Mark 4 - MEY HAYNA WAYNA MA YEZU KRISTE MA MEVEY

Yezu ma maladata bəzay ma guma ŋga ta ndaw me sləkey

¹ Arka satsa na, Yezu ma zlar ma tatəkadata ndaw hay, ka mey ma bəlay. Ndaw hay haɗadzidzay ma kusa hiya ka tsakay ŋga. Haɗadzaydzay ha ŋga me tsəley ma da ndzey da kombiwal ka ’ar ma bəlay. Ndaw ma kusa hiya na tey na, ma ndza hiya ka ɗakal ka mey ma bəlay ana.

² Ŋga ma tatəkadatara tek hay haɗadzidzay, ta ma maladatara ta tek hay. A ləvatar da me tetəkey ŋga na na:

³ «Dzəkam sləmay! Nəkafama, ndaw me sləkey ma bawa ma da sləkey.

⁴ Andza a sləkey aha na, haləfaw ma kuyafa ka tsakay tsəveɗ, ɗiyeŋ hay ma səmawa, ma ndama ba tabiyaha.

⁵ Sa na sa tey, ma kuyafa ka sek pəray, hahay ka slam ana haɗadzidzay dakay, ma pətsawa tsam tsam, hərway slam ana hahay haɗadzidzay kava dakay.

⁶ Andza pas ma sləlawa na, me ɓətey, hərway slasləlay ka vaw dakay na, me ŋgweley.

⁷ Sa na ma kuyafa 'ay ndak satsa, ndak ma gəlawa na, ma margaɗa ba, kwa ka sawata 'ar aza ka nəhey dzay kakay.

⁸ Sa na tey ma kuyam ka slam bobor ana tey, ma pətsawa, me gəley, ha me nəhey, ma nəha ha kava na, ka naŋgar asləta na kokurow makar, ka naŋgar tey na kokurow mukwa, ka naŋgar sa tey na temere»

⁹ Arka Yezu me ləvey: «Haɗaw sləmay ma ndaw ana ma tsənada daha na, ka tsənada!»

Yezu a maladata bəzay ma guma ŋga hay ta tek hay na ka mey?

¹⁰ Andza Yezu ŋga makəraŋga gədzah na, ndaw ma ɗawalam ana hay ta gawla ŋga kuraw kava tsew ana hay, ma tsəhafama bəzay ma guma ma maladatara ta meley ana.

¹¹ Arka ŋga ma ləvatar: «A kuray na, tek ma Slala ma Bay'ərlam na ma kəzla na hay na, ma vəla ha ba, ama ma ndaw ma 'ar bəla hay na, tabiya ma dzəka ha ta dzəkey,

¹² ma, aza, a zazəram, amana a da nəkadama ha kakay, a dzəkam sləmay, amana a da tsənadamaha kakay. Akwa dakay na, ka mbəɗadama mendzey ta ba na, a da safəmata yam.›

¹³ Yezu ma ləvatar sa: «Kuray ka tsənadama bəzay ma guma neney ma mala ha ta tek ana hay kakay na, azlakwa ka da tsənadəmata sa guma na hay ma mala ahiya te meley ana hay tabiya ha na, teŋgey tok?

Yezu a wandzaladatara bəzay ma guma ma mala ha ta ndaw me sləkey ana

¹⁴ ‹Ndaw me sləkey› a sləkey na, Guma.

¹⁵ Nəkafama ka na ka tsakay tsəveɗ ana hay, ka slam na, Guma na ma sləka ha na: andza taya ma tsənadama na, Setene ma sawa tsana, ma kuɗadatərawa guma na, ma sləka ha, da taya na ba.

¹⁶ andza ha satsana, nəkafama ka na ma sləka hiya ka sek pəray ana hay: taya na andza ma tsənadama Guma na ba tsana ma təɓama ta wuiya ha.

¹⁷ Amana, slasləlay ta dakay. Taya na, ndaw me mendzey nekəɗey dada na hay. Haya andza viya ma safatərawa, dakay na, a kadəmata ha banay ta ndaw hay, hərway ma Guma na na a təɗam.

¹⁸ Sana hay ma sləka hiya da 'ay ndak: taya na, ndaw ma tsənadama Guma na na,

¹⁹ ama me dzeley 'ar ma bəla neney, tek me sey ma zleley, ta sa ma tek a sana hay ma pətənam ndaw ana hay, a fuləkwam, a margaɗa Guma na, mandzar ka yey kava.

²⁰ Nəkafama ka na andza ma sləka hiya ka dala hayna, taya ka tsənadama Guma ba, taya ma təɓama, arka me yey: bəzay asləta kokurow makar, naŋgar kokurow mukwa, naŋgar sa temere.»

Yezu a malada bəzay ma guma ta waw, ta gwada

²¹ Arka Yezu ma ləvatar: «A sadəmərawa lalam na ma da hwerkwey uwaŋ kava, dakay ma pada a bəzay ma 'arŋgawa ɗaw? Ama a padama na, sey ka slam me luwey lalam ana təŋga, kakay ɗaw?

²² Hərway, tek na ma kəzla na hay na, a da nəkam, tek na, da masasuɗok ana hay na, a da ɓadama ta wuzla rəpas.

²³ Haɗaw sləmay ma ndaw ana ma tsənada daha na, ka tsənada!»

²⁴ Ŋga ma ləvatar: «Wam daw ka vaw ka tek a kwar ma tsənadəmata na hay. Gwadakwar ma wadəmatara tek a ndaw hay ana na, a da wadəmakwar a kuray ana na, ta ŋga. Ama a da vələmakwar adiya a fəna sa.

²⁵ Hərway ndaw ana tek aŋga daha na, a da vəlamar adiya. Ama kendzey ma ndaw ana dakay tey na, kwa na ketekwəɗey ana tekeɗe na, a da təɓadəmara ba.»

Bəzay ma guma ma haləfaw me pətsey ka ’ar vaw ŋga

²⁶ Yezu me ləvey: «Slala ma Bay'ərlam a da key na, kal kal andza ma ndaw me sləkey haləfaw a ley.

²⁷ A da key na ŋga ta dey, dakay na, ma naraha na, dəvaɗ ta rəpas adzay na, haləfaw a wey me pətsey ŋga, me gəley ŋga. A sərada teŋgey kakay.

²⁸ Tsufəmey aha na, ɓaslah aha tedehe ɗagay. Arka na, a sawa ta 'ar, a ndəɓey bəzey, arka a nəhey tok.

²⁹ Andza daw ana ka nəhey tsoy na, a zəgafama membey ka dəba zləna, har me tsuwey ka dəba seŋgey.»

Bəzay ma guma ma bəzey ma ɓəzaŋ

³⁰ Ŋga me ləvey: «I ka maladakwa Slala ma Bay'ərlam na, ta mey? Dakay na i ka maladakwa na ta bəzay ma guma waray ma da ɓada ŋga na na?

³¹ Kal kal na andza bəzey ma ɓəzaŋ. Andza a sləkamaha na, serɗeɗe ha ketewɗey da walaŋ ma haləfaw hay tabiyaha ka bəla, na ŋga.

³² Ama, andza ka sləkama tsoy na, a pətsawa, a gəley, a fənata sa ma vəɗe ma tek hay tabiyaha da ’ay dzerne na. A pey hawal haɗadzidzay, ha ɗiyeŋ ma ’ərlam hay a slafama mey key 'ay ta, da mezek ana»

Metetəkey ma ma la ha te meley ana

³³ Ta bəzay ma guma neney hay, Yezu ma maladatara ta tek hay haɗadzidzay andza ha ana na, ma tələkadatara mey ta Guma na, andza na ma ndaw hay ka slafama ma tsənadama tata na.

³⁴ A tsadatara na mandzara ka maladatara ta tek hay, kakay. Ama a gawla ŋga hay na, a wandzaladatara gəle.

Yezu a war 'ar a vavəray ta bəlay ma yam

³⁵ Pas ana ŋga na na, ma hakwaɗ na, Yezu ma ləvatar: «Tasakwama a diya naŋgar.»

³⁶ Andza ma mbəkadəmata ndaw a hana hay ma kusa hiya na ba na, ma ŋgəlama Yezu ba a kombiwal, ka tsakay ta. Kombiwal hay mekelehe hiya, ka tsakay ŋga daha.

³⁷ Vavəray ɗuhwa ha ma lətsawa. Yam me tsey ɗaŋgala ha, me dzuvey a kombiwal ata a hana a səpey me rəhey.

³⁸ Yezu na ma naha təŋga dok da dəba, ŋga ma pa 'ar aha ka tek me pey 'ar, a wey me nerey ŋga hay. Gawla ŋga hay ma parkadama, ma ləvamar: «Miter, la da zəɗam tok na, a kaka da 'ar tikay ɗaw?»

³⁹ Me pərkey ŋga na, ŋga ma babətsafa ka vavəray, arka ŋga ma ləvar a bəlay: «Ndzey tete, ka ɓəley zlay!» Arka na ɗeɗek, memeɗ me rey, kwa tek me ɓəley dasakay.

⁴⁰ Arka, Yezu ma ləvatar: «Ɗagay ka wasam andza neney na ka mey? 'Ar a kwar me pey, re tsaray dakay ɗaw?»

⁴¹ Taya na ma wasam kambəlaɓa, ha ma ləvam ka 'ar vaw ta na: «Ɗagay ŋga na na, way? Ma vavəray ta bəlay ma tsənamar sləmay ana na?»