Kolosieŋ 1 - MEY HAYNA WAYNA MA YEZU KRISTE MA MEVEY

Me tsey guma a vaw

¹ Yah Pol, maslaŋ ma Yezu Kriste da me wuɗey ma Bay ma Bəla. Ta malam ala Timotey, i windatar

² a ndaw kokwaɗ ana hay da Kolos, malam me tsəney sləmay ana hay da Kriste ana. Hayna Bay ma Bəla Baba lakwa, ka vəlakwar hahaya ŋga ta zozoy ŋga.

Ma madara sise a Bay'ərlam ka Mey Wayna

³ La Madəmara sise a Bay ma Bəla, Baba ma Bay’ərlam a lakwa Yezu Kriste, da ma ɗulamar mey la zarra hərway kwar ana.

⁴ Akwa na, la ka tsənadama me pey 'ar a kwar ka Yezu ana, ta ma wuɗa vaw kwar, ma wuɗəmata ndaw Kokwaɗ ana hay tabiyaha.

⁵ Kavəday ma tek a kwar me pey dey ana na, a hutakwar aha da 'ərlam, tek a kwar ana me hutey ana na, ka tələkadəməkurawa mey ba ta guma ma dərka na: Mey Wayna,

⁶ na ma husaɓa kasl ka kuray ana; kalkal andza na me yey kava, me pey mey tabiyaha ka bəla na, da walaŋ a kwar ana na, a key na andza ha atsa; zla ta pas ana andza kuray ma təɓama, ma səradama da dərka ŋga, hahaya ma Bay ma Bəla ana,

⁷ andza ma me tetəkey ma Epafras ma vəladukurawa na; ŋga na dzam ala, mandala la, ma kam meslərey dzaya na, ma dzənandar ta mevel aŋga adzay, andza bəzey me slərey ma Kriste,

⁸ ŋga ma ɓadandar mawuɗa vaw kwar ma Mesəfrey ma wasladakwar ana na, hadzəgay.

Me ɗuley mey hərway ma Egliz

⁹ Nəkafama ka vəday ma mey na, andza ta tsakay la tey na, ta pas ana andza la ma tsənadama na na, la ka mətsamar har me ɗuley mey hərway kwar kakay, la tsəham ka Bay ma Bəla na, ma la ka səradama tek aŋga me wuɗey ana hay haya hayaha, da me sərey 'ar tabiyaha ta Mesəfrey ŋga ma fuləkwakwar a vaw ana.

¹⁰ Da mendzey kwar na, ha ndzam na, kassla andza ma Bay’ərlam; me səpey me key kerem andza ma ŋga me wuɗey ana. Arka tok na, tek a kwar ma da key na hayna ka waray ka waray na, a da yey kava, a da gəley ka mey da ma sərada Bay ma Bəla dərka na.

¹¹ Ka da ndzafam gədaŋ da tek hay tabiyaha, ta gədaŋ ma maram aŋga, kəɗey tok na, a da kəsadakwar, a da səmadakwar me ɓəsey tek me həley suwet ana.

Walay a Kriste Bay ma bəla

¹² Ta wuiya ha na, madəmara sise a Baba ma təradakwar ha slafama me zəmey zleley ana andza ndaw Kokwaɗ ana hay, ka slam dey dzaydzay ana.

¹³ Ka buwandəkurawa ba, da har ma gədaŋ ma ləvaŋ, ma da dandakwar a Slala ma ma wuɗa vaw ma Bəzey ŋga.

¹⁴ Ta ŋga na, ka ləhadandəkurawa ba, meŋgəsey lakwa hay ma sa yam a hiya ba.

¹⁵ Ŋga na mey 'ərdey ma Bay ma Bəla me nəkey kakay ana, marakway ma tek ma ka na hay tabiyaha.

¹⁶ Hərway tek hay tabiyaha a kəmatərawa na da ŋga, da 'ərlam ta ka dala, tek na ma nəkam ana hay ta na ma nəkam kakay ana hay, Koriwal ma bay hay, Gədaŋ ma bay hay, Bay me wey dala na hay, ta ndaw ma slafama me key tek gədaŋ ana hay tabiyaha, a kəmatərawa na ta har aŋga, ma vəlaya ma ŋga.

¹⁷ Arka ŋga na, ŋga ka mey ma tek hay tabiyaha, tek hay tabiyaha ma zəgaya da har aŋga,

¹⁸ arka ŋga na na, ŋga bay 'ar ma vaw ana, na Egliz aha na. Ŋga na mezley ana, marakway aha, da walaŋ ma ndaw ma mətsa na hay, ma ŋga ka da key, ka mey ma tek hay tabiyaha, ma tsoy aha, ka bəla tabiya ha.

¹⁹ Hərway ka mbafa ba ka Bay ma Bəla, me key ka ndzey kərem ta vaw ŋga.

²⁰ Arka ma da dzəmadata tek hay tabiyaha ta ŋga, ma ŋga na, ka dala ta da 'ərlam, ta ma padərawa zozoy ta mambaz aŋga ka 'ar ma tuwaw aŋga ma gazləla na.

²¹ Kuray a zlekete mbəlak ahiya na na, tek a kwar me key haya hiya kakay ana na, a kadakwar dugwan ahiya kambəlaɓa.

²² Ama ekəɗey tok na, Bay ma Bəla ka dzəmadakwar ba ka vaw, kuse ma me mətsey ma Bəzey ŋga me key tsetseh da slaw vaw ŋga, ka da badukurawa ka slam dey ŋga, kokwoɗ ahiya, me ŋgəley bəzay dakay, a zley vaw kakay.

²³ Ama a dafa ta me pey 'ar na, ha ndzam gədaŋ ahiya mandzara me wesey, mandzara ma mbəkada vaw kwar ka hələmakwar pərazl, tek a kwar ana ma hutam ana, Mey Wayna, na kuray ma tsənadəmərawa na zlay, na ma tələkadəmərawa mey a tek hay tabiyaha ma ka ahiya ka dala na, na yah Pol me tərey Bəzey me slərey ana.

Me kəɗey vaw ma maslaŋ ana

²⁴ I ndzefey ekəɗey wuiya ɗaw na, da tsetseh a neney i me sey hərway kwar ana, tek na ma hətsar a tsetseh ma Kriste ana, i ndəvada da slaw vaw ɗaw, mavəday ma vaw ŋga na: Egliz aha na.

²⁵ I da tərey na, ndaw me slərey ŋga na, hərway ma mber ana Bay ma Bəla ma vəladiyawa a har a ɗaw hərway kwar ana: ma ndaslata me tələkey mey ta Mey ma Bay ma Bəla.

²⁶ Tek na ma kəzla ha zla ekəɗey kakay, ka mevey ka mevey, ekəɗey ana na, Bay ma Bəla ka ɓadatərawa ba a ndaw aŋga kokwaɗ ana hay.

²⁷ A wuɗey ma ɓadatara na, zleley ta, na me wezley dey, ma tek ana ma kəzla ha da walaŋ ma ndaw Zuif ahiya kakay ana hay: Kriste da walaŋ a kwar na me pey dey ma ma wezley dey!

²⁸ La tələkam mey na, ta ŋga, ta ma katar ka 'ar ɗaf ka ndaw ka ndaw, ma tatəkadata ka ndaw ka ndaw, da ma səra ’ar tabiyaha, ma kwa way way ka tərey kərem haya ha ta Kriste.

²⁹ Neney na, mber ma merɓey ɗaw, ma me kəɗey vaw ɗaw, ta gədaŋ aŋga ma slafa me key mber da vaw ɗaw.