Filipieŋ 1 - MEY HAYNA WAYNA MA YEZU KRISTE MA MEVEY

Me tsey guma a vaw

¹ La, Pol ta Timotey, gawla ma Yezu Kriste hay, la windəmatar a ndaw kokwaɗ ana hay tabiyaha da Yezu Kriste, a bay ’ar ata na ma kəlatar ke mey ana ta diyakre ta hay, na taya tabiyaha da Filipi ana.

² Hayna hahaya ta zozoy ma Bay ma Bəla Baba lakwa, ta Bay’ərlam Yezu Kriste ka ndzey ta kuray.

Me mey sise ta me ɗuley mey

³ Ka pas a ɗaw andza i dzeley aha 'ar ka kuray na, i madara sise a Bay ma Bəla ɗaw.

⁴ Ka pas ka pas da ma ɗuley mey ka kuray tabiyaha na, i ɗuley mey na ta wuiya ha.

⁵ Hərway ma lakwa ma dzəmakwa dzaya ka Mey Wayna, zla ta pas tsəfəmey aha na, kasl ekəɗey.

⁶ Me dzeley 'ar a ɗaw na, andza neney: Ndaw ana ma zələrawa me key mber mambay mambay aha da vaw kwar ana na, a da husada, a da ndaslada ba kasl ka pas ma Yezu Kriste.

⁷ Təɗe kassla i ma ndzaha andza neney hərway kwar tabiyaha na na, hayaha, hərway i wuɗakwar aha da mevel a ɗaw, kuray a neney andza da daŋgay ɗaw, andza da me dzəŋgərey ta ma ɓadama ta Mey Wayna ta gədaŋ, ndzam tobiya kwar ahiya da hahaya ma kəmiyawa na.

⁸ Ayaw, Bay ma Bəla a key seydewe ɗaw ana, i wuɗakwar tabiyaha da kokwoɗ ma Yezu Kriste.

⁹ Arka me ɗuley mey ɗaw na ŋga kəɗey: hayna ma wuɗa vaw kwar ka səkey a fənada adiya sa, ma ka vəlakwar tsəveɗ ma nəkada tek hay haya haya ha ta ma sərada tek.

¹⁰ Ma kuray ka səradama ma sesəkey tek na ŋgama na hay, kəɗey na, kuray ka da kam tsəzlak ahiya, mandzara me ŋgəley bəzay ta pas ma da sawa ma Kriste.

¹¹ Ka da kam na ma rəhaya ta tek ma dzerey na ma sandukurawa da Yezu Kriste ana, ma da hasəkadara bəzay ta ma da sambəra Bay ma Bəla.

Daŋgay ma Pol, ta me gəley ma Mey Wayna

¹² Malam aɗaw hay, a saya na kuray ka səradama, tek ana ma safiyawa na na, dzadzak a da dzəney na ma gəlada Mey Wayna.

¹³ Tobiyaha da 'ay bay, akwa na, kwa ka waray ka waray na, a səradama i da daŋgay na mavəday i kar mber a Kriste.

¹⁴ Arka har a var a sa malam a hay, ma pa ’ar ahiya ka Bay’ərlam ta me zəgey ɗaw a neney a daŋgay ana na na, ma ndzafam gədaŋ adiya, ma tələkey mey ta Guma ma Bay ma Bəla mandzara me wesey.

¹⁵ Dərka na, sa na hay a kama na da səleŋ, kəla andza waway aha, ama sa na hay a tələkadama mey ta Kriste na, ta mevel hayna.

¹⁶ Taya na, a kama da ma wuɗa vaw, a səradama i ka sləna na, hərway ma me dzəŋgərey ka Mey Wayna.

¹⁷ Taya na hana na hay na, a tələkadama mey ta Kriste na, ta səleŋ aha da mevel, tek ata na me key na, ma zləɓa hiya, a dzalam na, ma aza banay ɗaw da daŋgay ka səkey adiya.

¹⁸ Amana, mey ma ndaw mey! Ka key teŋgey teŋgey na, kwa a dzalama da hayna dakay da na haya kakay ana na, Kriste na ma tələka mey aha ba, arka na, a daya 'ar bəza kakay, a fəna na tok na, a da daya 'ar a fəna sa.

¹⁹ Hərway i sərada ha tek a neney a da ndekey na, me buwey yah, kuse ma ma ɗula mey kwar ta Mesəfrey ma Yezu Kriste ma hutafaya na.

²⁰ Da me hutey ɗaw ana hatsatsa ta me pey dey ɗaw ana na, hwaray a dakaya ha dakay, ama mevel a ɗaw ma ndza ha na, ndar ndar. Ekəɗey ana, kwa ma ka pas ka pas aha na, Kriste a da ɓey vaw da vaw ɗaw, ka key na, da mendzey ɗaw, dakay da memətsey ɗaw na.

²¹ Hərway yah na, mendzey ta dey na, Kriste, me mətsey na, a kafaya andza riba.

²² Ama haɗaw mendzey ka dala neney a da sadərawa mber, ma da yawa kava adiya na, na ŋga na i sərada i ka zəgey na, na waray sakay.

²³ I ma ndza ha na, gaŋga ka-a: a saya akwa na, ma daway tek aɗaw, ma da ndzey ta Kriste, ma saya ɗoh na ŋga.

²⁴ Ama me ndzey ka sləna ka dala na, a nefey a fəna na, hərway kwar.

²⁵ Arka satsa na i sərada ha, i da ndzey andza kuray tabiyaha, ma kuray ka gəlam adiya da wuiya ma me pey 'ar a kwar,

²⁶ ma aza kuse ma ma da maɓa ɗaw ka tsakay kwar na, maram a kwar ma ndzafam da Kriste na, ka gəley adiya.

Mendzey ma dam ka vaw ta Mey Wayna

²⁷ Haya dzadzak na, ndzam andza na ma Mey Wayna ma Kriste, haɗaw i da daɓa ma da nəkurawa na, kwa kendzey i dakay na, i tsənada a tsam aha ka kuray, ma ɓadəmaya kuray mandzaya mambay aha da mesəfrey ana asləta, ka kəɗam aha vaw ka masləta ha, ta mevel asləta, andza ma me pey 'ar ma Mey Wayna.

²⁸ Mandzara kuray ka mbəkadəmatara vaw a ndaw dugwan hay, ka wuɗadəmakwar mey zlay, a da tərey ka taya na, zeheɗ ma ma zəɗey ta, ta me buwey kwar, arka tek aŋga na a da sawa na da Bay ma Bəla.

²⁹ Hərway ka kakwar hahaya ba kavəday ma Kriste, ama da me pey'ar ka ŋga dada tsa kakay, ama satsa na, da me key tsetseh hərway ŋga,

³⁰ ta me kəɗey vaw andza na ŋga ɗaw, kuray ma nəkadəmaya i me key andza ha na na, kuray ana ka səradama ha, re i kəɗey aha vaw sa təŋga.