Mey Hayna Wayna ma Bay Yezu Kriste Luk 16 - MEY HAYNA WAYNA MA YEZU KRISTE MA MEVEY

Guma ma mala ha te meley ana ma gawla ma ’ay wewer ana

¹ Arka Yezu ma ləvatar a gawla ŋga hay: «Ndaw ana daha zleley aha, ma həlafama mey ka gawla ma ’ay ŋga, waya a gwusəfara ha zleley ŋga ba.

² Ŋga ma zəla, ma ləvar: ‹I tsənada ɗagay a tsafəmaka andza neney na guma waray? Äadaya lisafi ma tek a ɗaw hay zləna, ka da key aha mber a ɗaw sakay.›

³ Arka, gawla a hana me ləvey ka 'ar vaw ŋga na: ‹I da key na teŋgey? Zləna bay ma 'ay ɗaw ka badaya tsoy da mber. Me həvey, gədaŋ a ɗaw dakay. I ka rəkey tek? Hwaray a kaya.

⁴ I sərada tek a ɗaw ana ma da key ana, ma aza ka da badəmaya tsoy da mber na, ndaw hay ka da ŋgələmaya a 'ay ta.›

⁵ Arka, ŋga ma zəlatərawa ndaw godere ma bay ma 'ay ŋga na hana hay, asləta ta asləta. Arka ma ləvar a ndaw tsəfəmey ana: ‹Godere ma bay ma 'ay ɗaw ka kah na, nday?›

⁶ Ndaw ana ma mbəɗar kava: ‹Mal goŋgoŋ temere.› Gawla na, ma ləvar: ‹Ɗeriwel a ɗek ŋga kəɗey, ndzey ka sləna tsam tsam, windey kokurow zlam›.

⁷ Ma ləvar a mekelehe sa: ‹Kah tey na ŋgeɗek nday?› Ŋga ma mbəɗar kava: ‹Daw burhwa temere›. Gawla na ma ləvar: ‹Ɗeriwel ɗek ŋga kəɗey, windey kokurow tsakar›.

⁸ Arka, bay ana ma səmbəra gawla ŋga a hana ma mbukwey ndaw ana, kavəday ŋga ka key werwer ba. Akwa, ndaw ma bəla neney hay na, a səradama me key wewer ka 'ar vaw ta na hay, a fənəmata ndaw ma vəlaya ma waw me nəkey dey ana hay.

Bay’ərlam tsukuɗu sumko ɗaw?

⁹ Ama, yah ekəɗey i ləvakwar: kam dzam ka vaw ta Sumkwo me zləgey ndaw ana, aza ka slam ana ka da ndəvafakwar ba na, dzam ana hay a da ŋgələmakwar a ’ay mendzey me ndəvey kakay ana.

¹⁰ Ndaw ana ɗa ma ɗar ndaw da tek bəza ha ketekwəɗey na, a da key na ɗa ma ɗar ndaw da tek ɗuhwa na tiyatsa. Ndaw ma mbukwey ndaw da tek bəza ha ketekwəɗey na, a da mbukwey ndaw da tek ɗuhwa na tiyatsa.

¹¹ Haɗaw azlakwa ha kam ɗa ka ɗəmakwar ndaw da sumko me zləgey ndaw ana kakay na, ma da ŋgwahakwar zleley na hayna na, way?

¹² Haɗaw ha kam ɗa ka ɗəmakwar ndaw da tek ma ndaw hay kakay na, ma da vəlakawar ma kwar ana na, way?

¹³ Ɗaɗa ndaw a slafa me key gawla ma 'ay da 'ay ndaw hay tsew kakay: dakay na, ka ŋgəlada dey ta naŋgar kakay na, naŋgar na a wuɗa, dakay na, ka tsənar sləmay ba a naŋgar na, a da rəsa ndaw naŋgar. Ndaw a slafa me key mber ma 'ay Bay ma Bəla, ta na ma Sumkwo ka masləta ha, kakay.»

Mewey ta Slala ma ’ərlam

¹⁴ Fariziyeŋ hay a wuɗam sunko bəza kakay na, ma pafama sləmay ka guma ŋga neney na, ma saŋgərafama.

¹⁵ Yezu ma ləvatar: «Ka ɓadama dzerey kwar na ka slam dey ma ndaw hay dada, ama, Bay ma Bəla na, a sərada mevel a kwar. Hərway tek ma tərada ndaw ɗuhwa ha ka slam dey ma ndaw hay ana na, a kar tsatsaŋ a Bay ma Bəla.

¹⁶ Mewey ta ndaw sek hay na, ma husawa na, kasl ka Zaŋ; zla da na ŋga na na, ma tələkadama mey ta Mey Hayna Wayna ma Slala ma Bay'ərlam. Arka na, kwa way way na, a kəɗey vaw ta gədaŋ a ŋga dzay me fuləkwey a huɗa.

¹⁷ Həzlay ma 'ərlam ta dala na me devesey ŋga na ta ger aha kakay, kwa tek ketekwəɗey ma da devesey da mewey na dakay.

¹⁸ Ndaw ana ma ɓəla ŋgwas aŋga, ma da zəgey mekelehe na, a key madama. Ndaw me zəgey ŋgwas zel aŋga ma ɓəla ba na na, a key madama atsa.»

Guma ma mala ha te meley ana ma ndaw zleley ta Lazar

¹⁹ Ndaw ana daha zleley aha bəza kakay, a pey ka vaw na, zana mambay ana, ma sumkwo haɗadzidzay ana, ka pas ka pas da 'ay ŋga na a key hwahwaɓay ɗuhwa ha.

²⁰ Ka mey mambaw ŋga na na, ndaw ana daha mbarga ha. Vaw ŋga tabiyaha mbəlek aha. A zəlamar Lazar.

²¹ A wuɗey akwa na ka rəhey ta tek na me pesey ka slam me zəmey tek ma ndaw zleley ana, ma sawa dzadzak ma da nderkeɗey mbəlek aŋga na hay na gədey hay.

²² Arka ndaw mbarga na me mətsey na, madurlam hay ma zəgama, ma dadama ka tsakay ma Abraham. Ndaw zleley ana, me mətsey tiyatsa, ma zləlama.

²³ Da slam ma ndaw ma mətsa na hay na, andza a key aha tsetseh na, ŋga ma tsakafada dey ŋga, ma nəkada Abraham, ta Lazar ka tsakay ŋga, da dəreŋ.

²⁴ Arka ŋga me wudey: «Baba ɗaw Abraham, i ka kaka da vaw tey, sləradərawa Lazar ka dzuhəɓadərawa bəzey har aŋga a yam, ka sawa ka fəɗadaya ka 'erneh tey, hərway i ndelemey aha da waw a neney da mey ɗaw dakay».

²⁵ Abraham ma ləvar: «Dem a ɗaw, sərafa, da ma ndzawa ɗek na, kah da wuiya, Lazar tey na da viya. Ekəɗey ka sləna tey na, a səfadəmara ha mevel, ama kah tey na tsetseh.

²⁶ Yaw, a fəna satsa na, tsəvay sololo ha da walaŋ ala ta kuray, ma ndaw a wuɗey ma tasaɓa da diya la 'ay kwar na, ka slafa zlay. Ndaw me wuɗey ma tasawa da diya kwar 'ay la tey na, ka slafərawa zlay atsa.»

²⁷ Ndaw zleley ana me ləvey: «I kaka amboh baba, na, slərada Lazar 'ay baba ɗaw,

²⁸ hərway malam a ɗaw hay daha zlam; ma ŋga, ka daway ka katar ka 'ar ɗaf, ma taya satsa na, ka da wuyəmawa vaw a slam ma banay a neney sazlay.»

²⁹ Abraham ma mbəɗar kava: «Moyiz ta ndaw sek hay daha sana, ka pəmatar sləmay kwa.»

³⁰ Ŋga ma mbəɗafərawa kava sa: «A'ay, baba ɗaw Abraham, haɗaw ndaw me mey da walaŋ ma ndaw ma mətsa na hay na, a da mbəɗadama mendzey ta.»

³¹ Abraham ma ləvar: «Haɗaw ka tsənamar sləmay a Moyiz kakay, kwa a ndaw sek hay kakay na, kwa ndaw ka mbəley da walaŋ ma ndaw ma mətsa na hay tekeɗe na, a da təɓama ha kakay təŋga.»