Mey Hayna Wayna ma Bay Yezu Kriste Luk 6 - MEY HAYNA WAYNA MA YEZU KRISTE MA MEVEY

Yezu a tsey ka mesley

¹ Arka pas ma mesley me tsetsew ana ma kiya tsəfəmey ana andza a tazlaram aha ta ley daw na, gawla ma Yezu hay ma sərɓam ’ar ma daw, ma gwahama ta har, ma pəɗam.

² Fariziyeŋ hay daha nekəɗey ma ləvəmatar: «Ɗagay ka kam tek na ma mewey lakwa me vəley tsəveɗ ta pas ma mesley kakay ana na ka mey?»

³ Yezu ma mbəɗatar kava: «Ɗaɗa kuray ka dzaŋgama tek ma David me key, ta ndaw aŋga hay andza may ma tsafata na tikay ɗaw?

⁴ Ŋga me fuləkwey a 'Ay ma Bay ma Bəla, me zəmey peŋ ma 'ar kuley, ma vəlatar a ndaw aŋga hay. Peŋ ana na ɗaɗa slam har ma ndaw me zəmey na dakay, sey baba me key kuley, taya dada.»

⁵ Arka ŋga ma ləvatar sa: «ŋga na miter me mesley Bəzey ma Ndaw na.»

Yezu a ndeley ndaw ana daha ma ŋgwala har aha

⁶ Ta pas ma mesley ana daha na, ŋga ma fuləkwey a 'ay me ɗuley mey, ma tatəkadata ndaw hay. Ndaw ana daha da huɗa tok na har zəmay ŋga ma mbara ha.

⁷ Ndaw me sesəkey Mewey hay, ta Fariziyeŋ hay ma zazərama Yezu, waya aza a ndeley ndaw ta pas ma mesley ɗaw, ma aza ka da ndzafafama bəzay ma guma.

⁸ Ama ŋga na a sərada tek ata me dzeley ana, ma ləvar a ndaw a hana na ma mbara har ana: «Lətsey, sawa a wuzlah ma ndaw hay.» Ŋga ma sawa me lətsey ta lətsey.

⁹ Yezu ma ləvatar: «I tsəhafakwar ekəɗey, ta pas ma mesley na, mewey lakwa a vəley tsəveɗ me key haya ha tsukuɗu, me key seweɗ ɗaw? Ma buwey mendzey ma ndaw tsukuɗu, ma zəɗada ba ɗaw?»

¹⁰ Ma zazurata tabiyaha teleleview na ma ləvar a ndaw ana: «Marɗada har.» Ŋga me key andza ha, har aŋga me ndeley.

¹¹ A tsatar mevel kambəlaɓa, ma tsadama ka ’ar vaw ta na ka tek ana ma da kamar a Yezu ana.

Yezu a weley gawla ŋga kurow kava tsew ana hay

¹² Da meney ana ŋga na na hay na, Yezu ma daw a mamba ma da ɗulawa mey, ha ma nawa kem da huɗa, a ɗular aha mey a Bay ma Bəla.

¹³ Me dey me tseɗey na, ŋga ma zəlata gawla ŋga hay, me weley da huɗa kurow kava tsew, na ŋga ma vəlatar mezəley maslaŋ hay ana:

¹⁴ simoŋ na ma pafa mezəley Piyer ana, malam aŋga na Andrey; Zak ta Zaŋ, Filip, Bartelemi,

¹⁵ Matiyew, Tomas, Zak bəzey ma Alfey, Simoŋ, na ma gawla ley ana;

¹⁶ Zude bəzey ma Zak, ta Zudas Iskariyot ndaw ma heɗəkey ndaw.

Yezu a tetəkadata ndaw hay

¹⁷ Ma harɗawa ta ba dzaya na, Yezu me lətsey ka slam ana daha faɗaɗa ha, ta gawla ŋga hay ma kusaya haɗadzidzay ta ndaw ma səkway hay ma kusa hiya vam vamma: ndaw ma Zudey hay tabiyaha, ma Zeruzalem hay ta wuraw ma mey ma bəlay mandza Tir ta Sidoŋ.

¹⁸ A səmawa na, ma da pafa sləmay ka guma ŋga na, ma ka ndaladatara dzedzey ta hay. Ndaw ma sam banay ta mesəfrey ma zləɓa na hay ma ndalam.

¹⁹ Ndaw ana tabiyaha ma kusa hiya na na a səpam ma ləmamar, kavəday gədaŋ a bawa da vaw ŋga, a ndaladata tabiyaha.

Yezu a tatəkadata ndaw hay ka 'ar ma mamba

²⁰ Yezu ma tsakafada dey ma nəkafata ka gawla ŋga hay na, ma ləvatar: «Kuray eɗey mbarga na hay na kuray da wuiya zləna, Slala ma Bay'ərlam ma vəla ha ma kwar.

²¹ Kuray eɗey may ma tsafakwar ekəɗey ana hay na, kuray da wuiya zləna, ka da rəham. Kuray eɗey ma tuwam ekəɗey ana hay na, kuray da wuiya zləna, ka da səŋgəram.

²² Ka da ndzam da wuiya, kendzey andza ndaw hay a ŋgəladəmakwar dey kakay, a warzləmakwar ba, a tsaɗəmakwar, kendzey andza ndaw a sləfa mezəley kwar sakay andza magaray hərway ma Bəzey ma Ndaw na,

²³ pas ana ŋga na na ka mbafakwar wutsafafa, gərvam, hərway nəkafama, masa kwar da 'ərlam na ɗuhwa ha dzay. Hərway baba ta na hay na, a kadəmatərawa ndaw sek hay na andza ha atsa.

²⁴ Ama kuray ndaw zleley ana hay, tuwam vaw kwar hərway ma mey na, zləley kwar a bədadakwar aha.

²⁵ Kuray eɗey ma rəha hiya ekəɗey ana hay na, tuwam vaw kwar, hərway may a da tsafakwar. Kuray eɗey ma səŋgəram ekəɗey ana hay na, tuwam vaw kwar, hərway ka da ndzam na, andza da 'ay vagay, ka da tuwam.

²⁶ Tuwam vaw kwar kendzey andza ndaw hay tabiyaha a ləvam kuray haya ahiya. Akwa na baba ta na hay a kadəmatərawa ta ndaw sek haya kakay ana hay na, andza ha.

Yezu a tsey ka me wuɗey ndaw dugwan

²⁷ Ama i ləvakwar a kuray eɗey ma pafəmaya sləmay ana hay na, wuɗəmata ndaw dugwan a kwar hay, kəmatar hayaha a ndaw ma ŋgəladəmakwar dey kakay ana hay.

²⁸ Pəsafəmata mey ka ndaw ma kəlafəmakwar 'ar ana hay, ɗulafəmata mey ka ndaw ma ŋgələmakwar bəzay ana hay.

²⁹ Ndaw ka kəlaka marawa ba ka tsakay sləmay na, ɓadara tsakay naŋgar. Ndaw ka təɓadaka dawra ɗek ba na, vəladara ta gabak ana dzay.

³⁰ kwa way way a tsəhafaka tek na, vəlar, ndaw ka təɓadaka tek eɗek ba na, ka da tsəha zlay.

³¹ Andza tek a kwar ma wuɗam ndaw hay ka kadəmakwar ana na, kadəmatara a taya na andza ha tey.

³² Haɗaw ka wuɗam na, ndaw ma wuɗəmakwar ana hay dada na, ɗagay ka hutam masa na ka na waray sa waray? Hərway kwa ndaw ma ŋgəsa na hay tekeɗe na, a wuɗəmata ha ndaw ma wuɗəmata na hay tey, seŋgey.

³³ Haɗaw ka kəmatar hayaha na a ndaw na ma kəmakwar haya ha na hay na, ka hutam masa na ka na waray sa waray? Ndaw ma ŋgəsa na hay tekeɗe na, a kam aha andza ha tey seŋgey.

³⁴ Haɗaw ka da daɗəmatar tek na sey a ndaw na kuray ma səradama a da madəmakwar ba na hay na, ka hutam masa na ka na waray sa waray? Kwa ndaw ma ŋgəsa na hay tekeɗe na a dadeɗəmatar aha tek a ndaw ma ŋgəsa na hay tey seŋgey, ma ka madəmatara kal kal andza ha.

³⁵ Amana wuɗəmata ndaw dugwan a kwar hay, kam tek hayna hay, dadeɗamar tek mandzara me dzeley ka da mawa. Arka na ka da ndzafam masa kwar ɗuhwa ha, ka da təram na bəzey ma Bay'ərlam tsaŋ da mekekəle ŋga ahiya, hərway ŋga na a wuɗata ndaw me pətey har ana hay, ta ndaw seweɗ ana hay dzay.

Ka da kam sariya ka ndaw zlay

³⁶ Təram ndaw ma wura har ahiya andza Baba kwar ma wurey har ana.

³⁷ Ka da kam sariya ka ndaw zlay, aza ka da kafəmakwar sariya zlay tey. Ka da dzuwam ndaw zlay, aza ka da dzuwəmakwar zlay tey. Safəmata yam ka ndaw hay, aza a ka da safəmakwar yam tey.

³⁸ Vəlam tek, aza a vələmakwar tey. A da wama na mewey hayna, ma ɗaɗəka ha, ma gagəsa ha, zerre, a da mbəɗadəmakwar ka mey ma zana kwar ana, hərway gwada kwar ma wadəmatara tek ana na, a da wadəmakwar na da huɗa tiyatsa.»

³⁹ Ŋga ma tsatsar ta bəzay ma guma neney ma mala ha ta meley ana satsa: «Ndaw wulaf a slafa me kəsey ndaw wulaf tsəla ŋga ɗaw? Tsetsuwe taya na a kuyam a tsəvay kakay ɗaw?

⁴⁰ Bəzey me tetəkey na a fəna miter aŋga ɗaw? Bəzey ana ka tetəkey teŋgey teŋgey na, a da key na andza miter aŋga na.

⁴¹ Ɗagay ka zerɗey guzer da dey ma malam eɗek na ka mey? dugwazl da dey ɗek ana na ka sərafa ha təŋga ɗaw?

⁴² Ɗagay ka ləvar a malam eɗek: malam a ɗaw, ɓada i zəgadəkawa guzer ba da dey na teŋgey? Duŋgwazl da dey ɗek ana na, ka sərafa ha təŋga ɗaw? Kah na ka dzeley 'ar kakay zləna, kuɗa duŋgwazl ba da dey ɗek ana ɗagay, azambay ka nəkada dey haya hayaha, ma da zəgadərawa guzer da dey ma malam eɗek ana.»

Vəɗe ma tek hayna, ta na haya kakay ana

⁴³ «Ɗaɗa vəɗe ma tek hayna a yey bəzey haya kakay ana kakay. Na haya kakay ana tey na, a yey bəzey na hayna kakay tey.

⁴⁴ Akwa vəɗe ma tek waray waray na a səradama na, ka bəzey ŋga na. Ɗaɗa ndaw ka ŋgəley bəzey ma gudav ba da’ay ndak ɗaw? Ɗaɗa ndaw ka ŋgəley viŋe da vəɗe hweleŋ ɗaw?

⁴⁵ Ndaw kokwoɗ aha na, haya ŋga a bawa na, da mevel aŋga a hana kokwoɗ hana. Ndaw hayakakay ana tey na, tek aŋga haya kakay ana, a bawa na, da mevel aŋga na hana haya kakay ana tey. Hərway huɗa mey a təkərey na tek na, ma bawa da mevel ana.»

'Ay hay daha tsew

⁴⁶ «Ɗagay ka zələmaya ‹Bay’ərlam, Bay’ərlam› na, azlakwa ka kəmata tek andza na ŋga ɗaw me ləvey ana sakay na ka mey?

⁴⁷ Mendzey ma ndaw tabiyaha ma sawa ka tsakay ɗaw, ma pam sləmay ka guma ɗaw ana hay na, ma kama andza ha na, i ɓadakwar, ma malada ŋga na na ta way.

⁴⁸ A nəkam na kal kal andza ndaw me zley 'ay, ma zləla kasl ka gasah, ma pərawa bəzay ŋga na kava, andza yam ma sawa na, papəlay ɗuhwaha ma vawa, amana ka slafa ma mbəzlada kakay, kavəday ma ka ha haya haya ha.

⁴⁹ Ama ndaw ma tsənadama guma ɗaw, me key andza ha kakay tey na, kal kal andza ndaw me key 'ay ɓah ka dala, mandzara ka zləla bəzay ŋga na. Andza papəlay ma vawa tsana, ŋga me mbəzley, me mbəzley ma ’ay ana a da key na hele hele.»