Mark 16 - MEY HAYNA WAYNA MA YEZU KRISTE MA MEVEY

Ŋgwas hay ka ɗay tsəvay

¹ Andza mesley me ndəvey ba na, Mariya ma Magdala, Mariya may ma Zak, ta Salomey, ma haɗəkam wurdey, ma da watsafərawa ka vagay ma Yezu.

² Zla ta ləmɗa, ta pas ma zlar me mbəsley meney ma luma tsəfəmey ana na, ma pas ma sləlawa ba na, taya ma dawam ka ɗay tsəvay.

³ Taya ma ləvam ka 'ar vaw ta na: «Ma da bədəŋgwaladandakwar beber ana, ka ɗay tsəvay ana na way?»

⁴ Andza taya ma tsakafadama dey na, a da nəkadama beber ana, ma bədəŋgwala ha ba, akwa na, beber ana, ɗuhwa ha dzay.

⁵ Andza taya ma fuləkwam a tsəvay ana na, ma nəkadama bəzey gawla na daha ma ndza ha ta har zəmay, ta zana ha babara ha ka vaw. Taya na, ma wasam ka vaw.

⁶ Ama, ŋga ma ləvatar: «Ka wasam zlay, ka səpam na Yezu ma Nazaret, na ma daradama ka 'ar ma tuwaw ana kakay ɗaw? Ŋga ka mbəley tsoy, ŋga ka sləna dasakay, nəkafama ka slam aŋga na, ma padama kava na.

⁷ Amana, dawam ləvəmatar a gawla ŋga na hay ta Piyer: 'Ŋga ka ndzafakwar ba ka mey a Galiley; ka da nəkadama na da huɗa, andza ma ŋga ma ləvakwar ana'.»

⁸ Taya ma bəmawa ba, ma hwam ba dəreŋ ta ɗay tsəvay ana, hərway a wasam aha kwasl kwasl, ma dawara hiaya. Kwa taya ka ɓadəmara a ndaw kakay, hərway a wasam.

Yezu a ɓatar vaw a gawla ŋga hay

⁹ Andza ma mbəlawa ŋga, ma zlemedew ma pas ma zlar me mbəsley meney ma luma na, Yezu ma ɓar vaw ka mey na, a Mariya ma Magədala. Na ŋga ma badərawa fakalaw hay tsəla da vaw ŋga na.

¹⁰ Ŋga tey na, ma daw ma ɓadatara a ndaw taya ma ndzəmawa, andza Yezu ana hay, ma ndza hiya da 'ay vagay, a tuwam aha na.

¹¹ Ama, andza taya ma tsənadama ba ŋga daha ta dey, ŋga ka nəkadərawa ba ta dey ŋga na, taya na a wuɗam ma pamar 'ar kakay.

¹² A dəba na na, ŋga ma ɓatar vaw ta ndaraw mekelehe, a ndaw hay tsew da walaŋ ata, a dawam aha a wuraw.

¹³ Andza taya ma məmawa, ma ɓadəmatara a sa na hay na, kwa a wuɗam ma pəmatar 'ar kakay atsa.

¹⁴ Arka, a dəba na na, ŋga ma ɓatar vaw a maslaŋ kurow kava kasləta na hay tok. A ɓatar vaw na, a zəmam aha tek. Ŋga ma katar say ka 'ar ata me pey kakay ana, ta mevel ata təɗo təɗo na. Hərway taya ka pəmatar 'ar, a ndaw ma nəkadəmərawa ka mbəlawa tsoy ana hay, kakay.

¹⁵ Arka, ŋga ma ləvatar: «Dawam ka bəla tabiyaha, tələkadama mey ta Mey Wayna, a tek na ma ka hiya ka bəla tabiyaha na.

¹⁶ Haɗaw ndaw ana ka pey 'ar ba, ka dzuhəɓadama ba na, a da buwama. Ndaw ana ka pey 'ar kakay tey na, a da dzuwama.

¹⁷ Nəkafama ka zeheɗ, ma da kəsadata ndaw me pey 'ar ana hay: ta mezəley ɗaw na, a da ɓəlam fakalaw hay. A da tsam guma ta mey gəle gəle waya hiya.

¹⁸ A da zəgam govaŋ ta har. Kwa ka sam tek meləgwey tekeɗe na, a da katar aha tek kakay. A da bazləhafəmata har ka ndaw dzedzey ana hay na, a da ndalam.»

¹⁹ Arka tok na, a dəba ma ma tsatar guma ŋga neney hay ba na, ma tsakafama Bay’ərlam Yezu a 'ərlam, me ndzey ta har zəmay ma Bay ma Bəla.

²⁰ Arka taya tey na, ma dawam ma taləkam mey tabiyaha, Bay’ərlam a key mber da vaw ta, da guma ta me tsey na tek ana hay a kam andza ha ta zeheɗ na, ma kəsadata na hay.