Mey Hayna Wayna ma Yezu Kriste Zaŋ 15 - MEY HAYNA WAYNA MA YEZU KRISTE MA MEVEY

Yezu na vəɗe ma viŋe hayna

¹ Yah na vəɗe ma viŋge hayna, Baba ɗaw na, ndaw ma nəkafa dey ana.

² Mendzey ma hawal na ma tapa ha ka yah, me yey bəzey kakay ana na, a rətsama ba. Mendzey ma hawal na me yey ana na, a kalama, ma aza ka yey a fəna satsa.

³ Kuray ekəɗey na, ma kala hiya ba tsoy ta guma ɗaw i ma tsakwar ana.

⁴ Ndzam da yah andza i me ndzey da kuray ana. Kal kal andza ma hawal, haɗaw ma tapa ha ka vəɗe ma viŋe ana kakay na, a slafa ka ’ar vaw ŋga na me yey bəzey kakay. Kuray ekəɗey, haɗaw kuray ma tapa hiya ka yah kakay na, andza ha atsa.

⁵ Yah na vəɗe ma viŋe ana, kuray na hawal ana hay, ndaw ana ma ndza ha da yah, yah ma ndza ha da ŋga tey na, a da yey kava haɗadzidzay, hərway mandzar yah na, tek a kwar ma slafa me key na dakay.

⁶ Haɗaw ndaw ana ma ndza ha da yah kakay na, a kəladama ba a bəla andza ma hawal, a ŋgweley, arka a kwakusama, a kuyadama a waw, arka a təɓam.

⁷ Haɗaw kuray ma ndza hiya da yah, guma ɗaw hay ma ndza hiya da vaw kwar na, ka slafama me tsəhey tek ma sakwar ana hay na, a da husafəkurawa.

⁸ Tek ma vəlar maram a Baba ɗaw na, me yey kwar kava haɗadzidzay ana, arka na, ka təram gawla ɗaw ahiya.

⁹ Andza ma Baba ma wuɗaya na na, yah tey na, i ka wuɗəkurawa ba, ndzam da ma wuɗa vaw ɗaw.

¹⁰ Kendzey ka tsənəmatar aha sləmay a mey ma mewey ɗaw hay na, ka da ndzam na da ma wuɗa vaw ɗaw. Andza na ŋga ɗaw i ma tsənatar sləmay a mey ma mewey ma Baba ɗaw tey na, i ma ndza ha da ma wuɗa vaw ŋga na tey.

¹¹ I tsadakwar na aza wuiya ɗaw ka ndzey da kuray, wuiya kwar ka key na kərem aha.

¹² Mey ma mewey ɗaw na ŋga kəɗey: wuɗam vaw ka 'ar vaw kwar ana, andza na ŋga ɗaw, i ma wuɗəkurawa ana.

¹³ Kwa ma wuɗa vaw ma fəna, ma ndaw ma vəlada mendzey ŋga, hərway ma ndaw aŋga ma wuɗata na hay na, dasakay.

¹⁴ Kuray na dzam a ɗaw hay, haɗaw ka kam tek andza na i ma ləvakwar ana na.

¹⁵ I zəlakwar na gawla ma 'ay ɗaw hay sakay, hərway gawla ma 'ay na, a sərada tek ma Bay ma 'ay ŋga me key ana kakay. I zəlakwar na dzam a ɗaw hay, kavəday tek a ɗaw ma tsənadərawa na tabiyaha ka tsakay ma Baba ɗaw na, i ka ɓadakwar ba.

¹⁶ Ma səpiyawa na kuray kakay, ama ma gaɗəmukurawa na yah. I ma padakwar ma aza kuray ka dawam, ha yam bəzey arka bəzey kwar ana hay ka ndzam, ma tek a kwar ma da tsəhey tabiyaha da me zəley ɗaw ka Baba na, a da vəladakwar.

¹⁷ Mewey ɗaw na ŋga kəɗey: wuɗam vaw ka 'ar vaw kwar ana hay.

Bəla a ŋgəladata dey ta Yezu ta ndaw aŋga hay kakay

¹⁸ Kendzey andza bəla a ŋgəladakwar dey kakay na, səradama a ŋgəladiyawa dey kakay ka mey na ta yah.

¹⁹ Kendzey kuray ma vəla hiya ma bəla na, bəla a da wuɗakwar zləna, hərway bəla a wuɗey na, tek ma dey har aŋga. Ama, kuray na, ma vəla hiya ma bəla ɗey kakay, ma padakwar gəle ta bəla na ɗey na yah, nəkafama bəla a ŋgəladakwar dey kakay na, hərwuiya.

²⁰ Sərafama ka bəzay ma guma ɗaw i ma tsukurawa na: «Gawla ma 'ay na, a fəna bay ma 'ay ŋga kakay.» Haɗaw ka kadəmaya tatakoy ba na, a da kadəmakwar tiyatsa. Haɗaw ka tsənəmiyawa sləmay ba a guma ɗaw na, a da tsənəmakwar sləmay tiyatsa.

²¹ Tek a neney tabiyaha, a da kadəmakwar na, kavəday ma mezəley ɗaw, hərway ma mey na, a səradama ndaw ma sləradiyawa na kakay.

²² Hana i ka sawa zlay, hana i ka tsatar guma zlay na, meŋgəsey ka taya dakay. Ama ekəɗey na, meŋgəsey ta na na, amboh aŋga na dakay.

²³ Ndaw ma ŋgəladaya dey kakay na, a ŋgəlada dey ta Baba ɗaw kakay tiyatsa.

²⁴ Hana tek a neney hay i me key da walaŋ ata na, kwa ɗaɗa ndaw ka key andza ha dakay ana zlay na, meŋgəsey ta dakay. Ama ekəɗey taya ka nəkadama ba, amana re a ŋgəladəmandar dey kakay, yah ta Baba ɗaw ana na,

²⁵ ma aza ka ndesley andza ma guma na mawinda ha da mewey ta na: «A ŋgəladəmaya dey kakay mandzara malay.»

²⁶ Aza i ka da slərafukurawa ndaw ma da dzaŋgərafakwar ana ba ka slam ma Baba, Mesəfrey ma dərka, na ma sawa ka slam ma Baba na na, a da ka seydewe ɗaw ana ta 'ar aŋga na.

²⁷ Kuray tiyatsa na, ka da kam seydewe ɗaw ana, kavəday lakwa dzaya zla da mezley ana.