Mey Hayna Wayna ma Bay Yezu Kriste Luk 5 - MEY HAYNA WAYNA MA YEZU KRISTE MA MEVEY

Yezu a zəley gawla ŋga tsəfəmey ana hay faɗ

¹ Arka pas ana daha na, Yezu ma ndza ha ka ɗakal ma Zenezaret. Ndaw hay ma kusəmawa ka tsakay ŋga vam vamma, ma da pey sləmay ka mey ma Bay ma Bəla.

² Yezu ma nəkada kombiwal ana hay daha tsew, ma ra hiya ka mey ma bəlay ana. Ndaw me həley kəlef ana hay ka harɗəmawa ba da huɗa, a pərəmata ha zəva ta hay.

³ Yezu me tsəley a kombiwal asləta da walaŋ ana, kombiwal ana na ma Simoŋ. Ŋga ma tsəhafa ma ka gurada nekəɗey a yam. Andza ma ndza ha ba da kombiwal na, ŋga ma tatəkadata ndaw ma kusa na hay.

⁴ Andza ŋga ka ndəvada guma ŋga tsoy me tsey na, ma ləvar a Simoŋ: «Gurada kombiwal a 'ərev ma yam, kəladəmata zəva kwar ana hay a yam na, həlam kəlef tok.»

⁵ simoŋ ma mbəɗar kava: «Miter, la ma yam vaw kem dəvaɗ aha kava na, kwa la ka həlam kakay seŋgey. Ama ekəɗey ka guma ɗek ma tsaya na na, i da kəladata zəva na hay.»

⁶ Taya ma kam andza ha na, taya ma hələmawa kəlef ana haɗadzidzay, ha zəva ta hay a ŋgərɗam aha.

⁷ Taya ma kəmatəraɓa ta har a dzam ata hay da kombiwal naŋgar, ma ka səmawa ka dzənəmata. Taya ma səmawa, ma rəhadəmata kombiwal hay tsetsuwe ta hiya, ha a bawatsam a yam.

⁸ Andza Simoŋ Piyer ma nəkada ba andza ha na, ŋga me gərdey ka slam sek ma Yezu, ma ləvar: «Bay’ ərlam, gurey ba ka tsakay ɗaw, hərway yah na ndaw ma ŋgəsa ha!»

⁹ Kəlef a hana na ma həlam haɗadzidzay ana na, a tsəlafa zluwer ka Piyer, ta sa ma ndaw ka tsakay ŋga na hay tabiyaha.

¹⁰ A wasadata bəzey ma Zebedey hay tiyatsa, andza Zak ta Zaŋ na ma kam mber andza Piyer ana. Yezu ma ləvar a Simoŋ: «Ka wesey zlay, ekəɗey na ka da həley na ndaw hay ka dəba.»

¹¹ Taya ma madəmatərawa kombiwal ata hay ka mey ma bəlay, ma mbəkadəmata tek ata hay ŋguɗek, ma səpamar bəzay a Yezu.

Ma bəzləmey ma ndaw malawa na daha

¹² Arka andza Yezu ŋga da wuraw asləta da walaŋ ma sa ma wuraw ana hay na, ndaw ana daha malawa ha. Andza ŋga ma nəkada Yezu na, ŋga ma kəlar ka dala, ma ɗular mey andza neney: «Bay’ərlam a ɗaw, kendzey ka wuɗey na, ka slafa ma bazləmafaya ba seŋgey!»

¹³ Yezu ma tsakafada har, ma ləmar, me ləvey: «I wuɗey, tərey ma bazləma ha na» Deŋe ka slam ana tsana, malawa na ma ndalafa.

¹⁴ Arka Yezu ma kar say ma ka da ɓadara a ndaw zlay: «Daway dzadzak na da ɓadara vaw a baba me key kuley, vəlada tek me bəzləmey vaw ɗek ana andza na ma Moyiz me ləvey ana, aza ka da təratar seydewe ha.»

¹⁵ A tsafama na adiya adiya a fəna sa, ndaw hay haɗadzidzay ma kusam ka tsakay ŋga, ma da pafa sləmay, ma ka ndaladatara dzedzey ta hay.

¹⁶ Arka ŋga na ma wutsey a slam palah aha, ma da ɗulawa mey.

Yezu a ndeley ndaw ana daha ma mbara vaw aha

¹⁷ Arka andza ta pas ana daha a tatəkadata ha ndaw hay na, da walaŋ ma ndaw ma kusa hiya na hay na, Fariziyeŋ hay ta ndaw me sesəkey Mewey hay daha. A kusəmawa 'ar na da wuraw hay tabiyaha: da Galiley, da Zudey ta Zeruzalem. Ma Slafa ma Bay’ərlam a key aha mber da vaw ŋga ma dzəna ma ndaladata ndaw hay.

¹⁸ Ndaw hay daha ma husəmawa, ma zəgəmawa ndaw ana daha ma mbara vaw aha, ta merdek. A səpam ma fuləkwada ma da pada ka slam dey ŋga;

¹⁹ arka kavəday ma ndaw hay ma kusa hiya kambəlaɓa na na, a səradama ka fuləkwadama ta waray sakay na, taya ma tsəlam ka 'ar ma 'ay, arka ta walaŋ ma tuwaw ma papaya na hay na, ma harɗadama te merdek adzay a wuzlah ma ndaw hay, ka mey dey ma Yezu.

²⁰ Ŋga ma nəkada me pey 'ar ata na na, ŋga me ləvey: «Meŋgəsey ɗek hay ma sa yam ahiya ba.»

²¹ Ndaw me sesəkey mewey hay ta Fariziyeŋ hay ma zlamar ma dzalam: «Ɗagay neney me tseɗey Bay'ərlam ana na ndaw mey? Ma slafa me pəsey mey ka meŋgəsey na way? Sey Bay ma Bəla ana asləta dada sana.»

²² Ama Yezu ma sərada me dzeley 'ar a ta na ma mbəɗatar kava: «Ɗagay ka dzalam andza ha da mevel a kwar na ka mey?

²³ Ɗagay ger aha da huɗa na na waray? Me ləvey: meŋgəsey ɗek hay ma sa yam ahiya ba na tsukuɗu, dakay na me ləvey: lətsey heley ana ɗaw?

²⁴ Ana təɗe, ma kuray ka sərafama na, Bəzey ma ndaw na, slam har aŋga daha ka dala me sey yam ka meŋgəsey hay na, - Ŋga ma ləvar a ndaw a hana ma mbara vaw ana - i ləvaka: lətsey, zəga merdek eɗek na, daway a mbaw.»

²⁵ Ka slam ana deŋe tsana, ndaw ana hana me lətsey ma dey ta na, ŋga ma zəga tek aŋga hana na ma nafar andza arŋgawa ha na, ma daway təŋga a mbaw, ta me Səmbərey Bay ma Bəla aha.

²⁶ A rəzlata kambəlaɓa tobiya ta ha, ma səmbərama Bay ma Bəla. Ta me wesey aha na, taya ma ləvam: «Teseɗey na lakwa ka nəkadakwa tek me gegətsey 'ar ana hay ba tok.»

Yezu a zəley Levi

²⁷ A dəba na na, Yezu ma bawa, ŋga ma nəkada ndaw me tsekeley dzaŋgal ana daha a zəlamar Levi. Ŋga ma ndzaha da biraw me tsekeley dzaŋgal. Yezu ma ləvar: «Səpaya bəzay.»

²⁸ Ŋga me lətsey, ma mbəkadata tek aŋga hay tabiyaha na, ma səpar bəzay.

²⁹ Levi me tey hwahwaɓay haɗadzidzay da ’ay ŋga. Ka slam me zəmey tek na taya haɗadzidzay, ndaw me tsekeley dzaŋgal hay, ta sa ma ndaw ma səmawa ka tsakay ta na hay.

³⁰ Fariziyeŋ hay, ta ndaw me sesəkey Mewey ta hay ma gwaŋguɗam mey, ma ləvəmatar a gawla ma Yezu hay: «Ɗagay ka zəmam tek, ka sam tek andza ndaw me tsekeley dzaŋgal hay, ta ndaw ma ŋgəsa na hay na ka mey?»

³¹ Yezu ma mbəɗatar kava, ma ləvatar: «Me səpey ndaw ma sidem na ndaw dzedzey ana hay zləna, ndaw zozoy ana hay kakay.

³² I sawa na ma da zəley ndaw dzerey ana hay kakay, amana ndaw ma ŋgəsa na hay, ma aza ka mbəɗadama mendzey ta hay ba tey.»

Yezu a tsey ka guma ma sumaya

³³ Taya ma ləvamar: «Gawla ma Zaŋ hay, a kam aha sumaya zarra, a ɗulam, ma Farisieŋ hay andza ha satsa, ama gawla ɗek hay na a zəmam tek, a sam tek ata hay na ka mey?»

³⁴ Yezu ma ləvatar: «Ɗagay na ka slafama ma kadata sumaya ta ndaw ma wuna na hay da magurlam me zəgey kokwa kendzey andza zel ma kokwa na ŋga daha ta taya ɗaw?

³⁵ Ama ta pas andza aza ka da zəgafəmata zel ma kokwa na ba tok na, arka na azambay a kam sumaya ta pas ana ŋga na na hay tok.»

Na wayna ta na gurmana

³⁶ Yezu ma maladatara ta bəzay ma guma mekelehe sa: «Ɗaɗa ndaw ka tsawa zana wayna ma da tapada ka na gurma na ɗaw? Dakay na ka tsəmərawa na wayna tsoy na, arka na, na hana ma tsəmərawa ka na wayna na na, a da dam aha ka vaw ta na gurma na kakay seŋgey.

³⁷ Ɗaɗa ndaw ka mbəɗey zom lelem aha a kulom madzahway aha ɗaw? Dakay na zom lelem ana a mbəsley na, a nɗuhwada kulom ana hay ba, arka na, zom a da vey, kulom ana hana hay na ma zəɗa hiya tsoy.

³⁸ Ama haya a dafa na, ma mbəɗada zom lelem ana na, a kulom waya ahiya.

³⁹ Kwa way way ka sey zom ma mbəsla na ba na, na lelem ana a sar sakay, hərway a da ləvey na, ma tsəray na, na ma mbəsla na.