Kolosieŋ 4 - MEY HAYNA WAYNA MA YEZU KRISTE MA MEVEY

¹ Ndaw ta beke da 'ay ta na hay, nəkafəmata dey ka beke kwar hay na, da dzerey, kalkal, sərafama kuray ana tey na, Miter kwar ana daha da 'ərlam.

Me kəɗey vaw hərway ma Mey Hayna Wayna

² Ndzam na da ma ɗula mey, a həladakwar vaw ma madara sise a Bay'ərlam.

³ Da har ana satsa na, ɗulafəmandərawa mey tey: hayna Bay ma Bəla ka wurar mambaw a me tələkey mey la neney, ma i ka tələkada mey ta tek ma Kriste na kəzla na, na i da daŋgay ekəɗey hərwuiya na.

⁴ Hayna i ka pada mey ka bəla, andza na təɗe i ka tsa na.

⁵ Hayna səradama me ndzey haya hayaha, ka slam dey ma ndaw kretieŋ ahiya kakay ana hay: yəmam da bəziya.

⁶ Hayna zlapay kwar ka key na hayna, ka pas ka pas na, ka tərey mandaŋ aha, ta ndaraw ma mbəɗar ka guma ma ndaw na ta tsəveɗ.

Me tsey guma dok ana

⁷ Ma tek me nəkey dey ka mendzey ɗaw na, ka da ndzafəmata guma ana wayna hay tabiyaha da har ma Tisik, malam na i ma wuɗa na, bəzey me slərey me tsəney sləmay ana, mandala ɗaw ma kam mber tsetsuwe da mezəley ma Bay’ərlam ana.

⁸ I sləradəraɓa na ta har, ma ka ɓadakwar mendzey la, ka vəlakwar gədaŋ.

⁹ Onezim malam me tsəney sləmay bəza kakay ana, haya ha bəza kakay ana a kəsadəraɓa, ŋga ndaw ma 'ay kwar. A da ɓadəmakwar tek a hay tabiyaha, ma kam ka sləna ɗey ana.

¹⁰ Aristark ka tsadukuraɓa guma, la da daŋgay tsetsuwe, ka zəgawa Mark, bəzey baba ma Barnabas- ka ɓadəmakwar me key ŋga na ba seŋgey, kendzey ka daɓa ba a 'ay kwar na, ŋgəlama mambay mambay aha.

¹¹ Yezu na ma zəlamar Zustus ana, ŋga asləta da walaŋ ma Zuif hay me key mber andza yah hərway ma Slala ma Bay 'ərlam na taya dada, taya na ndaw ma məmaya 'ərev ana hay.

¹² Epaphras ka tsadukuraɓa guma, ŋga na ndaw ma 'ay kwar, gawla ma Yezu, na ŋga zarra a kəɗey aha vaw da ma ɗula mey hərway kwar, ma kuray ka ndzam gədaŋ ahiya, haya hiya, ha vəladəmara vaw kwar kərem tabiyaha, hərway ma tek ma Bay ma Bəla ma wuɗey ana.

¹³ I ka seydewe ŋga na, a yey aha vaw hərway kwar kambəlaɓa, hərway kwar, hərway ma ndaw ma Lawdisey ta ndaw ma Iyerapolis hay.

¹⁴ Dzam a lakwa Luk ndaw ma sidem ka tsadukuraɓa guma ta Demas.

¹⁵ Tsadəmatara guma a ndaw na da Lawdisey na hay, tsadəmara guma a Ninfa, ta Egliz na me tsəhey ’ar da 'ay ŋga na.

¹⁶ Andza aza kuray ka dzaŋgama ɗeriwel a ɗaw ana ba na, sləradəmatara a ndaw ma Egliz ma Lawdisey, taya ka dzaŋgama tiyatsa, kuray ana tiyatsa na, dzaŋgama ɗeriwel na ma sawa da Lawdisey ana tey.

¹⁷ A dəba na na, ləvamar a Arsip: nəkafa dey ka mber ana kah ma ndzafa da mezəley ma Bay’ərlam ana, kəɗey vaw ma kah ka ndaslada mambay aha.

¹⁸ Me tsey guma ɗaw ta har ɗaw Pol na, andza neney: sərafama ka tsalalaw a ɗaw hay. Hayna hahaya ma Bay'ərlam ka ndzey ta kuray!