Mark 12 - MEY HAYNA WAYNA MA YEZU KRISTE MA MEVEY

Bəzay ma guma ma mala ha ta ndaw ma key mber da ley ma viŋe seweɗ ana hay

¹ Arka, Yezu ma zlar ma tsatar guma, ta bəzay ma guma ma mala ha ta meley ana hay: «Ndaw ana daha me rəvey viŋe a ley ŋga, ma zla zleɗ ana ba, me dzurey kulok ma ɗətsey, me zley slam tsaŋ ma dzaɗada ley ana; arka ma vəladatara a har ma ndaw ma mber ana hay. Arka na, ŋga ma daway təŋga.

² Arka na, andza har ana ma slawa na, ŋga ma slərawa gawla ma 'ay ŋga, ka tsakay ma ndaw ma kam mber da ley ana hay, ma ka vəlamar bəzey ma viŋe ana ma kəla ma ŋga na.

³ Ndaw ma kam mber da ley ana hay, ma zəgama gawla na hana, ma kəɗama, ma kəladama, ma daw har kənaha.

⁴ Ŋga ma kəlawa gawla ŋga mekelehe sa, taya na, ma kəɗama ka 'ar aŋga na, ta me tseɗey aha kava.

⁵ Ŋga ma kəlawa gawla mekelehe sa na, taya na, ma kəɗəma ba vagay aha. Arka sa, ma slərawa mekele hiya haɗadzidzay na, ma kəɗəmata sa na hay, sa na hay na, ma kəɗəmata ba vagay ahiya.

⁶ A da zərawa a ndaw ana na, bəzey ma mey 'ərev aŋga na, dada. Ŋga ma slərada ka tsakay ta, dok da dəba, ta me ləvey aha: ‹Bəzey ɗaw dada na, a da ɗəmar aha ndaw ba.›

⁷ Ama ndaw ma kam mber da ley ana hay, ma ləvam ka 'ar vaw ta na: ‹Neney na ndaw ma da zəmey 'ay ana. Səmawa! Kəɗakwa ba vagay aha na, aza i da zəmakwa.›

⁸ Taya na ma zəgama, ma kəɗama ba vagay aha, ma kəladərawa ba da ley ma viŋe ana, a bəla.

⁹ Bay ma ley ma viŋe ana, a da kadata na, teŋgey? Ka da sawa ba na, a da kəɗata ndaw ma kam mber ana hay ba vagay ahiya, arka a da vəladatara ley ma viŋe ana, a har ma ndaw mekele hiya.

¹⁰ Kuray ka dzaŋgama bəzay ma guma neney, da Mewindey Kokwoɗ ana hay na, tikay, ɗaw? Ŋgwa aŋga na ndaw me zley 'ay hay ma kəladama ba na na, ma da tərey ŋgwa ma talkomere ma 'ay ana na ŋga ha.

¹¹ Na ŋga na na mber ma Bay’ərlam: ka slam dey lakwa na, tek me rəzley ndaw aha.

¹² A səpama ma da zəgama, amana a wasam ta ndaw ma kusa hiya na hay. A səradama dey ta kava, a tsey bəzay ma guma neney ma mala ha ta meley ana, ka taya. Arka taya ma mbəkadəmata, ma dawam tek ata.

Dzaŋgal me vəley a Sezar

¹³ Taya ma sləram Fariziyeŋ hay, ta ndaw ma Erod hay nekəɗey, ka slam ma Yezu, ma aza ka ŋgafama gendeɗ, da bəzay ma guma hay.

¹⁴ Taya ma səmawa, ma ləvamar: «Miter, la səradama kah na, ka tsey guma na ɗerre, ka wesey ta ndaw tikay, hərway ɗuhwa ma ndaw na, a nəkaka a dey tikay. Ama, ka tatəkadatara a ndaw hay na, tsəveɗ ma Bay ma Bəla da dərka na. Äadandar ɗagay, ma vəladara dzaŋgal a Sezar na, mewey lakwa a vəley tsəveɗ tsukuɗu, a vəley kakay ɗaw? La ka vəlam tsukuɗu, la ka vəlam zlay ɗaw?.»

¹⁵ Ama ŋga na a sərada mbaɗa mbaɗa ta, ma ləvatar: «Ka ŋgafəmaya gendeɗ na, ka mey? Aŋga zəgəmiyawa sulay ana asləta, i ka nəkafa ɗagay!»

¹⁶ Taya ma zəgəmərawa asləta. Yezu ma ləvatar: «Foto neney, ta mewindey a neney kava na na, ma ŋgway?.» Taya ma mbəɗamar kava: «Ma Sezar.»

¹⁷ Yezu ma ləvatar: «Tek ma Sezar na, vəladəmara a Sezar ana təŋga. Tek ma Bay ma bəla na kandzara ma Bay ma Bəla ana təŋga.» Taya ma ndza hiya ka guma ŋga neney na, ma rəzla hiya kambəlaɓa.

Ndaw ma mətsa na hay a da mbələmawa

¹⁸ Sadusieŋ hay ma səmawa ka tsakay ma Yezu. Taya a ləvam na, kendzey ndaw ka mətsey ba na, a mbəlawa kakay. Taya ma tsəham bəzay ma guma neney ka Yezu:

¹⁹ «Miter, Moyiz a windərawa ŋga lakwa na: kendzey haɗaw ndaw malam aŋga daha ta ŋgwas aha, ka mətsey ba, mandzara ka yawa bəzey na, a zəga madakway ana, a yadərawa bəzey a malam aŋga hana na…

²⁰ Ndaw hay daha ta malam ata hay tsəla. Marakway ana, me zəgey ŋgwas, me mətsey, mandzara ka yadərawa bəzey.

²¹ Na metsetsew ana ma zəga ŋgwas ana, me mətsey, mandzara ka yadərawa bəzey atsa. Na mamakar ana, andza ha satsa.

²² Ha ma ndaslam tsəla ta hiya, mandzara ka yadəmərawa bəzey. A dəba ta na hana tabiyaha na, ŋgwas ana me mətsey tiyatsa.

²³ Ta pas ma ma da mbəlawa ma vagay hay na, ka da mbələmawa ba na, a da ndzar ŋgwas aha na, a way? Hərway tsəla ta hiya, ka zəgama ba ka ŋgwas aha sana.»

²⁴ Yezu ma ləvatar: «Ka tsam andza ha na, mavəday kwa ka səradama Mewindey Kokwoɗ ana hay kakay, kwa ma slafa ma Bay ma Bəla kakay, ka zləgam na hərwuiya.

²⁵ Akwa na, kendzey andza ndaw hay ka da mbələmawa ba na, ndaw a da zəgey aha ŋgwas dasakay, ŋgwas tey a da daw aha 'ay zel dasakay. Ama, ma da ndzey na, andza madurlam hay da 'ərlam.

²⁶ Ka guma ma ma da mbəlawa ma ndaw ma mətsa na hay na, kuray ka dzaŋgama da ɗeriwel ma Moyiz, ka bəzay ma guma ma waw me təɓey da 'ay ndak ana na, Bay'ərlam a ləvərawa na, teŋgey ‹Yah na Bay'ərlam ma Abraham, Bay'ərlam ma Izak, Bay'ərlam ma Zakob›?

²⁷ Ŋga na Bay'ərlam ma ndaw ma mətsa na hay kakay, ama, ŋga na ma ndaw ta dey ana hay. Kuray na, ka zləgam ba kambəlaɓa.»

Mey ma mewey na tsəfəmey ana

²⁸ Ndaw me sesəkey Mewey ana daha, ma gurafa. Äa ŋga ka tsənada ba a kəɗam aha waway arka ma nəka na, Yezu ka mbəɗafatara ba kava kassla. Ŋga ma tsəhafa: «Da walaŋ ma mey ma mewey hay tabiyaha na, na tsəfəmey ana na, na waray?»

²⁹ Yezu me mbəɗey kava: «Na tsəfəmey ana na: Dzəkey sləmay Israyel, Bay’ərlam lakwa Bay ma Bəla na, ŋga Bay’ərlam asləta.

³⁰ Ka da wuɗa Bay’ərlam a ɗek Bay ma Bəla na, ta mevel eɗek adzay, ta mezek eɗek adzay, ta me dzeley 'ar eɗek adzay, ta gədaŋ eɗek adzay tabiya ha.

³¹ Metsetsew ana na, ŋga kəɗey: Ka da wuɗa ndaw ka tsakay ɗek ana na, kal kal andza vaw ɗek ana. Mey ma mewey mekele hiya ɗuhwa ha, ma fəna neney hay na, dasakay.»

³² Ndaw me sesəkey Mewey ana hana, ma ləvar: «Haya ha bəza kakay Miter, kah ka tsərawa ba təɗe dərka: Ŋga na, ŋga asləta, mekelehe a dəba ŋga na dakay,

³³ arka ma wuɗa Bay'ərlam ta mevel eɗek adzay, ta ma sərada tek eɗek adzay, ta gədaŋ eɗek adzay, ma wuɗa ndaw ka tsakay ɗek ana, kal kal andza vaw ɗek ana na, a fəna ma təlar gənaw, ta ma kar kuley.»

³⁴ Yezu ma nəkada ŋga ka mbəɗafərawa ba kava ta ma səra ’ar aha na, ma ləvar: «Kah na dəreŋ ta Slala ma Bay'ərlam sakay.» Kwa ndaw a slafa ma tsəhafa guma sakay.

Ndaw Bay'ərlam ma vahara 'ar ana ta David

³⁵ Arka, Yezu ma zlar ma tatəkadata ndaw hay da 'Ay me key Kuley, ŋga me ləvey: «Ɗagay, ɗaɗa ndaw me sesəkey Mewey hay a ləvam, waya Ndaw ma vaha 'ar ana bəzey ma David na, ma mey mey?

³⁶ David ana ta 'ar aŋga, ta gədaŋ ma Mesəfrey Kokwoɗ ana na, ka ləvey ba, andza neney: ‹Bay ma Bəla a ləvar a Bay’ərlam a ɗaw: ndzey a koriwal, ta har zəmay ɗaw, ha aza i padata ndaw dugwan eɗek hay ba, a huɗa sek eɗek ɗagay.›

³⁷ David ana ta 'ar aŋga na na, a zəla ‹Bay’ərlam› tok na; azlakwa, a da key bəzey ŋga ha na, teŋgey seŋgey?» Ndaw ma kusa hiya haɗadzidzay ma dzəkafama sləmay na, a datar 'ar.

Yezu ma tsafata ka ndaw me sesəkey Mewey hay

³⁸ Da ma tatəkadata ŋga na, Yezu me ləvey: «Wam daw ka vaw, ka ndaw me sesəkey Mewey hay, a wuɗam na, me heley ta dawra ahiya terere, ma ka tsəmatar guma, ka tsəmatar ka slam me kusey hay.

³⁹ Da 'ay me ɗuley mey na, a wuɗam me ndzey ka koriwal tsəfəmey ana hay. Da magurlam na slam tsəfəmey ana hay.

⁴⁰ Taya ndaw me sesəɓey madakway hay tok na, ama na, me ɗuley mey na zaɗaɗa; ma da dzuwey ta na na kambəlaɓa»

Tek ma madakway me vəley ana

⁴¹ Yezu ma ndza ha soŋsoŋ ta slam me kuyey sumkwo na, ŋga ma nəkafata ka ndaw hay a kuyam aha sumkwo, a slam me kuyey sumkwo na, teŋgey. Ndaw zleley ana hay haɗadzidzay a kuyam sumkwo haɗadzidzay.

⁴² Madakway ana daha, mbarga ha, ma sawa me kəley sisey ŋga hay tsew a huɗa.

⁴³ Yezu ma zəlata gawla ŋga hay, ma ləvatar: «I ɓadakwar dərka na, madakway a neney mbarga na na, me kuyey sumkwo na, a fəna sa ma ndaw a neney hay, ma kuyama na, tabiyaha.

⁴⁴ Hərway ndaw a neney hay ma vəlam ana tabiyaha na, a hələmawa na, ka bay ana. Ama ŋga na, ta mbarga ŋga dzay na, ŋga ka hələrawa ba, ma da pada tek aŋga tabiyaha me ndzefey ana, tek aŋga tobiya ma da ndzada na.