Mey Hayna Wayna ma Bay Yezu Kriste Luk 2 - MEY HAYNA WAYNA MA YEZU KRISTE MA MEVEY

Ma yawa ma Yezu

¹ Arka da har ana ŋga na na, mewey ma bay Sezar Ogust ma bawa, ma da mbəslata ndaw tabiya ha ka bəla.

² Me mbəsley vaw ana tsəfəmey aha a zley na, da har ma Kirinus Guverner aha da Siri.

³ Tabiya kwa way way na, a daw a da mbəsla vaw na da wuraw aŋga da wuraw aŋga.

⁴ Zozef tiyatsa ma tsəley wuraw ma Nazaret a Galiley, a wuraw ma David a zəlamar Betlehem da Zude, hərway ŋga ndaw ma 'ay bay David ma gedzek aŋga,

⁵ ma da mbəsla vaw ta Mariya kokwa ŋga, ta bəzey aha da hwoɗ.

⁶ Arka andza taya da huɗa na, har ma Mariya me yey bəzey ka slawa ba.

⁷ Ma yərawa marakway ŋga mawal aha, ma paɗa ha da petekeɗ, ma naha da guɗam, hərway slam ata da berkey dakay.

⁸ Da dala ana satsa na ndaw me tsukurey hay ma ndza hiya da ley, a hutam ka welde ata hay.

⁹ Madurlam ma Bay’ərlam ma ɓatar vaw ka mey dey ta, me wezley dey ma Bay'ərlam ma ɗawalata ta waw aŋga. Zluwer ma zəgata kambəlaɓa.

¹⁰ Madurlam ma ləvatar: «Ka da wasam zlay, hərway nəkafama i sawa ma da ɓakwar Mey Hayna Wayna a da tərey wuiya ɗuhwa ha ma səkway tabiyaha:

¹¹ teseɗey, da wuraw ma bay David na, ka yəməkurawa Ndaw me buwey ba, ma pa ha ba Kriste aha, Bay’ərlam aha.

¹² Nəkafama andza zeheɗ ma vələmakwar ana: ka da ndzafam bəzey ma yaha gwendez aha, ma paɗa ha da petekeɗ, ma naha da guɗam.»

¹³ Dekeslef a da sərafama na, madurlam ma 'ərlam hay haɗadzidzay, ma dzəmam ta na hana na, ma kəlam walay me səmbərey Bay ma Bəla a ləvam:

¹⁴ «Kəɗakwar har a Bay ma Bəla da mekekəle ŋga. Zozoy ka dala ma ndaw ŋga ma wuɗata na hay.»

¹⁵ Arka andza madurlam hay ma dam tek ata a 'ərlam na, metsukurey hay ma tsadama guma na ka 'ar vaw ta na: «Nakwa kasl a Betlehem, da nəkukurawa tek ana ma kawa na, na Bay’ərlam ma ɓadandakwar ana.»

¹⁶ Arka na ma dawam tsam tsam, ma ndzafəmata andza Mariya ta Zozef, ka zəgawa bəzey gwendez aha, ma naha da guɗam.

¹⁷ Andza ma nəkadama na, ma ɓadəmatara tek ata ma tsəmatar ka wawa na.

¹⁸ Arka ndaw ma tsənadama na hay tabiya ha, ma rəzla hiya ka guma ma ndaw me tsukurey ana hay ma ləvəmatar ana.

¹⁹ Arka Mariya tey na, ma wafa vaw ka tek ana ma kəmawa na hay, ma dzalafa 'ar kava.

²⁰ Arka metsukurey hay ma mam tek ata, ma kelam walay me mewezley dey ta ma səmbərama Bay ma Bəla ka tek ata ma nəkadəmərawa na, ta na ma tsənadəmərawa na, hərway a da key na kassla andza na ma ɓadəmatərawa na.

²¹ Meney tsakar a dəba na na, andza ta pas me sley kuɗey ma wawa na na, ma pafama mezəley ŋga na na, Yezu, andza ma madurlam me ləvey ana, zla amba ka key a hwaɗ ana.

A ɓadama Yezu da 'Ay me key Kuley

²² Arka pas ana ma husawa, andza ma me bəzləmey vaw ma Mewey ma Moyiz me ləvey ana na, ma dadama wawa na a Zeruzalem, ma da ɓadara a Bay’ərlam.

²³ Andza na ma winda ha da mewey ma Bay’ərlam ana: Mendzey ma marakway mawal ana hay tabiyaha na, ma pa ahiya slam ata gəle ma Bay’ərlam.

²⁴ ma da kawa kuley ana andza ma mewey ma Bay’ərlam me ləvey ana: ta maydagwar hay tsew dakay na bəzey hwoɗəgwom hay tsew.

²⁵ Arka azlakwa tok na, ndaw ana daha da Zeruzalem, a zəlamar Simeiyoŋ. Ndaw ana na dzerey aha ma ɗamara ’ar aha,, a hutey aha ndaw ma da bədada Israyel ana. Mesəfrey Kokwoɗ ana ŋga ta ŋga.

²⁶ Mesəfrey Kokwoɗ ana ka ɓadara ba ka vaw, waya: ɗaɗa ka da mətsey aha mandzara kah ka nəkada Kriste ma Bay’ərlam, ta dey ɗek kakay.

²⁷ Mesəfrey Kokwoɗ ana ma dahəɗa Simeiyoŋ a 'Ay me key Kuley. Baba ta maya na, ma dadama wawa na Yezu, me key andza ma mewey me ləvey ka kadəmara andza ha na.

²⁸ Simeiyoŋ ma təɓa wawa na a har aŋga, ma səmbəra Bay ma Bəla andza neney:

²⁹ «Ekəɗey na Miter, andza ŋga ɗek me ləvey ana na, mbəkada gawla ma 'ay ɗek ka daway da zoy.

³⁰ Hərway i ka nəkada me buwey ɗek ba, ta dey ɗaw,

³¹ na kah ma ləmərawa ka slam dey ma səkway tabiyaha na hay,

³² waw ma ɓatar ka tek a ndaw Zuif ahiya kakay ana hay ta mewezley dey ma səkway ɗek Israyel.»

³³ Guma neney ma tsam ka wawa na na, a rəzlata andza maya ta baba ma wawa na.

³⁴ Simeiyoŋ ma pəsafata mey, ma ləvar a Mariya maya ma wawa na: «Ŋga ma pa ha na ma da tsadata metsembeɗ ta ma da lətsadatərawa ndaw hay haɗadzidzay da Israyel, ma da tərey zeheɗ ma dey ’ar kakay ana.

³⁵ -Arka kah ana ta ’ar a ɗek ana na tey na, sleɗ ma tsakay a da slakaka mezek eɗek, kəɗey tok na, tek ma ndaw hay haɗadzidzay ma dzalam da mevel ana na a da bəmawa»

³⁶ Ka slam ana satsa na, ŋgwas ana daha ndaw sek aha, a zəlamar Anna, dem ma Fanowel ndaw ma gedzek ma Aser. Ŋga maraw aha, zla ta gawla ŋga na na, ŋga mevey ta zel na tsəla dada.

³⁷ A dəba na na, ŋga me ndzey madakway aha, ha mevey ŋga me key kokurow tsakar kava faɗ. Ŋga ma ndza ha da 'Ay me key Kuley, kwa a daw a slam mekelehe kakay, ŋga da walaŋ ma ndaw me key kuley hay, rəpas ta dəvaɗ a dzay na, a ɗuley mey, a key sumaya.

³⁸ Andza ma husawa ŋga da har ana tsana, ma səmbəra Bay ma Bəla, ma tsatar ka wawa na a ndaw ma hutam, ma da buwey ma Zeruzalem ana hay.

Mendzey ma Yezu da Nazaret

³⁹ Andza taya ma ndasladəmərawa tabiyaha ba andza ma mewey ma Bay’ərlam me ləvey ana na, taya ma mam tek ata a Galiley, a wuraw ata ma Nazaret.

⁴⁰ Andza wawa na tey na, me gəley, me key gədaŋ aha, ma rəha vaw aha ta ma səra ’ar, hərway ma wuɗa vaw ma Bay ma Bəla ŋga ka ŋga.

Yezu da 'Ay me key Kuley

⁴¹ Ka mevey ka mevey na, maya ta baba ma Yezu a dawam ma da kəmawa magurlam ma Pak da Zeruzalem.

⁴² Andza ma Yezu mevey kurow kava tsew na, ma tsəlam a Zeruzalem andza ma magurlam ana ma kam kete na.

⁴³ Andza ma pas ma magurlam a hay ma ndəvam ba na, taya ma məmawa a mbaw. Ama Yezu ana bəza mba na na, ma ndzawa təŋga da Zeruzalem, mandzara baba ŋga, ta maya ŋga ka sərafama.

⁴⁴ Ka taya na, ŋga da walaŋ ma ndaw taya dzaya na hay, ha a da səpama na ma medew ana ma hakwaɗ da walaŋ ma ndaw may ta hay, ta ndaw na taya ma səradəmata na hay.

⁴⁵ Andza ma ndzafama kakay na, ma mam ma da səpəmrawa da Zeruzalem.

⁴⁶ A da ndzafama na da meney ma makar ana, da 'Ay me key Kuley, da walaŋ ma Miter hay, a dzəkafata ha sləmay. A tsəhafata bəzay ma guma hay.

⁴⁷ ndaw ma tsənadama na hay tabiya ha ma rəzla hiya kavəday ma ma sərada tek aŋga da guma ŋga na ma mbəɗafatara na hay.

⁴⁸ Andza taya ma ndzafama ba na, a rəzlata bəza kakay. Arka may ŋga ma ləvar: «Dem a ɗaw, ɗagay ka kandar andza ha na ka mey? Nəkafa: yah ta baba ɗek, la səpəmaka ha ta yam dey aha.»

⁴⁹ Yezu ma ləvatar: «Dagay ka səpafəmaya mey? Ka səradama a dafa na i ka ndzey da 'Ay ma Baba ɗaw tikay ɗaw?»

⁵⁰ Ama taya na ka tsənadama guma na ma ləvatar ana tikay.

⁵¹ Arka taya ma harɗəmawa tek ata a Nazaret tok, ma tsənatar sləmay. Arka maya ŋga ma padata tek a neney hay tabiyaha ka mevel aŋga.

⁵² Yezu a səkawa da ma səra ’ar, ma zozom, da ma wuɗa vaw ma Bay ma Bəla ka slam dey ma ndaw hay.