Mark 3 - MEY HAYNA WAYNA MA YEZU KRISTE MA MEVEY

Yezu a ndeley ndaw ma mbara har aha, ta pas ma mesley

¹ Arka ŋga me fuləkwey a 'ay me ɗuley mey satsa. Ndaw ana daha, ma mbara har aha da huɗa.

² Ndaw hay tabiyaha ma zazərama waya aza Yezu a ndalada ndaw ana, ta pas ma mesley ɗaw? A kam andza ha na, hərway a wuɗam ma səpafama guma.

³ Yezu na ma ləvar a ndaw ana hana, ma mbara har ana: «Lətsey, sawa a wuzlah, a walaŋ ma ndaw hay.»

⁴ Arka ŋga ma ləvatar: «Mewey a ləvey na, teŋgey? Ta pas ma mesley na, hayna me key hahaya tsukuɗu, mala me key seweɗ ɗaw? Ma buwawa mesəfrey ma ndaw tsukuɗu, mala ma kəɗa ba vagay aha ɗaw?» Ama taya na tete tek ata.

⁵ Yezu ma nəkafata dey kəɗiya na, a tsar mevel ŋgey! Hərway mevel ata təɗo təɗo na. Arka ŋga ma ləvar a ndaw a hana: «Marɗada har.» Ŋga ma marɗada na, har aŋga me ndeley tsa.

⁶ Andza ma bawa ta ba tsana, Fariziyeŋ ta ndaw ma Erod hay, ma ŋgəlafama mawa, me ndzefey wewer, ma da zəɗada Yezu ba?

Ndaw hay haɗadzidzay ma kusəmawa ka slam ma Yezu

⁷ Yezu ma dam tek ata, andza gawla ŋga hay, ka mey ma bəlay. Arka ndaw hay haɗadzidzay ma səmawa da Galiley ma səpama. Arka satsa na ndaw hay ma səmawa da Zudey,

⁸ da Zeruzalem, da Idumey, da diya ma wayaŋ ma Zurdeŋ, da dala mandza Tir ta Sidoŋ. Ndaw hay haɗadzidzay ma səmawa ka tsakay ŋga, kavəday ma tek aŋga hay me key tabiya ha na.

⁹ Arka Yezu ma ləvatar a gawla ŋga hay, ka wadəmərawa vaw ta kombiwal asləta kavəday ma ndaw ma kusa na hay a da gaɗətsama ba.

¹⁰ Hərway ŋga ka ndeley ndaw dzedzey ana hay ba haɗadzidzay. Ndaw vaw ma tsafata na hay tabiyaha, ma tsəmawa ɗay ka tsakay ŋga, ma aza ka ləmamar.

¹¹ Andza ndaw ta mesəfrey ma zləɓa na hay da 'ar ana hay ma nəkadama Yezu na, a kəlam a həvam aŋga, ta me wudey aha waya: «Kah na Bəzey ma Bay ma Bəla.»

¹² Ama Yezu na ma watar ’ar, ma təkata, ma katar say haya haya, ma ka da ɓadama ŋga na na way zlay.

Yezu a padata gawla ŋga kurow kava tsew ana hay

¹³ Yezu me tsəley a ma mamba, ŋga me zəley ndaw ŋga me wuɗey ana hay. Taya ma dawam ka tsakay ŋga.

¹⁴ Ŋga ma padata gawla ŋga na kurow kava tsew ana hay, ka da ndzam dzaya, ma da sləradata ma da tələkey mey.

¹⁵ ta ma vəlatar slam har me ɓəley fakalaw hay.

¹⁶ Ŋga ma padata taya kurow kava tsew: Simoŋ na ma pafama mezəley Piyer ana.

¹⁷ Zak, bəzey ma Zebedey, ta Zaŋ malam ma Zak. Yezu ma pafata mezəley: Buwanerges, ka ləva na: Bəzey ma yam me rəvey hay.

¹⁸ Andrey, Filip, Bartelemi, Matiyew, Tomas, Zak bəzey ma Alfey, Tadey, Simoŋ ndaw zelot.

¹⁹ Ka zəgawa Zudas Iskariyot ndaw aŋga na ma da haɗəkada Yezu ba na.

Yezu a ɓəley fakalaw hay

²⁰ Andza ma mawa ma Yezu ba a mbaw na, ndaw hay haɗadzidzay ma kusəmawa sa, kwa bəzay a rafata me zəmey tek, dakay.

²¹ Andza ndaw ma 'ay ŋga hay, ma tsənadama ba andza ha na, taya ma səmawa, ma da zəgəraɓa tek ata a mbaw. Zləna a ləvam na: «'Ar a mbəɗar.»

²² Ndaw me sesəkey Mewey na ma hərɗəmawa da Zeruzalem ana hay, ma ləvam waya: «Belzebul da vaw ŋga.» «A ɓəley fakalaw hay na, ta gədaŋ ma bay ma fakalaw hay.»

²³ Ŋga ma zəlatərawa, ma tsadatara ta bəzay ma guma neney ma maladatara ta meley ana: «Ɗaɗa Setene a herey Setene tsəla ŋga na, ma mey mey?

²⁴ Haɗaw slala na ma tsa vaw aha ka 'ar vaw ŋga na na, slala na a slafa me ndzey kakay, seŋgey.

²⁵ Haɗaw veɗ 'ay ana ma tsa vaw aha ka 'ar vaw ŋgana na, veɗ 'ay ana a slafa me ndzey kakay seŋgey.

²⁶ Haɗaw Setene a lətsey ma kar vərom a vaw ŋgana na, haɗaw ma tsa vaw aha na, a slafa me ndzey kakay, na ŋga na na me ndəvey ŋga tsoy.

²⁷ Ndaw a slafa me fuləkwey 'ay ndaw gədaŋ aha, ma da həlawa zleley ŋga na, mandzara ka dzuwa ndaw ana hana gədaŋ ana ba ɗagay kakay seŋgey. Sey a dzuwa ndaw ana hana gədaŋ ana ba ɗagay. Azambay a sləla ’ay ŋga na tok.

²⁸ I ɓadakwar dərkana, a da safəmata yam ka bəzey ma ndaw hay tabiya ha, ka meŋgəsey ta ma tsaɗam Bay'ərlam ata dey haɗadzidzay ana.

²⁹ Ama haɗaw ndaw me tseɗey Mesəfrey Kokwoɗ ana tey na, a ndzey mandzara me sey yam ha varay varay: malay ma meŋgəsey ŋga na na, ma kozaha.»

³⁰ Yezu a tsey andza ha na, hərway a ləvafama: «Ŋga na, ta mesəfrey ma zləɓa na»

Ndaw ma veɗ 'ay ma 'ay Yezu na dərka na hay

³¹ May ŋga ta malam aŋga hay ma husəmawa. Taya ma lətsəma ha da bəla. Taya ma kəlafama ndaw ka Yezu, ka da zələrawa.

³² Ndaw ma kusa hiya na hay ma ndza hiya ka slam ma Yezu. Ma ləvamar: «Nəkafa, may ɗek ta malam eɗek hay taya da bəla, a səpəmaka ha.»

³³ Ŋga ma mbəɗatar kava: «Ɗagay may ɗaw ta malam aɗaw hay na, way hay?»

³⁴ Andza ŋga ma nəkafata dey ka ndaw ma ndza hiya teleleview ka slam aŋga na hay na, ŋga me ləvey: «Nəkafama may ɗaw, malam a ɗaw hay na, taya ekəɗey.

³⁵ Kwa way way me key tek, andza ma Bay ma Bəla me wuɗey ana na, nəkafama malam a ɗaw, malam a ɗaw diŋgwas ana, may ɗaw na ŋga tok.»