Galat 5 - MEY HAYNA WAYNA MA YEZU KRISTE MA MEVEY

Ma mey ta dəba ma hahaya

¹ Kriste a buwandukurawa na, ma lakwa ka tərakwama ndaw ma wama ’ar ata na hay dərka na. Səmam vaw, ma ka da madəmakwar zlambəla ma beke a ɗay sazlay.

² Yah Pol na, i ləvakwar: haɗaw kuray ka slama kuɗey ba na, Kriste a da nafakwar aha sakay.

³ I hərafa waw a fəna sa: kwa way way me səpey ka sladəmara kuɗey ba na, ŋga na Mewey a təkar ɗay ma kata tek ana hay tabiya ha.

⁴ Na ŋga na na, kuray ka tsam ba ka vaw ta Kriste, haɗaw ka səpam dzerey kwar da Mewey na, ka hahaya ma Bay'ərlam na, kuray ka ndəram tsoy.

⁵ Haɗaw na ŋgalakwa ndaw me pey ’ar hay na, la padama me pey dey la na ka Bay ma Bəla, ma da təradandakwar dzerey ahiya ka slam dey ŋga, na la lakwa ma hutakwa ta ma slafa ma Mefrey Kokwaɗ ana ma ɓada me pey ’ar aŋga da ma wuɗa vaw.

⁶ Hərway ma ndaw ŋga da Kriste na, ndaw ma sla kuɗey aha, dakay ma sla kuɗey aha kakay na, a nefey tikay, ama me nefey na, me pey ’ar me key tek da ma wuɗa vaw.

⁷ Ka hwam aha mambay aha sana, ndaw ana andza da vaw kwar ma tsapa tsəveɗ ba, ma təka dərka ma ka vahakwar ana na mey?

⁸ Tek ana andza na ŋga na ma pafakwar wuiya na a sawa na da ndaw ma zəlakwar ana kakay.

⁹ Is ketekwəɗey na, a mbəslada hapa ma haləɓa ha tabiyaha andza na ma ləvam ana.

¹⁰ Na ŋga ɗaw na, i ma pa 'ar aha ka kuray da mezəley ma Bay’ərlam: ka da mbəɗam aha dey a slam mekelehe kakay. Ama ndaw ma sadərawa guma a walaŋ a kwar, ma da daləhwasadakwar ana na, kwa ka key na teŋgey teŋgey na, a da ndzafa me hətey ŋga na.

¹¹ Na ŋga ɗaw na, malam a ɗaw hay, haɗaw re i tələkey mey ta me sley kuɗey mba na, azlakwa a ŋgəladəmaya dey kakay na, ka mey? Azlakwa kəɗey na, me tsey metsembeɗ ma tuwaw ma gazləla na na, ma davasa ha ba!

¹² Ndaw a hay ma hundzasləmakwar guma ma masley kuɗey ana na, hayna taya ka slama ba na kəreh tabiyaha!

Slaw vaw ta Mesəfrey

¹³ Malam a ɗaw hay, a zələmukurawa na, ma kuray ka wama 'ar a kwar, ama da me wey 'ar a kwar ana hana tok na, ka da mbəkadəmara vaw a tek me sey ma slaw vaw zlay, ama na, da ma wuɗa vaw na, dzənam vaw ka 'ar vaw kwar ana hay.

¹⁴ Hərway Mewey tabiya ha kərem a ndzefey me ndesley tabiyaha na, da guma neney asləta na: «ka da wuɗa ndaw ka tsakay ɗek ana na, kalkal andza vaw ɗek ana.»

¹⁵ Ama kendzey ka zam vaw ka 'ar vaw kwar ana hay, ka pəɗam vaw ka 'ar vaw kwar ana hay na, wam daw ka vaw, ka da zəɗam vaw ka 'ar vaw kwar ana.

¹⁶ Pafəmaya sləmay ɗagay: halam na, da mezek ma Mesəfrey, na ŋga na na, ka da kam aha tek ma slaw vaw ma wuɗey ana sakay.

¹⁷ Hərway slaw vaw ta tek aŋga ma wuɗey na, a da dawam aha ka vaw ta Mesəfrey kakay. Mesəfrey a dam ka vaw ta slaw vaw kakay. Vərom daha da walaŋ ata, kəɗey tok na, ka da kəmata tek a kwar ana ma wuɗam ana hay sakay.

¹⁸ Ama haɗaw ma kəsadakwar na Mesəfrey na, ma wakwar 'ar na Mewey sakay.

¹⁹ Mber ma slaw vaw hay na a səradəmata seŋgey: mewey ’ar so ha, me zləɓey, me tsəley so ha.

²⁰ ’ərlam so na hay, hila, dzendze, me tərey vaw, meney dey, ndzəlakokwa, səleŋ, me tsey vaw dugwan ahiya ka ’ar vaw ta na.

²¹ Tek me sey kambəlaɓa, me sey zom kambəlaɓa, me zəmey tek kambəlaɓa, a kam tek ana sa na hay andza ha sa tsa. Ndaw me key tek andza na ŋga na hay na, i ɓadakwar andza na i ma tsəkurawa na, a da zəmam aha slam da Slala ma Bay'ərlam kakay.

²² Ana nəkafama ka mber ma Mesəfrey ma sadərawa na: ma wuɗa vaw, wuiya, zozoy, me zəgey mevel, kokwoɗ, hahaya, me pey 'ar,

²³ ləfeɗeɗe, me wey 'ar ka vaw; mewey na, a kafata say ka tek a neney hay tikay.

²⁴ Ndaw ma vəlaya ma Kriste na hay na, ka daradama slaw vaw ta ba, ka tek ata ma satar, ma dzalam ana hay.

²⁵ Haɗaw lakwa ma ndza hiya ta Mesəfrey ana, mbəkadukwara vaw a Mesəfrey ana ka kəsadandakwar.

Mewey ma Kriste

²⁶ Ka da ŋgalakakwa ka 'ar vaw lakwa na hay zlay, ka 'ar vaw lakwa na hay na, me zerey mey ka da key daha zlay, me ney dey ka da key daha zlay.