Filipieŋ 3 - MEY HAYNA WAYNA MA YEZU KRISTE MA MEVEY

Dzerey hayna

¹ Ka sa ma guma hay ŋgey malam a ɗaw hay, kam wuiya da mezəley ma Bay’ərlam. Ma madukuraɓa mewindey guma andza ha na satsa na, a tsaya vaw kakay, ama a kuray na, a makwar 'ərev.

² Wam daw ka vaw ka gədey hay! Wam daw ka vaw ka ndaw ma kam mber haya kakay ana hay! Wam daw ka vaw ka ndaw ma sla kuɗey haya kakay ana hay.

³ Hərway ndaw ma sla kuɗey ana hay na, lakwa neney, ma kakwar kuley a Bay ma Bəla ta Mesəfrey ana, ma padakwa me wezley dey lakwa ka Yezu Kriste ana, ma mbəkadakwa vaw lakwa hay a bay'ar ma vaw lakwa na hay kakay ana.

⁴ Akwa dzadzak na, i slafa ma ɗar ndaw a vaw ɗaw ana tiyatsa, kendzey ndaw mekelehe a par 'ar ma ɗar ndaw a vaw ŋga na na, i slafa a fəna satsa, yah na!

⁵ I ma sla kuɗey aha da meney ma tsakar ana, i da səkway ma Israyel, da gedzek ma Beŋzameŋ, i ndaw Ebrew, bəzey ma Ebrew, ka Mewey na, i Fariziyeŋ aha,

⁶ ka ma gawla ley na, i ndaw ma kada tatakway ta Egliz, ka me səpey dzerey da Mewey na, i da tərey na, ndaw ma slafa ma ŋgəlaya bəzay dakay.

⁷ Arka tek a neney hay tabiyaha kete ka yah, andza riba na hay na, a da kafaya ekəɗey na, andza me zəɗey, kavəday ma Kriste.

⁸ Ama ayaw, i nəkafata ka tek ana ŋga na hay na, andza me zəɗey tedehe, ka slam dey me zleley a neney ma fənata tabiyaha na, da ma sərada Yezu Kriste Bay’ərlam a ɗaw aha. Hərway ŋga na, i ka zəɗadata tek a ɗaw hay ba tabiyaha, ha arka, i nəkafata ka tek ana ŋga na hay na, andza kwaskwalay tedehe, ma aza i ka da ndzafada Kriste.

⁹ Ma i ka da key da ŋga na, ta dzerey ana ma sawa da Mewey ana kakay, amana, ta na ma sawa da me pey 'ar ka Kriste ana, dzerey na ma sawa da Bay ma Bəla ana, na ma zəga har aha na, ka me pey 'ar ana.

¹⁰ Haya a dafa na, ŋga, ta gədaŋ ma ma mbəlawa ŋga, ta me dzəmey a tsetseh aŋga, me tərey andza ŋga, da memətsey ŋga.

¹¹ Kendzey a key vaw na, ma da husey a ma mbəlawa da walaŋ ma ndaw ma mətsa na hay.

¹² Ka ləva na, tek a neney hay tabiyaha na, i ka ndzafata ba kakay, dakay na, i ka tərey tsoy kərem ndaw haya ha me təke kakay; ama i kəɗey vaw na, i ka husafa, i ka zəga masa ma ma hway ana, ka vəday ma mey na, yah ana ta 'ar a ɗaw ana na, Yezu Kriste ka zəgiyawa ba.

¹³ Malam a ɗaw hay, i slafa me ləvey i ka zəga tsoy kakay, me dzeley 'ar a ɗaw asləta na, ma mətada 'ar ba ta tsəveɗ i ma kawa da dəba na, i dzeley ’ar na ka tek ka mey ana

¹⁴ I hway 'ar ka mey ka tek ana, ma vəday ma masa na ma dzəmaya ka vaw ta me zəley ana, na Bay ma Bəla ma zəladandakwar da 'ərlam, da Yezu Kriste ana.

¹⁵ Lakwa neney tabiya ha me dzeley ’ar a lakwa haya hiya na hay na, tek a lakwa ma wuɗey ana na ŋga asləta. Haɗaw sa ma ndaw hay a dzalam gəle na, Bay ma Bəla ana aza a da ɓakwar vaw kava.

¹⁶ Ekəɗey kasl ka slam a neney, lakwa ma husakwama kasl kava ta fəɗa ha na na, nakwa na, 'ar a slam ana asləta.

¹⁷ Tobiya kwar aha na, tsam dey ka yah malam a ɗaw hay, pam dey na ka ndaw andza ma kam tek, andza na kuray ma ndzafəmaɓa ka la na hay.

¹⁸ Akwa na, ndaw hay haɗadzidzay ɓa i ka tsakwar ba zarra, i madakwar sa, ekəɗey na, ta ma tuway aha, da mendzey ta na, dugwan ahiya ta tuwaw ma gazləla na ma Kriste.

¹⁹ Ma da ndəvey ta na na, mezəɗey, 'ərlam ata na na, hwaɗ ata na, me wezley dey ta na ma pa ha na, da hwaray ta na, taya ma ta da mevel ata na, tek ma dala ɗey hay.

²⁰ Hərway lakwa na, wurow a lakwa na, ŋga da 'ərlam, da huɗa na, i hutakwama andza me buwey aha na, Bay’ərlam Yezu Kriste.

²¹ a da təradandakwar vaw lakwa neney bəle ha na, ka da tərey andza vaw ŋga me wezley dey ana, ta gədaŋ aŋga ma slafa ma təradata tek hay tabiyaha, ka da tsənamar sləmay tabiya ha a bay ŋga na.