Mey Hayna Wayna ma Bay Yezu Kriste Luk 21 - MEY HAYNA WAYNA MA YEZU KRISTE MA MEVEY

Sumkwo ma madakway me kuyey a tek me tsekeley sumkwo

¹ Yezu ma tsakafada dey na, ŋga ma nəkadata ndaw hay, a kuyam aha sumkwo a tek me tsekeley sumkwo, ndaw ana hay zleley ahiya.

² Ŋga ma nəkada madakway ana daha mbarga ha, a kuyey aha sisey tsew.

³ Arka ŋga me ləvey: «Dərka na i ɓadakwar, madakway a neney mbarga na na, ka kuyey sumkwo na ba, a fənata sa ma ndaw hay tabiyaha.

⁴ Hərway taya tabiyaha, a hələmawa na ka bay ana, ma da kuyada a tek ma me kuyey sumkwo na na. Ama ŋga na a tatukurawa tek ma viya ŋga ma pada tabiya ha tek ŋga ma da ndzada na.»

Yezu a tsey ma da mbəzley ma ’Ay me Key kuley

⁵ Andza ndaw hay nekəɗey a tsam aha ka 'Ay me key Kuley, ka me mbetsey ma ŋgwa mambay ana hay, ta tek mambay ana hay ma ndaw ma vəlam ana hay na, Yezu me ləvey:

⁶ «Tek a neney ma mbafakwar ma zazərama na na, pas ana hay ka da səmawa ba na, ŋgwa a da zarawa ha ma darzla ha ka 'ar ma ŋgwa na, dakay, a da mbəzley ba tabiyaha.»

Zeheɗ ma bəla ma ndəvey

⁷ Taya ma tsəhafama: «Miter, tek a neney hay a da key na, varay? Zeheɗ ma da ɓada tek ana a da key aha na na, zeheɗ ma mey?»

⁸ Ŋga me ləvey: «Wam daw ka vaw ka da zləgaɗəmakwar zlay, hərway ndaw hay haɗadzidzay, a da səmawa da mezəley ɗaw, a da ləvam: ‹Neney na: yah.› Arka na: ‹Har ana ka da slawa tsoy tok na›, ka da səpəmatar bəzay zlay.

⁹ Kendzey ka da tsənadama a tsam aha ka vəram, dakay na ndaw hay a mbəɗam aha 'ar ka bay ta na, ka da zluram zlay. Hərway hayna tek ana hay ka husəmawa ba ɗagay. Ama na ŋga na na, me ndəvey ma bəla tsaray kakay.»

¹⁰ Arka ŋga ma ləvatar: «Ndaw ma dala naŋgar ta ndaw ma dala naŋgar a da lətsam ka vaw, a da kam vəram, slala ta slala naŋgar a da lətsam ka vaw, a da kam vərom.

¹¹ Dala a da dederey lamba ha, da slam sa na hay na, ma gədama ta may aha a da key. Tek me key zluwer ana hay, a da bəmawa da 'ərlam, ta zeheɗ ɗuhwa hiya.

Tatakway ta seydewe ma gawla ma Yezu hay

¹² Ama amba tek a neney hay, ka kam na, a da zəgəmakwar, a da kadəmakwar tatokoy, a da vəladəmakwar a har ma ndaw ma 'ay me ɗuley mey hay, a da kuyadəmakwar a daŋgay. A da vahəmakwar ka ərdey ma bay hay, ta Guverner hay kavəday ma mezəley ɗaw.

¹³ Na ŋga na na, a da vəlakwar na, tek ma ɓada seydewe aha.

¹⁴ Padama a mevel a kwar, ka da dzalam ka guma ma ma da dzəŋgərey ka vaw kwar ana zlay.

¹⁵ Hərway yah na, i da vəlakwar guma ta ma səra ’ar kwa ndaw asləta da walaŋ ma ndaw dugwan hay ka da slafama ma kəmakwar tapatas ma təɗadəmakwar kakay.

¹⁶ Kwa baba kwar hay, may kwar hay, malam a kwar hay, ndaw ma 'ay kwar hay, ta dzam a kwar hay a da haɗəkadəmakwar, a da dzuwam ndaw hay haɗadzidzay da walaŋ a kwar a memətsey.

¹⁷ Ndaw hay tabiyaha a da ŋgəladəmakwar dey kakay hərway ma mezəley ɗaw.

¹⁸ Amana kwa mbez 'ar a kwar asləta a da zəɗey aha dakay.

¹⁹ Ka da ndzafama mendzey na, ta matanduroŋ a kwar.

Ma dufey ma Zeruzalem

²⁰ Andza aza kuray ka nəkadama Zeruzalem ba ma ɗawala ha ta sidzew hay na, sərafama na ŋga na na, har ma ma dufey ŋga ka slawa tsoy.

²¹ Arka tok na, andza ndaw na da Zudey ana hay na, ka hwam a mamba. Ndaw andza da hwaɗ ma wuraw ana hay ka bəmawa ba, ndaw na taya da ley ana hay na, ka da fuləkumawa a wuraw sazlay!

²² Hərway pas ana ŋga na hay na, a da key na pas me mey gandaf, a da ndesley andza me Mewindey Kokwoɗ ana me ləvey ana.

²³ Ta pas ana ŋga na hay na, ŋgwas ta bəzey da hwoɗ ana hay, ta na ta bəzey ka har ana hay na, taya da viya. Hərway viya ɗuhwa ha a da key da dala, a da hətama səkway ana.

²⁴ A da kuyam a mey ma sleɗ ma tsakay, a da hələmata beke hiya a har ma ndaw ma dala hay tabiyaha. Ndaw ma dala mekele ahiya a da dadəslama Zeruzalem, ha ka har ata me ndesley.

Ma da sawa ma Bəzey ma Ndaw

²⁵ Zeheɗ hay a da nəkam da pas, da kiya, da wurzla hay, ka dala tey na, ndaw ma dala hay a da ndzam tsaɗokɗokwa, ta zluwer ma me bebətsey ma vavəray, ma ɓəlada bəlay.

²⁶ Andza ndaw hay ma huɗa zay ahiya tsoy da hwoɗ, ta zluwer ma viya ma tek a hay, ma da sawa ka bəla na na, hərway ma slafa ma tek ma 'ərlam hay, a da dadaram.

²⁷ Arka a da nəkadama Bəzey ma Ndaw, ma ɗawala ha da dey ma pazlay, ma rəha vaw aha ta ma slafa ma mewezley dey ŋga.

Ma gurawa ma Slala ma Bay’ərlam

²⁸ Andza tek ana ŋga na hay ka zlamar ba ma kam na, lətsam, tsakafadama 'ar, hərway har ma ma da buwey kwar, ŋga bəse.»

²⁹ Arka ŋga ma maladatara ta tek: «Nəkafama ka vəɗe gudav ta sa ma vəɗe ma tek a sa na hay tabiyaha:

³⁰ andza kuray ka nəkadama ba a ɗaɗam aha tsana, kuray na ka səradama ka 'ar vaw kwar ana, gwadavay a gurawa ha.

³¹ Kuray ekəɗey na, andza ha atsa, kuray ka nəkadəmata tek a neney hay ka husəmawa ba na, sərafama Slala ma Bay'ərlam ŋga bəse.

³² Dərka na i ɓadakwar, ndaw ma bəla neney hay a da ndəvam aha, mandzara tek a neney hay tabiya ha ka kam kakay.

³³ Ndasl ma 'ərlam ta dala na, a da davasam, amana guma ɗaw hay na, a da davasam aha tikay.

Mendzey tsekerkerre

³⁴ Wam daw ka vaw ma mevel a kwar hay, ka da mətam 'ar da me wey ta me sey zom kambəlaɓa, ta me dzeley 'ar ka tek ma mendzey zlay. Hərway ma pas ana ŋga na, ka da ndzafukurawa dekeslef,

³⁵ andza ma kəlam zəva ka kəlef hay a bəlay zlay, a da kəlawa na, ka ndaw na ka dala na hay tabiyaha.

³⁶ Amana ndzam tsekerkerre, ɗulam mey zarra, ma aza kuray ka dakam ɗa ma ləhey da mey ma tek a neney hay, ma da səmawa na, ma aza kuray ka da lətsam ka mey ərdey ma Bəzey ma Ndaw.»

Pas madakwaydok ma Yezu da ’Ay me Key Kuley

³⁷ Ta rəpas na, Yezu a vekey da 'Ay me key Kuley, a tatəkadata ndaw hay, arka ma dəvaɗ na, a bawa ma da ney da mamba na, daha a zəlamar: Tetəɗez.

³⁸ Zla ta lamɗa na, səkway tabiyaha a səmawa ka tsakay ŋga a 'Ay me key Kuley, ma da pafa sləmay.