Kolosieŋ 2 - MEY HAYNA WAYNA MA YEZU KRISTE MA MEVEY

¹ A saya akwa na, kuray ka səradama, i kəɗey aha vaw ma gədaŋ hərway kwar, hərway ma ndaw ma Lawdisey, hərway ma ndaw a sa na hay haɗadzidzay, ɗaɗa ka nəkadəmaya ta dey ta kakay ana hay.

² A saya na, ka səmadama mevel ata adiya, ka dzəmam mey mambay mambay aha da ma wuɗa vaw. Ka fuləkwam a zleley ŋga tabiyaha, a me sərey tek hay tabiyaha, a ma sərada tek ana na ma kəzla ha na ma Bay ma Bəla: Kriste

³ zleley ma ma səra 'ar ta ma sərada tek ma kəzla ha tabiyaha na, da ŋga.

⁴ I tsa guma neney na, ma ndaw ka da pafakwar wuiya ta guma mambay ana hay zlay.

⁵ Waway kava dakay, bay 'ar ma vaw ɗaw ana na, ŋga ka tsakay kwar dakay, ama mezek a ɗaw na, ŋga ka tsakay kwar, a mbafaya bəza kakay, andza i ma nəkafakwar ka zəgadama ha meslərey kwar ta tsəveɗ, andza kuray ma ndzaya gədaŋ gədaŋ da me pey 'ar kwar ka Kriste na na.

Mendzey hayna ta Kriste

⁶ Dam ma daw kwar ka tsəveɗ ma Kriste, Yezu na Bay’ərlam, andza na kuray ma ndzafama na;

⁷ hayna pam slasləlay da ŋga, ma pa bəzay ahiya da ŋga, andza neney tok na, ndzafam ma mey 'ərev da me pey 'ar andza na ma tatəkadəmukurawa na, madəmara sise haya hayaha.

⁸ Ndzam tsekerkerre, ma ka da zəgəmakwar a gendeɗ ma me dzeley 'ar ma ndaw hay zlay, tsəvay ma me zləgey ndaw a neney na, a ɓey na, tek ma ndaw hay ma təkəram ana ta gədaŋ na ma wama bəla neney ana zləna, Kriste sakay.

⁹ Hərway Bay'ərlam ma ndza ha tabiyaha kərem da vaw ana me wezley dey ana ma Kriste.

¹⁰ Kuray ma ndza hiya kərem da Kriste, ŋga na Ŋgalaka ma gədaŋ hay tabiyaha ta mewey ahiya ta slam har ahiya tabiyaha.

¹¹ Da ŋga na, kuɗey kwar ma slaya tsoy mandzara ndaw ka ləmar, arka ma tsukwadakwar vaw ma slaw vaw a neney ba: me sley kuɗey ma Kriste na andza ha tok.

¹² Ma zlələmakwar dzaya da ma dzuhəɓey na, ta ŋga satsa na, kuray ma mbələmawa, hərway ma mey na, kuray ka pam 'ar ba ka gədaŋ ma Bay ma Bəla, ma mbəladərawa da walaŋ ma ndaw ma mətsa na hay.

¹³ Arka kuray ana ŋga na hay ma mətsam hərway ma malay kwar hay, hərway ma kuɗey kwar ma slaya da slaw vaw kakay ana na, Bay ma Bəla ka vəlakwar mendzey ba ta ŋga. Ka safandakwar yam ba ka malay lakwa hay tabiyaha.

¹⁴ Ŋga ma davasada ɗeriwel ma wudafandakwar ana ba, andza mey ma mewey hay ma mbəɗafandakwar 'ar ana, ŋga ma zəɗada ba, ŋga ka darada ba ka tuwaw ma gazləla na.

¹⁵ Ma kwasləɗata bay hay, ta gədaŋ ma ndaw me wey ndaw hay, ma padata, ma ndaw hay tabiyaha ka nəkafəmata. Ŋga ma vahata ka səpamar bəzay, da har ma tuwaw ma gazləla na ma zəga'ar ma sleɗ.

¹⁶ Zla ekəɗey na, ndaw ka da dzuwakwar ka guma ma tek ma zəmey, ta tek ma sey da magurlam ma kiya ma sləlawa na, dakay na, ma mesley zlay.

¹⁷ Na ŋga na hay tabiyaha na, mezek ma tek ma da sawa na, ama tek ɗerre na a da bawa na da Kriste.

¹⁸ Ka da mbəkadəmatara vaw kwar a ndaw hay ka da zləgaɗəmakwar, ta me zəgey 'ar ma sleɗ ma ndaw ma mbafata na, me ndzey da me ɗuley mey, dakay na ma katar kuley a madurlam ana hay zlay. A tələkadama vaw ta a tek ata ma nəkatar a dey ana, arka tok na, da me sərey tek ata ma slaw vaw ma zlambaradata tedehe na.

¹⁹ Taya ma dzəmaya ka Kriste na 'ar aŋga na kakay, Azlakwa tok na ma vəlar tek ma nafar a vaw ana tabiya ha na ’ar ana. Ta ŋga tok na mezəvey ma vaw hay tabiya a kam mber ka masləta ha. Ma gəlada vaw ana tabiya ha na Bay ma Bəla na.

Me wey 'ar ma ndaw ma dzuhəɓa na hay

²⁰ Ana ekəɗey andza kuray ka mətsam tsoy ta Kriste na, na ŋga na tok na, kalkal andza kuray ka tsam ba ka vaw ta tek ma bəla hay, ka madama vaw kwar ma tsənatar sləmay a metsesley ma tek hay, andza re mendzey kwar ma vəlaha ma bəla neney sa na, teŋgey?

²¹ Ka da zəga zlay, ka da ndzəka zlay, ka da ləmar zlay,

²² tek ana ŋga na hay tabiyaha na, kendzey ka kadata ha mber na, a ŋgəsam ba, a zam ba seŋgey, nəkafama neney na, mey ma mewey ta metetəkey ma ndaw hay!

²³ Taya na, ka kadama vaw ta ba andza ma səra ’ar ahiya haɗa kwa ‹kuley me dey har ata na, a namar dəba, ma kada tatakway ta vaw›, tek ana ŋga na hay na, a nafam kakay tabiyaha, a nafam na, a slaw vaw dada.