Galat 6 - MEY HAYNA WAYNA MA YEZU KRISTE MA MEVEY

Mewey ma Kriste

¹ Malam a ɗaw hay, kendzey andza ka sərafama ba ka ndaw ka ŋgəsey ba na, ma da lətsadərawa na kuray ndaw ma ndzaya da Mesəfrey ana hay, ta ndaraw ma kokwoɗ; wey vaw zləna, naŋgər hay kah ana a da həlafəmaka suwet tey hegey!

² Dzənam vaw me zəgey tek ma ləhey ana ka 'ar vaw kwar ana, kəɗey na, ka ndasladama mewey ma Kriste.

³ Hərway ndaw ana a tərada vaw ŋga, andza ndaw ɗuhwa ha na, azlakwa zlay ŋga na ndaw tedehe na, a key na, a zləgey bay 'ar ma vaw ŋga na.

⁴ Ama na kwa way way na ka sasəka mber aŋga na, kendzey andza ka ndzefey tek ma dar 'ar ana ba da huɗa na, ka malada na, ta vaw ŋga na zləna, ta ndaw mekelehe zlay.

⁵ Hərway kwa way way a da zəgey na tek ma 'ar aŋga na.

⁶ Ndaw ma təɓa Guma ma tatəkadəmara na na, da zleley ŋga tabiyaha na, ka par nekəɗey a ndaw ma tatəkadara na.

⁷ Ka da zləgam zlay: Bay ma Bəla a mbəkada vaw ŋga ma ndaw ka saŋgərafa kakay; hərway tek ma ndaw ma sləkey ana na, ma da ɓətsa na ŋga na təŋga.

⁸ Kendzey ndaw a sləkadara na a slaw vaw na, a da ɓətsey na tek ma slaw vaw ma yawa kava na: me zəɗey. Ndaw ma sləkadara a Mesəfrey tey na, a da ɓətsey na tek ma Mesəfrey ma yawa na: mendzey ma ndəvey kakay ana.

⁹ Kakwama hahaya mandzara ka mətsandakwar har; hərway aza har ana ka da sawa ba na, i da ɓətsakwa, haɗaw andza har ka mətsandakwar kakay na.

¹⁰ Kəɗey tok na, andza bəzay a rafandakwar daha mba na, kakwama mber ka nafatar a ndaw hay tabiyaha, ɗuhwa ha na ma ndaw ana bəse ka tsakay lakwa da ’ar me pey ana hay.

Tuwaw ma gazləla na ma Kriste ta bəla wayna

¹¹ Nəkafama ka mewindey a neney ma winda ha dagwalam ana, ma windəraɓa na, yah ana ta har a ɗaw ana!

¹² Ndaw ma wuɗam, ma sladəmakwar kuɗey ana hay na, ndaw ma wuɗam me dzeley ma ɓada vaw ma slaw vaw ana hay. Tek ata asləta ma wuɗam na, ka da kadəmata tatakway hərway ma tuwaw ma gazləla na ma Kriste zlay.

¹³ Hərway ndaw ma təkəmatar ɗay ka sladəmatara kuɗey ba na hay na, a tsənəmatar sləmay a mewey kakay. Dakay dakay a slədəmakwar kuɗey na, ma kuray ka ndzafam ma hasəkadəmakwar bəzay da slaw vaw.

¹⁴ Na ŋga ɗaw na, andza ha tikay, ɗaɗa tek a ɗaw ma hasəkadəmaya bəzay a fəna tuwaw ma gazləla na ma Bay’ərlam a lakwa Yezu Kriste na, daha tikay; ta ŋga na, bəla ma dara ha ba ka 'ar ma tuway hərway ɗaw, andza yah ana ma dara ha hərway ma bəla tiyatsa.

¹⁵ Hərway kuɗey ma sla ha, ma sla kakay na, tek ɗuhwa ha da huɗa na dakay, ama na, na Bay ma Bəla ma kadandukurawa dey mekelehe na.

¹⁶ Ma ndaw ma səpama mewey ana tərre andza ha na hay na, zozoy ta ma pəsa mey ma Bay ma Bəla ka ndzey ta taya, ta səkway ma Bay Bəla tabiya ha.

¹⁷ Zla ekəɗey yah na, ndaw ka da ŋgwarfaya 'ar sazlay, hərway yah na, zeheɗ ma Yezu ka vaw ɗaw daha.

¹⁸ Hayna hahaya ma Bay’ərlam a lakwa Yezu Kriste ka ndzey ta Mesəfrey kwar, malam a ɗaw hay. Amen!