Mey Hayna Wayna ma Yezu Kriste Zaŋ 8 - MEY HAYNA WAYNA MA YEZU KRISTE MA MEVEY

A zəgəmawa ŋgwas ana daha ka slam ma Yezu, a kawa madama

¹ Arka Yezu ma daway a mamba ma Tetəɗez.

² Ma dey me tseɗey na, ŋga ma mey a 'Ay me key Kuley, andza səkway tabiyaha a sawa ka tsakay ŋga na, ŋga me ndzey ta ndzey, ma zlar ma tatəkadata ndaw hay.

³ Ndaw me sesəkey Mewey hay ta Fariziyeŋ hay ma zəgəmərawa ŋgwas ana daha a ndzafəmata a kam aha madama, ma lətsadama a wuzlah ma ndaw hay ma kusa hiya.

⁴ Ma ləvamar: «Miter, a zəgəmərawa ŋgwas a neney na, a ndzafəmata ma na hiya ta ndaw.

⁵ Da Mewey na, Moyiz a tsandukurawa na, ŋgwas andza neney na, ma kweytsey ŋga na na, ta ŋgwa vagay aha. Ekəɗey, kah na, ka ləvey kava na teŋgey?»

⁶ A tsam andza ha na hərway a wuɗam ma ŋgafama gendeɗ, ma aza ka da ndzafafama bəzay ma guma. Ama Yezu na me teŋey 'ar aŋga ka dala, ma zehey ka dala, ta bəzey har.

⁷ Andza re a tsəhafama ha guma mba na, Yezu ma tsakafada 'ar, ma ləvatar: «Ndaw ana andza da walaŋ a kwar ɗaɗa ŋga ka ŋgəsey tikay ana na, ka zlar ma kəlafa ŋgwa na tsəfəmey aha ɗagay.»

⁸ Arka ŋga me teŋey 'ar sa, me zehey ka dala sa.

⁹ Andza a dəba ma ma tsənadama guma ŋga neney hay ba na, taya ma zlamar ma wutsam tek ata asləta asləta, ma zlar ka mey na ndaw ma səka na hay; a da zarawa na Yezu makəraŋga. Andza ŋgwas ana ŋga daha re da wuzlah ana na,

¹⁰ Yezu ma lətsada ’ar, ma ləvar: «Ŋgwas eɗey, taya da may tok? Kwa ndaw ka dzuwaka kakay ɗaw?»

¹¹ Ŋga me mbəɗey kava: «Dakay, Bay’ərlam a ɗaw.» Arka Yezu ma ləvar: «Yah tiyatsa na i dzuwaka kakay tey, amana daway, ɗaɗa ka da ŋgəsey sazlay.»

Yezu na waw me nəkey dey ma bəla

¹² Arka na Yezu ma tsatar guma sa: «Yah na waw me nəkey dey ma bəla. Ndaw ma səpaya bəzay na, ɗaɗa a da heley aha da ləvaŋ tikay, amana a da ndzefey waw ma kəsada a Mendzey.»

¹³ Arka Fariziyeŋ hay ma ləvamar tok: «Ka key seydewe ma bay ’ar ma vaw ɗek ana, seydewe ɗek ana na, a təɓey vaw kakay.»

¹⁴ Yezu ma mbəɗafatara kava: «Ayaw dərka na i key seydewe ma bay ’ar ma vaw ɗaw ana, ama akwa seydewe ɗaw ana na, a təɓey, kavəday ma mey na i sərada, i sawa na da may, i daw na a may, ama kuray na, kwa ka səradama, i sawa na da may, kwa i daw na a may tikay.

¹⁵ Ka kama sariya kwar na, ɗerre ma slaw vaw, ama yah na, i key sariya ka ndaw tikay.

¹⁶ Hana kendzey i ka key sariya na, sariya ɗaw ana na kassla dərka na, hərway i makəra ɗaw kakay, ama ndaw ma sləradiyawa na na ŋga daha tiyatsa.

¹⁷ Akwa ma winda ha da Mewey kwar ana na, seydewe ma ndaw hay ka kam ba tsew na, a təɓama seŋgey.

¹⁸ I key seydewe ma bay ’ar ma vaw ɗaw ana, Baba ma sləradiyawa na, ŋga a kaya seydewe ɗaw ana satsa.»

¹⁹ Taya ma ləvamar tok: «Ɗagay Baba ɗek ana na ŋga da may?.» Yezu ma mbəɗatar kava: «Ka səradəmaya kakay, ka səradama Baba ɗaw kakay. Hana kuray ka səradəmaya ba na, ka da səradama Baba ɗaw ana ba tiyatsa.»

²⁰ Yezu a tsa guma ŋga neney hay na, ka slam ma zəlamar zleley ana, andza a tatəkadata ha ndaw hay da 'Ay me key Kuley. Kwa ndaw ka pafa har dakay, kavəday har aŋga ka slawa tsaray kakay.

Yezu a tsey ka ma daway ŋga

²¹ Yezu ma ləvatar sa: «I daway tek a ɗaw, ka da spəmaya, amana ka mətsam re da meŋgəsey kwar. Slam a ɗaw, i ma daway a huɗa na na, ka slafama ma daway a huɗa kakay.»

²² Zuif hay ma ləvam tok: «Agəna a dzeley aha ma da kəɗa vaw ŋga ba vagay aha ɗaw? Hərway a ləvey a neney: slam a ɗaw ma daway na, ka dawam a huɗa tata kakay ana na?»

²³ Yezu ma mbəɗatar kava: «Kuray na ndaw ma dala hay, yah na ndaw ma 'ərlam; kuray na ndaw ma bəla ɗey hay, yah na ndaw ma bəla ɗey tikay.

²⁴ Ka vəday, i ləvakwar ka da mətsam da meŋgəsey kwar hay na, hərwuiya. Akwa haɗaw kuray ka təɓama ka mevel a kwar yah na, ‹Yah daha› kakay na, na ŋga na na ka da mətsam na da meŋgəsey kwar.»

²⁵ Taya ma ləvamar tok: «Ɗagay kah ana na way?» Yezu ma mbəɗatar kava: «Na kwa ka mətsaya har kakay ma ləvakwar zla da mezley ana.

²⁶ Ka kuray ekəɗey na, guma ɗaw ta sariya ɗaw ma kafakwar haɗadzidzay daha. Ama Ndaw ma sləradiyawa na na, a tsey dərka, tek a ɗaw ma tsənadərawa ka tsakay ŋga na na, i ɓar a bəla na ŋga.»

²⁷ Taya ka tsənadama a tsatar na ka Baba kakay.

²⁸ Arka Yezu ma ləvatar tok: «Aza andza kuray ka da tsakafadama Bəzey ma Ndaw ba na, ka da səradama yah na, Yah daha, tek na i me key ma bay 'ar ma vaw ɗaw ana na dakay. I tsey na guma ma Baba ɗaw ma tatəkadiyawa na.

²⁹ Ndaw ma sləradiyawa na na, ŋga ta yah, ɗaɗa ŋga ka mbəkadaya makəra ɗaw kakay, ka vəday i key ka pas ka pas na tek na ma dar 'ar ana hay.»

³⁰ Andza a tsey aha andza neney na ndaw hay haɗadzidzay ma pam 'ar ka ŋga.

Bəzey ma hwaɗ ma Abraham dərka na hay

³¹ Arka Yezu ma ləvatar a zuif na ma pəmawa 'ar ka ŋga na hay tok: «Haɗaw ka ndzam da guma ɗaw me ləvey na, dərka na, kuray na gawla ɗaw hay.

³² Ka da səradama dərka na, arka dərka na a da təradakwar na, ndaw ma wama 'ar ata na hay.»

³³ Taya ma mbəɗamar kava: «La na bəzey ma hwoɗ ma Abraham hay, ɗaɗa ndaw ka kadandar beke tikay sana, ka ləvandar la da wama 'ar ala na, ka mey?»

³⁴ Yezu ma mbəɗatar kava: «Dərka dərka na i ɓadakwar ekəɗey: Haɗaw ndaw ana ka ŋgəsey ba na, ŋga na beke ma meŋgəsey aha.

³⁵ Beke na, a ndzey na da 'ay ana ma tsoy aha kakay, ama Bəzey ma 'ay ana na, a ndzey na ma tsoy aha.

³⁶ Zla ekəɗey haɗaw Bəzey ma 'ay ana ma mbəɗəkurawa na, ka da ndzam na ndaw ma wama 'ar ata na hay dərka na.

³⁷ Ayaw i sərada ha kuray na bəzey ma hwoɗ ma Abraham hay, ama hərway ma guma ɗaw ma fuləkakwar a vaw kakay ana na, ka səpəmaya ma kəɗəmaya ba vagay aha.

³⁸ Yah na i tsey na ka tek i ma nəkadərawa ka slam ma Baba ɗaw ana, ama kuray na ka kam na tek na kuray ma tsənadəmərawa ka tsakay ma baba kwar ana.»

³⁹ Taya ma mbəɗam kava: «Baba la, na Abraham.» Yezu ma ləvatar: «Haɗaw kuray bəzey ma Abraham hay na, kam mber andza ma Abraham ana tok.

⁴⁰ Azlakwa tok na, ka səpəmaya ekəɗey, ma da kəɗəmaya ba vagay aha, yah a neney ma tsakwar mey ma dərka na i ma tsənadərawa ka tsakay ma Bay ma Bəla na, tek na Abraham ka kərawa kakay ana.

⁴¹ Ama kuray na, ka kam na mber ma baba kwar hay.» Taya ma mbəɗamar kava: «La na bəzey ma ndaw me tsəley so na hay tikay, Baba la na, Bay ma Bəla asləta.»

⁴² Yezu ma ləvatar: «Hana Baba kwar Bay ma Bəla na, akwatay ka wuɗəmaya, hərway i bawa na da Bay ma Bəla, i sawa na da ŋga, i sawa na ma bay 'ar ma vaw ɗaw ana kakay, ma sləradiyawa na ŋga.

⁴³ Ɗagay ka tsənadama guma ɗaw me tsey kakay na ka mey? kavəday ka slafama ma dzəkafa sləmay ka guma ɗaw kakay.

⁴⁴ Baba kwar na, Sataŋ, ka wuɗam me key na, andza ma baba kwar ana me wuɗey. Zla da mezley ana təŋga na, mber aŋga na, sey ma zəɗadara 'ar a ndaw. Ŋga ka slafa me ndzey da dərka kakay zləna, dərka da vaw ŋga dakay. Andza a tsey maləwaɗay na, a bawa na da zleley ŋga na, mavəday ŋga maləwaɗay aha, baba ma maləwaɗay.

⁴⁵ Andza ŋga ɗaw tey na, i tsakwar na mey ma dərka, ka pəmaya 'ar kakay na, kavədiya.

⁴⁶ Ndaw da walaŋ a kwar ma slafa me ləvey: i ka ŋgəsar ba, na way? Azlakwa i tsey na dərka sana, ka pəmaya 'ar kakay na, ka mey tok?

⁴⁷ Ndaw ana ndaw ma Bay ma Bəla na, a pey sləmay ka mey ma Bay ma Bəla na. Ka pəmaya sləmay kakay na, ma vəday kuray ndaw ma Bay ma Bəla ahiya kakay.

⁴⁸ Zuif hay ma mbəɗafəmara kava: «La ma ləvafəmaka kah na ndaw Samariteŋ, fakalaw da 'ar na kassla dərka.»

⁴⁹ Yezu ma mbəɗafatara kava: «A'ay, 'ar a mbəɗaya kakay, i key na, i hasəkadara bəzay a Baba ɗaw, ama kuray tey na ka wuɗam ma hasəkadəmaya bəzay kakay.

⁵⁰ Akwa ɗagay na, i səpey aha ndaw hay ka hasəkadəmaya bəzay tikay, ndaw ma nəkafaya dey, ma ka sariya na na daha.

⁵¹ Dərka dərka na i ləvakwar, haɗaw ndaw ana ka wafa vaw ba ka guma ɗaw na, a da nəkada ha memətsey tikay.»

⁵² Zuif hay ma ləvamar: «Ekəɗey na, la səradama dərka na fakalaw da 'ar eɗek ka dəba tok. Abraham na ka mətsey ba, ndaw sek hay ka mətsam ba atsa, ama kah ekəɗey ka ləvey: haɗaw ndaw ana ka wafa vaw ba ka guma ɗaw na, a da nəkada ha memətsey tikay na teŋgey?

⁵³ Kah na ka fəna baba la Abraham, me mətsey ana ɗaw? Ndaw sek hay tiyatsa na, ka mətsam ba atsa, ka kada vaw ɗek ana na, way tok?»

⁵⁴ Yezu me mbəɗey kava: «Kendzey i ka hasəkadara bəzay a vaw ɗaw ana na, maram a ɗaw ana a da nefey aha dakay. Ma hasəkadaya bəzay na, Baba ɗaw, na kuray ma ləvam Bay ma Bəla a kwar ana.

⁵⁵ Kuray na ka səradəmərawa tikay, ama yah na, i sərada, i ka ləvey: i sərada kakay na, na ŋga na na, i ka tərey ndaw maləwaɗay aha ba, kal kal andza kuray, ama yah na, i sərada, i wafa vaw ka guma ŋga.

⁵⁶ Baba kwar Abraham ma kawa wuiya da ’ar aŋga ma dzalawa na ka nəkada pas a ɗaw: ŋga ma nəkada na, ŋga me rəhey ta wuiya.»

⁵⁷ A dəba ma guma ɗey na, zuif hay ma ləvamar: «Mevey ɗek ana na, ka husada kokurow zlam kakay tok na, ka ləvey kah ka nəkada Abraham ba.»

⁵⁸ Yezu ma mbəɗatar kava: «I ɓadakwar dərka dərka na, da zla ka yəmərawa Abraham tsaray kakay na, Yah daha.»

⁵⁹ Taya na ma kwakusam ŋgwa, ma da kweytsa, ama Yezu ma ləha vaw ŋga, ma bawa ŋga da 'Ay me key Kuley.