Mey Hayna Wayna ma Yezu Kriste Zaŋ 4 - MEY HAYNA WAYNA MA YEZU KRISTE MA MEVEY

Yezu ta ŋgwas Samariteŋ ana daha

¹ Andza Yezu ma tsənada ba, Fariziyeŋ hay ka tsənadama ba waya gawla ŋga hay haɗadzadzay, a dzuhəɓey aha ndaw hay a fəna Zaŋ na,

² - ka me tsey ma guma na, Yezu ana ta 'ar aŋga na na, a dzuhəɓey aha ndaw hay kakay, ama me dzuhəɓey na gawla ŋga na hay-

³ ŋga me lətsey ba da Zudey, ma daw təŋga a Galiley.

⁴ Azlakwa tok na, a dafa na ka tezlerey na ta Samari.

⁵ andza ha tok na, ŋga me husey a wuraw ma Samari ana daha, a zəlamar Sikar, bəse ta ley ana daha Zakob ma vəladara a bəzey ŋga Zozef.

⁶ Ka slam ana na, ɓandaw ma Zakob ma zləla ha kava. Ka yawa vaw ba me heley na, Yezu me ndzey ka mey ma ɓandaw ana hana. Pas a key wuzla rəpas.

⁷ Ŋgwas Samari ana daha, ma husawa ma da təɗey yam. Yezu ma ləvar: «Vəlaya yam me sey tey.»

⁸ Akwa gawla ŋga hay na, ka ndzam a wuraw ma da haɗəkawa tek me zəmey.

⁹ Ama ŋgwas a hana na, ŋgwas Samariteŋ ana, ma ləvar: «Kah na ndaw zuif tok na, ka tsəhafaya yam ka yah ŋgwas Samariteŋ na, teŋgey teŋgey?» Akwa ɗaɗa Zuif hay na, a dzəmam har a gandaf ta Samariteŋ hay kakay.

¹⁰ Yezu ma mbəɗar kava: «Hana kah ka sərada tek ma hayaha ma Bay ma Bəla, kah ka sərada ndaw a neney ma ləvaka ‹vəlaya yam me sey› ana na, ma da tsəhafa na kah, akwatay na ka vəlaka yam mendzey ana ba.»

¹¹ Ŋgwas ana ma ləvar: «Miter, tsafgal da har eɗek dakay; ya, ɓandaw ana sololo sa tok na, ka da zəgawa yam me vəley mendzey ana na, da may?

¹² Kah na ka fəna baba la Zakob, ma zləladandar ɓandaw a neney, ŋga na ka sey ba, bəzey ŋga hay, ta gənaw aŋga hay dzay ana ɗaw?»

¹³ Yezu ma mbəɗar kava: «Kwa way way me sey yam a neney na, re yam a da harta təŋga;

¹⁴ ama ndaw ma da sey yam i ma da vəlar ana na, ɗaɗa yam a da harta ha sakay. Dzadzak na yam na i ma da vəlar ana na, a da tərey da vaw ŋga na, 'ar yam aha, a vey a mendzey me ndəvey kakay ana.»

¹⁵ Ŋgwas ana, ma ləvar: «Miter, aŋga vəlaya yam ana na, ma aza ɗaɗa yam ka da hartaya sazlay, ma aza i ka da mawa, ma da təɗaɓa yam ka sləna sazlay.»

¹⁶ Yezu ma ləvar: «Daway da zələrawa zel eɗek na mawa ka sləna.»

¹⁷ Ŋgwas ana ma mbəɗar kava: «Zel a ɗaw dakay.»

¹⁸ Yezu ma ləvar: «Kah ka tsərawa ba kassla, andza kah me ləvey: ‹zel a ɗaw dakay› ana na, hərway kah me tserey zel zlam dzay, ndaw ana ekəɗey kah da ɗəma na na, re zel eɗek kakay atsa. Ka neney na kah ka tsawa dərka ba.»

¹⁹ Ŋgwas ana ma ləvar: «Miter, i sərada azlakwa kah na ndaw sek.

²⁰ Baba la hay a nam dəba ka 'ar ma mamba neney, ama kuray na, ka ləvam slam me ney dəba na sey da Zeruzalem.»

²¹ Yezu ma ləvar: «Ŋgwas eɗey, pey 'ar ka guma ɗaw eɗey, har ana a sawa ha, ma da ney dəba na kwa ka ’ar ma mamba ɗey sakay, kwa da Zeruzalem sakay, ka da namar dəba a Baba na.

²² Kuray na ka namar dəba na, a tek na kuray ma səradama kakay ana, ama la na, la namar dəba na, a tek na la ma səradama na. Hərway ma mey na, me buwey a sawa na da 'ay zuif hay.

²³ Amana har ana a husawa ha, ekəɗey ana na, ŋga kəɗey, ndaw ma nam dəba hayna hay a da namar dəba a Baba na, ta mesəfrey, ta dərka. Akwa Baba a səpey na ndaw me ney dəba andza na ŋga na hay tok.

²⁴ Bay ma Bəla na mesəfrey aha, hərway ma mey ndaw ma namar dəba na hay na, a dafa ka namar dəba na ta mesəfrey, ta dərka.»

²⁵ Ŋgwas ana ma ləvar: «I sərada ha Ndaw ma vaha 'ar ana a da sawa, na ma zəlamar Kriste ana, andza aza ka da sawa ba na, a da ɓadandakwar tek hay tabiyaha.»

²⁶ Yezu ma ləvar: «Ma tsaka guma neney na, yah ana.»

²⁷ Arka na gawla ŋga hay ma husəmawa. Andza taya ma nəkadama Yezu a tsam aha guma ta ndaw ŋgwas aha na, a rəzlata; amana kwa ndaw ka tsəhafa «ka səpey mey?», dakay na «ka tsar guma ka mey?».

²⁸ Arka ŋgwas ana ma gərada zaw aŋga, ma hway a wuraw, ma ləvatar a ndaw hay:

²⁹ «Səmawa ɗagay, da nəkafəmərawa ka ndaw ana daha, ma ɓadiyawa tek a ɗaw me key ana hay tabiyaha; Naŋgərhay atay ŋga na Kriste hegey?»

³⁰ Taya ma bəmawa da wuraw, ma dawam ’ar ka tsakay ŋga.

³¹ Da varay ana ŋga na na, gawla ŋga hay a təkamar aha ɗay: «Rabi, zəmey tek tizləne.»

³² Ama ŋga ma ləvatar: «Tek me zəmey ɗaw daha mekelehe, na kuray ma səradama kakay ana.»

³³ Gawla ŋga hay ma ləvam ka 'ar vaw ta na: «Akwatay ndaw ka vələrawa tek me zəmey ba ɗaw?» Na hərwuiya.

³⁴ Yezu ma ləvatar: «Tek me zəmey ɗaw na, me key tek andza ma Ndaw ma sləradiyawa na, ma ndaslada meslərey ŋga na.

³⁵ Kuray na ka ləvam ka ’ar vaw kwar ana andza neney seŋgey: «Da kiya faɗ na, har me tsuwey daw a husawa.» Ama yah na i ləvakwar: tsakafadama dey, nəkam dey: daw na, ma ŋgwala ha tsoy, təɗey me tsuwey.

³⁶ Nəkafama ekəɗey na, ndaw me tsuwey daw ana a ndzafa ha tek ma merɓey ŋga, a tsəhadara 'ar ta bəzey ana a mendzey me ndəvey kakay ana. Arka a da key na, ndaw me sləkey, ta ndaw me tsuwey ana a kam wuiya ta ka masləta ha.

³⁷ Hərway bəzay ma guma na me tsey andza neney ana na dərka na, a ləvey: ‹Ndaw naŋgar ka sləka ba na, ndaw naŋgar a tsuwa.›

³⁸ I ma sləradakwar a ley na kuray ka yəmawa vaw da huɗa kakay ana, amana ndaw mekele hiya ma yəmawa vaw, amana, kuray na ma fuləkwam a ley ana, na taya ma yəmawa vaw da huɗa na.

³⁹ Samariteŋ hay haɗadzidzay da wuraw ana ma pam 'ar ka Yezu, hərway ma guma ma ŋgwas ana hana me key seydewe me ləvey: ‹ma ɓadatiyawa tek aɗaw ma kawa na hay tabiya ha na.›

⁴⁰ Arka tsa na, andza taya ma husəmawa ba ka tsakay ŋga na, Samariteŋ hay ma kamar amboh ma ka ndzey da 'ay ta. Arka ŋga me ndzey da huɗa dəvaɗ tsew.

⁴¹ A da key sa na ndaw ma pam 'ar kavəday ma guma ŋga na hay na haɗadzidzay a fəna sa.

⁴² Arka taya ma ləvamar a ŋgwas ana hana na: «La pam 'ar ekəɗey na hərway ma guma ɗek ma tsandar ana sakay, la na ka tsənadama ba ta ’ar a la na, la səradama ekəɗey, ŋga na Ndaw me buwey bəla dərka na.»

Yezu a ndalada bəzey ma bay ma sidzew ana daha

⁴³ Meney dəvaɗ tsew a dəba na na, Yezu me lətsey ba da slam ana, ma daway a Galiley.

⁴⁴ Hərway ma mey na, Yezu ana ta ’ar aŋga na ka ləvey ba: «Ɗaɗa a ɗamar ndaw a ndaw sek da wuraw aŋga na tikay.»

⁴⁵ Ama andza ŋga me husey ba a Galiley na, ndaw ma Galiley ana hay ma ŋgəlama haya hayaha, hərway taya ka dawam ba a magurlam a Zeruzalem tiyatsa, ka nəkadəmərawa tek ma Yezu me key ana hay ba tabiyaha.

⁴⁶ Arka Yezu me mey a Kana ma Galiley, slam ŋga ma mbəɗadərawa yam zom aha na. Ɗuhwa ma sidzew ma bay ana daha da Kafarnawom, vaw a tsafa ka wawa ŋga.

⁴⁷ Andza ŋga ma tsənada Yezu a sawa ha da Zudey a Galiley na, ŋga ma sawa ma ndzafa, ma kar amboh, ma ka hərɗey ma da ndaladərawa wawa ŋga a mətsey aha.

⁴⁸ Yezu ma ləvar: «Haɗaw kuray ka nəkadama zeheɗ ta ɗeɗew hay kakay na, ka pam 'ar tikay!»

⁴⁹ Ɗuhwa ma sidzew ana hay ma ləvar: «Bay ɗaw, hərɗey, maga wawa ɗaw a da mətsey ba na.»

⁵⁰ Yezu ma ləvar: «Daway, wawa ɗek ŋga werwer.» Ndaw ana me pey 'ar a guma ma Yezu ana ma tsar ana, ŋga me zəgey tsəveɗ ma daw a mbaw.

⁵¹ Andza a hərɗey aha na, gawla ma 'ay ŋga hay a səmawa ha, ma zlam 'ar na ma ləvamar: «Wawa ɗek ŋga werwer!»

⁵² Ŋga ma tsəhafata: «Ɗagay tek ana a da kafa ŋgama na ma lam teŋgey?» Taya ma mbəɗamar kava: «Waw a həlafa na teleɓey ma pas ma həɓey ɗay.»

⁵³ Arka baba na ma sərafa na tek ana a da key na, kassla ka har ma Yezu ma ləvar: «Wawa ɗek ŋga werwer ana.» Zla da har ana ŋga na tsana, ŋga me pey 'ar ta ndaw ma 'ay ŋga hay adzay.

⁵⁴ Neney na me key zeheɗ ma Yezu ma tsetsew ana, ma mawa ŋga da Zudey a Galiley.