Kolosieŋ 3 - MEY HAYNA WAYNA MA YEZU KRISTE MA MEVEY

¹ Ekəɗey andza kuray ka mbələmawa ba ta Kriste ka dəba na, səpam na tek na da 'ərlam ana, na Kriste ŋga da huɗa na, ma ndza ha ta har zəmay ma Bay ma Bəla;

² tek a kwar ma səpam ana na, da 'ərlam zləna ka dala kakay.

³ Akwa na, kuray ka mətsam ba, amana, mendzey kwar ma kəzla ha ta Kriste da Bay ma Bəla.

⁴ Mendzey kwar dərka na na Kriste, andza aza ka da bawa ba na, arka kuray ana tiyatsa na, ka da bəmawa andza ŋga da ma wezley dey ɗuhwa ha dzay.

Da ndaw gurma na a ndaw wayna

⁵ Tek na ma vəla ha ma dala da vaw kwar ana na, mətsadama ba: me tsəley so, tek me zləɓey ndaw, tek me sey, me wuɗey tek haya kakay ana hay, ta həzay a neney ma təra ha ba andza tek ma kuley ma ’ərlam so na hay.

⁶ Nəkafama ma sadərawa me tsey mevel ma Bay ma Bəla na tek a neney hay,

⁷ Nəkafama me key kwar zlekete na andza ha, mendzey kwar ana na andza ha.

⁸ Ekəɗey tok na, kuray ana tiyatsa na, kuyadəmata tek ana ŋga na hay ba, mevel me tsey, magwam, seweɗ, me tseɗey ndaw ta guma haya kakay ana hay ka da bawa da mey kwar sazlay.

⁹ Malwaɗay ka da key da walaŋ a kwar daha sazlay: hərway kuray ka tsukwama ndaw gurma na ba, ka vaw kwar ta tek aŋga me key ana hay dzay,

¹⁰ arka kuray ma kəlam ndaw wayna ka vaw, na andza ka da husey a ma sərada tek na, a mətsar har ma tərada vaw wayaha, ma ka nəkey andza ndaw ma kərawa na kakay.

¹¹ Da huɗa na, Grek ta Zuif dasakay, ndaw ma sla kuɗey aha ta ndaw ma sla kuɗey aha kakay ana dasakay, ndaw ma dzaŋga na ta ndaw ma dzaŋga ha kakay ana dasakay, beke hay ta ndaw ma wam 'ar ata na hay dasakay, amana Kriste: ŋga tabiyaha ta tek hay tabiyaha.

¹² Hərway kuray ma gaɗəmaya, ma təra hiya ba kokwoɗ ahiya, Bay ma Bəla a wuɗakwar sana, kəlam ka vaw tok na mevel ma ndaw ma kar da vaw ana, me səŋgərey da mey, ləfeɗeɗe, ma ləɓa vaw, ta ma zəgey mevel.

¹³ Äəsam vaw ka 'ar vaw kwar ana hay, kendzey ndaw asləta tek ka həladata ba ka vaw ta ndaw naŋgar na, sam yam ka vaw ka 'ar vaw kwar ana hay, andza ma Bay’ərlam ma safakwar yam ana, kuray ana tiyatsa na, kam andza ha tey.

¹⁴ Arka ka 'ar ma tek a neney hay tabiyaha na, kəlam ka vaw na ma wuɗa vaw: ŋga na, me dzəmey tek hayna kərem ana.

¹⁵ Hayna zozoy ma Kriste ka ndzey da mevel a kwar, na kuray ma zəlaya kava tabiyaha, da vaw ana asləta. Haya ndzam na, da ma madara sise.

¹⁶ Hayna Guma ma Kriste ka ndzey da walaŋ a kwar, ta zleley ŋga na hay tabiyaha, tatəkam tek ka 'ar vaw kwar ana hay, tsam guma a 'ar ka 'ar vaw kwar ana hay da ma səra 'ar, kamar walay a Bay ma Bəla da mevel a kwar ma madara sise, da walay ma Pəsom hay, ta walay me Səmbərey Bay'ərlam ana, ta walay na Mesəfrey Kokwoɗ ana ma ɓakwar ana hay.

¹⁷ Tek a kwar ma da ləvey, ma da key tabiyaha na, kama na, da mezəley ma Bay’ərlam Yezu, da ma madara sise ta har aŋga a Bay ma Bəla Baba.

Me dzəmey vaw wayna

¹⁸ Ŋgwas hay, tsənəmatar sləmay a zel a kwar hay, andza na ma kama da mezəley ma Bay’ərlam ana.

¹⁹ Zel hay, wuɗəmata ŋgwas a kwar hay, ka da kəmatar tek me tsey mevel aha zlay.

²⁰ Bəza hay, tsənəmatar sləmay a baba kwar ta maya kwar hay da tek hay tabiyaha, nəkafama, Bay’ərlam a wuɗey ka kuray na tek a neney ana.

²¹ Baba ta maya ma bəza hay, ka da kəmatar tek haya kakay ana hay a bəzey kwar hay zlay, zləna a mətsatar har ba.

²² Beke hay, tsənəmatar sləmay a bay kwar hay, ta tek hay tabiyaha ka dala neney, kadəmatara mber ata na, ma vəday a dzaɗəmakwar aha kakay, andza ka ləva ka səpam na ka datar ’ar a ndaw hay kakay, amana, ta mevel ləfeɗeɗe na, andza ma ndaw ma wasadama ta Bay’ərlam ana hay.

²³ Ka key na, mber a kwar na waray na waray na, kama ta mevel hayna, andza ka kadəmara a Bay’ərlam, zləna a ndaw hay kakay,

²⁴ ta ma sərada ha ka da ndzafam me zəmey zleley da har ma Bay’ərlam, kəla ma masa ha. Miter na Kriste, kuray na, ndaw ma mber aŋga hay.

²⁵ Ndaw ma ɓada vaw ŋga dzerey aha tikay na, a da warəkadəmara na, ta masa ma dzerey ŋga kakay ana tiyatsa, me weley ndaw da ɗəma dakay.