevey kurow kava tsew.

²⁶ Ŋga ka ndelemey ta dzedzey ŋga na bəza kakay, ma ndəvada sulay ŋga tabiyaha, 'ay ndaw ma sidem hay. Amana, re ŋgama ŋga na dakay. Sey dzadzak azakafa na, adiya adiya.

²⁷ Andza ŋgwas ana, ma tsənada a tsam aha ka Yezu na, ŋga ma daway a walaŋ ma ndaw ma kusa hiya na hay, ŋga ma daw ta dəba ma Yezu, ma ləmar a zana ŋga na.

²⁸ Ŋga me ləvey ka 'ar vaw ŋga na na: «Haɗaw akwa i ka husey ba ma ləmar, a zana ŋga na hay tsana, i da ndeley aha ba seŋgey.»

²⁹ Deŋe ka slam ana hana tsana, mambaz aŋga na hana me rey ndaŋ, da mey asləta. Ŋga ma sərafa da vaw ŋga na na, ŋga ka ndeley tsoy da dzedzey ŋga na.

³⁰ Ka slam ana hana deŋe tsana, Yezu ma sərafa gədaŋ ka bawa ba da vaw ŋga. Ŋga me mbəɗey dey pəla, da walaŋ ma ndaw ma kusa hiya na hay, me ləvey: «Ma ləmatar a zana ɗaw hay way?»

³¹ Gawla ŋga hay ma mbəɗamar kava: «Ka nəkada ha ndaw ma kusa hiya na hay a gaɗətsəmaka ha sana, ka tsəhey: ma ləmaya way na teŋgey?»

³² Ama Yezu me nəkey dey kəɗiya ka tsakay ŋga na, ma ka nəkada ŋgwas ana me key tek ana.

³³ Arka ŋgwas ana hana ma zlurey, ta me wesey aha kwasl kwasl, ma sərafa ka me ndeley ŋga na na, ma sawa me kəley a həvam aŋga, ma ɓadara dərka na tabiya ha.

³⁴ Ama ŋga ma ləvar: «Dem a ɗaw, me pey 'ar eɗek ka buwa ka ba, daway da zoy, dzedzey ɗek a neney ka ndalafaka.»

³⁵ Andza Yezu a tsey aha guma ŋga neney mba na, ma slərəmawa ndaw hay da 'ay bay ma 'ay me ɗuley mey a hana, ma ləvamar: «Dem a ɗek ana ka mətsey tsoy sana, ka yadama vaw ta Miter ana na ka mey sa mey?»

³⁶ Ama Yezu na, ka mbəsla guma ta na hana ma tsam ana tikay, ma ləvar a bay ma 'ay me ɗuley mey a hana: «Ka da wesey zlay, kah na pey 'ar tsa kwa.»

³⁷ Ka mbəkey tsəveɗ a ndaw ka kəsadama kakay, sey, Piyer, Zak ta Zaŋ malam ma Zaŋ.

³⁸ Taya ma husam 'ay bay ma 'ay me ɗuley mey a hana na. Yezu ma nəkada vaval ma ndaw hay, ma tuway ta zlayzlay aha.

³⁹ Ŋga me fuləkwey arka ma ləvatar: «Ɗagay ka həlam vaval ta ma tuway aha na ka mey? Wawa na ma nara ha, ma mətsa ha kakay.»

⁴⁰ Ndaw a hana hay ma səŋgərafama. Arka ŋga ma badatərawa ndaw hay ba tabiyaha, da 'ay. A da zarawa na, baba ta maya ma bəzey, ka zəgawa ndaw ma kəsadama a hana na hay, me fuləkwey ka slam ma wawa na.

⁴¹ Ŋga ma zəga har ma dem ana, ma ləvar: «Talita kum!» Ka ləva na: «Dem eɗey, i ləvaka na, pərkey!»

⁴² Arka tsana dem ana hana me lətsey, me heley, hərway mevey ŋga a key na, kurow kava tsew. Tek ana a rəzlata ndaw hay kambəlaɓa.

⁴³ Arka Yezu ma katar say lele ma kwa ndaw ka da sərafa zlay. Arka, ma ləvatar ka vəlamar tek me zəmey a dem ana.»