Mey Hayna Wayna ma Yezu Kriste Zaŋ 13 - MEY HAYNA WAYNA MA YEZU KRISTE MA MEVEY

Yezu a pəradatara sek ma gawla ŋga hay

¹ Amba magurlam ma Pak na, Yezu a sərada har aŋga ka slawa ba, har aŋga ma da tesey ka dala ɗey 'ar a 'ay Baba ŋga. Ŋga ka wuɗata ndaw aŋga hay ba ka bəla neney, a wuɗata ha səlekw.

² Da har ana a zəmam aha tek na, ɓa Sataŋ ka tələkar tsoy a mevel ma Zudas Iskariyot, bəzey ma Simoŋ, me dzeley 'ar ma da haɗəkada ba.

³ Ŋga na a sərada Baba ka vəladatara tek hay ba tabiyaha a huɗa har aŋga. A bawa na da Bay ma Bəla, a mey a ’ar 'ay Bay ma Bəla ana.

⁴ Yezu me lətsey ba ka slam me zəmey tek, ma tsəkwa kelmedzey ŋga ba, me zəgey petəle, me rey a bəzay.

⁵ Ŋga me mbəɗey yam a tasawa, ma zlar ma pəradatara sek ma gawla ŋga hay, ma takaɗadatara ta petəle a hana na ma raha da bəzay ŋga na.

⁶ Ŋga me husey ka slam ma Simoŋ Piyer, Simoŋ Piyer ma ləvar: «Kah Bay’ərlam a ɗaw tok na, ka pəradaya sek»

⁷ Yezu ma mbəɗar kava: «Tek a ɗaw ana me key ekəɗey ana na, ka slafa ma sərada tsaray kakay, ama a dəba na na, azambay ka da sərada.»

⁸ Piyer ma ləvar: «Me pərey na sek a ɗaw daw? Ɗaɗa a key vaw kakay.» Yezu ma mbəɗar kava: «Haɗaw i ka pəradaka sek kakay na, i da dzəmama ha sakay.»

⁹ simoŋ Piyer ma mbəɗar kava: «Bay’ərlam a ɗaw, na ŋga na na, sek dada sakay, ama na pəradaya har ta 'ar aha dzay.»

¹⁰ Yezu ma ləvar: «Ndaw ma pəra vaw aha na, a pərey vaw sa ɗaw, hərway vaw ŋga kərem ma bazləma ha, kuray ekəɗey na ma bazləma ahiya, amana tobiya kwar ahiya kakay.»

¹¹ Akwa na a sərada ha ndaw ma da haɗəkada na. Arka a da ləvey: ‹Kuray tobiya kwar aha ma bazləma hiya kakay na›, na kavədiya.

¹² Andza ma ndəvada ma pəradatara sek ba na, Yezu ma zəga kelmedzey ŋga, ma mey ka slam me zəmey tek, arka ma ləvatar: «Ka səradama tek aɗaw a neney i ma kakwar ana ɗaw?

¹³ Ka zələmaya na ‹Miter, Bay’ərlam›, Ka ləvam andza ha na təɗe, zləna hərway yah ana dərka na.

¹⁴ Zla ekəɗey andza i ma pəradakwar sek, yah Bay’ərlam a kwar, Miter a kwar aha, i ka pəradakwar ba na, pəram sek ka 'ar vaw kwar ana hay andza ha tey.

¹⁵ Hərway i vəlakwar eɗey na tek ma tsafa dey kava: tek andza ma kadakwar ana na, kam ka 'ar vaw kwar ana na, andza ha tey.

¹⁶ Dərka dərka na i ləvakwar: gawla ma 'ay na, a fəna bay ma 'ay ŋga kakay dakay bəzey me slərey na a fəna ndaw ma slərada na kakay.

¹⁷ Kendzey kuray ka səradama tsoy, ka kama ha andza ha na, ka da ndzam da wuiya.

¹⁸ I tsey na ma kwar tabiyaha kakay, i səradata ha ndaw i ma walata na hay, ma aza Mewindey Kokwoɗ ana ka ndesley andza ha: Ndaw me zəmey tek ta yah ana na tok na, a da mbəɗafaya 'ar ka yah ana.

¹⁹ I ləvakwar ekəɗey na, amba tek ana ka sawa, aza ka da husawa ba na, kuray ka pam 'ar: Yah daha.

²⁰ Dərka dərka na i ləvakwar: ndaw me ŋgəley ndaw i ma da sləradata na hay na, a ŋgəley na yah ana, ndaw me ŋgəley yah tey na, a ŋgəley na Ndaw ma sləradiyawa na.»

Yezu a ɓada waya: «Zudas a da haɗəkadaya.»

²¹ A dəba ma guma ŋga neney na, Yezu ma dawara ha da mevel, ŋga ma zlar me tsey guma pəlaŋ pəlaŋ: «Dərka dərka na i ləvakwar: ndaw asləta da walaŋ a kwar a da haɗəkadaya.»

²² Gawla ŋga hay ma nəkam dey ka 'ar vaw ta na hay, ma tsəham akwatay a tsey na ka way.

²³ Ndaw asləta da walaŋ ma gawla ŋga hay, na Yezu ma wuɗa na, ma ndza ha kəreh ka tsakay ŋga.

²⁴ simoŋ Piyer na ma kar ta har: «Tsəhafa ɗagay, a tsey na ka way?»

²⁵ Gawla na ma gweɗəkwey ka 'ərev ma Yezu ma tsəhafa tok: «Bay’ərlam, ɗagay na way?»

²⁶ Yezu me mbəɗey kava: «Ndaw na i ma da kar lar ka 'ar ma ɗaf mey asləta na.» Arka tsana, Yezu me tsey ɗaf mey asləta, ma kafa lar, ma vəladara a Zudas Iskariyot bəzey ma Simoŋ.

²⁷ Da har ana andza ŋga ma vəladara ɗaf ana mey asləta na ba na, Sataŋ ma fuləkwar a vaw ma Zudas. Arka Yezu ma ləvar tok: «Tek eɗek ana ma da key ana na, ka ba bəse.»

²⁸ Kwa ndaw asləta da walaŋ ma ndaw ana hay ka slam ana ma tsənada ɗagay a tsey andza ha na ka mey na dakay.

²⁹ Andza sumkwo ta ma pa ha da har ma Zudas na, ka sa ma ndaw hay a dzalam na waya: Yezu a ləvar na ka da haɗəkawa tek ma kada magurlam, dakay na ka daw ka da vəlatar tek a ndaw mbarga na hay.

³⁰ Arka Zudas tey ma təɓa ɗaf ana mey asləta na ba na, ma bawa təŋga tsa, dəvaɗ kabəba.

Mewey wayna

³¹ Andza ma bawa ma Zudas ba na, Yezu me ləvey: «Ekəɗey na ka hasəkadəmara bəzay tsoy a Bəzey ma Ndaw, a da hasəkadəra bəzay a Bay ma Bəla na ta har aŋga;

³² Bay ma Bəla a da hasəkadara bəzay a vaw ŋga na, mazlambar aha a da hasəkadara bəzay.

³³ Dem a ɗaw hay, me ndzey lakwa ka vaw na, a zarawa na nekəɗey dada, ka da səpəmaya. Andza na i ma ləvatar a Zuif ana hay na, ekəɗey a kuray tiyatsa na, i ɓadakwar, slam a ɗaw i ma da daw a huɗa na na, ka da dəmaɓa a huɗa tata kakay.

³⁴ I vəlakwar mey ma mewey wayaha: wuɗam vaw ka 'ar vaw kwar ana hay. Andza na ŋgaɗaw i ma wuɗakwar ana na, wuɗam vaw ka 'ar vaw kwar ana hay.

³⁵ Ka neney na ndaw hay tabiya ha a da səradama kuray gawla ɗaw ahiya na, ka wuɗey vaw kwar ka 'ar vaw kwar ana hay na.»

³⁶ Simoŋ Piyer ma ləvar: «Bay’ərlam a ɗaw, ɗagay ka da daw na a may?» Yezu ma mbəɗar kava: «A slam a ɗaw ana ma da daway ana na, ka da slafama ha ma daway ekəɗey ana tsaray kakay. Ama azambay ka mey na, ka da səpəmiyaɓa.

³⁷ Piyer ma mbəɗafara kava: «Bay’ərlam a ɗaw ɗagay i slafa ma səpaka ekəɗey ana kakay na, ka mey? I da vəlada mendzey ɗaw hərway ɗek.»

³⁸ Yezu me mbəɗey kava: «Ka da vəlada mendzey ɗek hərway ɗaw? Dərka, dərka na i ləvaka, maga dzagulok a da zlehey na, kah ka ləvey tsoy dey makar, ka səradaya kakay.»