Mey Hayna Wayna ma Bay Yezu Kriste Luk 23 - MEY HAYNA WAYNA MA YEZU KRISTE MA MEVEY

Yezu ka 'ərdey ma Pilat .

¹ Arka taya tobiya ta ha, ka maslətaha ma lətsam, ma dadama ka slam dey ma Pilat.

² Arka, ma tsafama maləwaɗay so ha, andza neney: «La ndzafama ndaw a neney na, a həladata ndaw ma dala la hay ka vaw. A təkata ndaw hay ba ma vəlar dzaŋgal a Sezar, ŋga na, a ləvey na, waya: yah na Ndaw ma vaha 'ar ana, bay ɗuhwa ha.»

³ Pilat ma tsəhafa: «Kah na bay ɗuhwa na ma Zuif hay ɗaw?.» Yezu ma mbəɗar kava: «Kah ana, me ləvey andza ha.»

⁴ Pilat ma ləvatar a baba ɗuhwa na me key kuley ana hay, ta ndaw ma kusa na hay: «Yah na, i ka ndzefey meŋgəsey, ɗa ma dzuwada ndaw a neney tikay.»

⁵ Amana taya na hərafama waw ka guma na, ta me ləvey aha: «A huslada səkway, a tatəkadata da dala ma Zudey tabiyaha, a zlərawa zla da Galiley, ha ma husawa kasl ka sləna ɗey.»

Yezu ka 'ərdey ma Erod

⁶ Ka guma neney hay na, Pilat me tsəhey: «Neney na ndaw Galiley ɗaw?»

⁷ Andza ŋga ma nəkada ba, ŋga ndaw ma slala ma Erod na, ŋga ma sləradara. Hərway da meney ana ŋga na hay na, Erod ana na, ŋga da Zeruzalem.

⁸ Andza Erod ma nəkada Yezu ba na, a dar 'ar bəza kakay, hərway zla ekəɗey kakay na, a dzala ha, a sar na, ŋga ka nəkada. Ka vəday ma guma ŋga, ma tsənada ndaw hay ma tsafama na. Ŋga me dzeley na, waya aza a key ɗeɗew nekəɗey na, ŋga ka nəkada.

⁹ Ma tsəhafa bəzay ma guma hay haɗadzidzay, amana Yezu a wuɗey ma mbəɗar kava, kakay.

¹⁰ Baba ɗuhwa na me key kuley ana hay, ta ndaw me sesəkey mewey hay, taya daha ka slam ana, a ŋgəlafama na ma gədaŋ ma gədaŋ.

¹¹ Erod, ta sidzew aŋga hay ma sadama banay, ma saŋgərafama dəla da 'ar, ma kəlamar zana mambay aha ka vaw, ma madəmara a Pilat.

¹² Zla ta pas ana ŋga na tsana, andza Pilat ta Erod ma kam dzam, hərway zla kete na, taya dugwan ahiya.

Me dzuwey ma Yezu a memətsey

¹³ Arka Pilat ma wunatərawa baba ɗuhwa na me key kuley ana hay, bay hay ta səkway,

¹⁴ arka ma ləvatar: «Ka zəgadəmiyawa ndaw a neney na, ka ləvam a zləgada səkway ba ka tsəveɗ hayna; ekəɗey na, yah na, i ka tsəhafa guma na ba, ka slam dey kwar ana tabiyaha, amana, i ka ndzefey tek ɗa ma dzuwada ndaw a neney da guma kwar ana ma wudafama na tikay.

¹⁵ Erod satsa na, ka ndzafafərawa meŋgəsey kakay satsa, hərway ŋga ka madərawa ba. Kəɗey na, tek ma zəɗadara 'ar da tek aŋga neney, ma kawa na na, dakay.

¹⁶ I həta ba haya hayaha ta lagwada na, i mbəkada.» [

¹⁷ ]

¹⁸ Taya na ma wudam tobiya ta ha ka masləta ha: «Ŋga neney na, zəɗada ba; kəlandərawa na Barabas.»

¹⁹ A kəladama Barabas a daŋgay na, hərway a kəɗam vaw da wurow na, ka kəɗam ndaw ba vagay aha.

²⁰ Andza Pilat a wuɗey na, me mbəkey na Yezu na, ma ləvatar dey mekelehe sa.

²¹ Amana taya ma wudam: «Darada ka 'ar ma tuwaw ma gazləla ha na, darada ka 'ar ma tuwaw ma gazləla ha na!»

²² Ŋga ma ləvatar dey ma makar ana sa: «Ɗagay ndaw a neney a ŋgəsawa na mey? Yah na, i ka ndzefey meŋgəsey ɗa ma zəɗadara 'ar tikay tabiyaha, i ka həta ba haya hayaha, ta lagwada tsana, aza i mbəkada.»

²³ Ama taya na, a ndzam ka ndepeɗ kakay tabiyaha; ma wudam ta magala ha, a tsəham na, waya sey ka daradama ka 'ar ma tuwaw ma gazləlaha na, arka na, me wudey ta na na, me səkey adiya.

²⁴ Arka na Pilat me dzeley 'ar, ma kadatara andza ma ta na me wuɗey ana.

²⁵ Ŋga ma kəladatərawa Barabas, ndaw aŋga na, taya ma tsəham ka kəladəmərawa na, ŋga a ŋga na, me dzəŋgərey ka dala ta na, ma kəɗam ndaw vagay aha na; ama Yezu na, ŋga ma vəladatara, andza ma ta, me wuɗey ana.

A dadama Yezu a slam ma da derey

²⁶ Andza a dawam aha na, taya ma zəgam Simoŋ ndaw Sireŋ ana daha, a mawa ha da ley; ma ka zəga tuwaw ma gazləlaha na, ka səpa Yezu da dəba.

²⁷ Ndaw ma səkway hay haɗadzidzay ma səpama da dəba, ta ŋgwas hay daha da walaŋ a ta, a tuwafama ha ta me kəɗey 'ərev aha.

²⁸ Yezu ma mbəɗafata dey ka ŋgwas ana hay, ma ləvatar: «Dey Zeruzalem hay, ka tuwam hərway ɗaw zlay, amana, tuwam na ka ’ar vaw kwar ana, ta wawa kwar hay.

²⁹ Nəkam dey hərway aza pas ana hay a da səmawa na, a da ləvam: - Ŋgwas dəlay ana hay, na ka yam kakay ana ta na ma gəlam bəzey kakay ana hay na taya da wuiya -

³⁰ Arka a da təɗafama me ləvey a mamba hay: ‹Mbəzləmawa ka la›, a bəzey mamba hay: ‹Kəzladəmandar.›

³¹ Hərway haɗaw vəɗe tek ana ŋgərza na tekeɗe na, ka kadama ba andza ha tok na, aza na ma ŋgwala na na, a da kadama na teŋgey?»

³² A dadəmata ha ndaw mekele hiya tsew satsa. Taya na ndaw ma ŋgəsa hiya, a da daradəmata ka masləta ha, andza Yezu.

A daradama Yezu ka ’ar ma tuwaw

³³ Andza taya ma husam ba ka slam ana daha, a zəlama ndasl ma bəlam 'ar na, taya ma daradama Yezu, andza ndaw ana hay daha tsew ma ŋgəsa hiya: asləta ta har zəmay, naŋgar ta har gula.

³⁴ Yezu me ləvey: «Baba safata yam zləna, hərway a səradama tek ana taya ma kam ana kakay.» Arka andza da slam me wenəkey zana ŋga na hay tok na, taya ma kəɗafama tsatsa kava.

³⁵ Ndaw ma səkway hay ma lətsa hiya ka slam ana, a nəkam aha dey. Bay hay taya na a saŋgəram, a ləvam: «Ŋga ka buwata sa ma ndaw hay ba sana, ŋga ka buwa bay ’ar ma vaw ŋga na tok. Haɗaw ŋga na Ndaw vaha 'ar ana ma Bay ma Bəla ma pada na na!.»

³⁶ Sidzew hay ma saŋgərafama tiyatsa, ma guram ma da vəlamar zom ma wardzaŋ ana na,

³⁷ ma ləvamar: «Haɗaw kah bay ɗuhwa na ma zuif hay na, buwa vaw ɗek ana tok!»

³⁸ Ka slam 'ar aŋga na na, tek ana daha ma tapa ha, ma winda ha kava: «Ŋga na, bay ɗuhwa na ma Zuif hay.»

³⁹ Ndaw asləta da walaŋ ma ndaw a hana na ma ŋgəsa na hay, ma dara hiya na, ma tsaɗa: «Kah na Ndaw ma vaha 'ar ana kakay ɗaw, buwa vaw ɗek ana ta la neney dzay tok kwa!»

⁴⁰ Ama naŋgar na ma kar say, ma ləvar: «Kah na ka wesey ta Bay ma Bəla kakay ɗaw, kah a neney me key banay andza ŋga na na!

⁴¹ Na ŋga la ma na kassla, a hətəmandamar ka tek ala ma ma kəmawa na hay; ama ŋga na, ka ŋgəsey tikay.»

⁴² Arka ŋga me ləvey: «Yezu, aza ma da mawa ɗek andza Bay aha na, sərafaya tey!

⁴³ Yezu ma mbəɗar kava: «Dərka na, i ləvaka, teseɗey ana deŋe na, ka da ndzama ta yah, da Slala hayna.»

Me mətsey ma Yezu

⁴⁴ Andza mazlambar aha wuzla rəpas na, ləvaŋ me key ka dala tabiyaha, me husey ha, ka ndzemdey makar.

⁴⁵ Pas ma ndermeɗey təŋga. Petəle na ma luwa ha da 'Ay me key Kuley ana, ma ŋgerɗey da 'ərev ana.

⁴⁶ Yezu me wudey ta magala ha, me ləvey: «Baba ɗaw, i mbəkadəkaɓa Mesəfrey ɗaw a wuɗa har eɗek.» A dəba ma guma ŋga neney na, ŋga me mətsey.

⁴⁷ Andza bay ma sidzew temere na me hutey ka Yezu ana, ma nəkada tek a neney ana na, ma səmbəra Bay ma Bəla, ŋga me ləvey kava: «Ndaw eɗey na, ndaw dzerey aha dərka.»

⁴⁸ Ndaw ma səmawa, ma da nəkey dey ana hay tabiyaha, ma nəkadama tek a neney hay, ma kam ana na, ma mam a mbaw ta me kəɗey 'ərev aha.

⁴⁹ Ndaw ma 'ay ŋga hay tabiyaha, ta ŋgwas na ma səpamərawa bəzay, zla da Galiley na hay ma lətsa hiya har daf, a nəkam aha dey.

A padama vagay ma Yezu a tsəvay

⁵⁰ Ndaw ana daha ma sawa, mezəley ŋga na na, Zozef, da walaŋ ma ndaw ma fada ma Zuif hay. Ŋga kokwaɗ aha, dzerey aha

⁵¹ Kwa da tek ata na ma dzalam kwa da tek ata na ma kam ana na, ŋga da huɗa daha tikay. Ŋga na ndaw Arimatey, wuraw ma zuif hay, ŋga ma ndza ha, a hutey aha ma da sawa ma Slala ma Bay'ərlam.

⁵² Ŋga ma daway ka slam ma Pilat, ma da tsəhafərawa vagay ma Yezu.

⁵³ Ŋga ma harɗadərawa ba ka 'ar ma tuwaw, ma mbəza ta petekeɗ, arka ŋga ma pada a tsəvay ana daha, ma zləla ha da ŋgwa gasah aha, ɗaɗa ka pam vagay a huɗa tsaray kakay.

⁵⁴ Pas ana na, pas ma ləmada tek hay, hərway meney ma mesley, a gurawa ha.

⁵⁵ Ŋgwas na ma səpamərawa Yezu zla da Galiley na hay, ma kəsadama Zozef. Taya ma nəkam dey a tsəvay ana, waya akwatay vagay ana, ma paha na, teŋgey.

⁵⁶ Taya na ma məmawa a mbaw ma da ləmadata andza mal me zey hayna, andza tursna ta hay ka vaw. Ta pas ma mesley na, taya ma sasəkam vaw, andza mey ma mewey me ləvey ana.