Efeziyeŋ 3 - MEY HAYNA WAYNA MA YEZU KRISTE MA MEVEY

Tek ma kəzla na ma Kriste

¹ Hərway ma mey na, yah Pol, beke ma Yezu Kriste, ma vəday kwar ndaw Zuif ahiya kakay ana hay…

² Hana akwa dakay dakay na, kuray ka səradama hahaya ma Bay ma Bəla, ma vəladiyawa ma da kada tek, andza ma ŋga ma dzeley hərway kwar ana.

³ Ma wuradaya dey ma da ɓadaya tek aŋga ma kəzla na, i ka tsakwar ba kava ketewɗey.

⁴ Da ma dzaŋgəmaya kwar na, ka da tsənadama ka səradəmaya na kasl ka waray da tek ma kəzla na ka Kriste.

⁵ Tek ana hana ma kəzla na na, Bay ma Bəla ka ɓadatərawa a ndaw zlezle na hay, andza neney ma ɓadatara ekəɗey ana ta Mesəfrey a maslaŋ aŋga kokwoɗ ana hay, ta ndaw sek hay ana kakay.

⁶ Ndaw Zuif ahiya kakay ana hay ma dzəmaya ma da zəmey zleley ana asləta, mezəvey ma vaw ana asləta, ma dzəmaya ka guma na ma tsəmawa na atsa, da Yezu Kriste, ta gwedey ma Mey Wayna.

⁷ A da təradəmaya bəzey me slərey ma Mey Wayna, ta tek ma hayaha ma hahaya ma Bay ma Bəla ma vəladiyawa ta ma kwasləɗa ma slafa aŋga na.

⁸ Yah a neney gudar, madakwaydok ana ma ndaw kokwaɗ ana tabiyaha na, i ma ndzefey hahaya ma tələkadatara mey a ndaw Zuif ahiya kakay ana hay, zleley ma guma ma Kriste me nəkey kakay ana,

⁹ arka ma da ɓada ka dey waw, Bay ma Bəla a ka tek aŋga na ma kəzla ha na na teŋgey? Ma wa vaw aha, ma kəzlaha zla ekəɗey kakay da ŋga na, ŋga ndaw ma kərawa bəla zla ekəɗey kakay ana ma wa vaw aha da ŋga na.

¹⁰ Zla ekəɗey na, ndaw me wey ndaw hay ta bay hay, da 'ərlam, a səradama ma səra ’ar ma Bay ma Bəla haɗadzidzay ana na, kuse ma Egliz.

¹¹ Andza ma tek aŋga me dzeley, ma da key a ndəvey kakay ana na, ma ka da Yezu Kriste Bay’ərlam lakwa.

¹² Ta Kriste tok na, da me pey 'ar a lakwa ka ŋga na, lakwa ma ndzafakwa ’ar a lakwa ma gurey ka tsakay ŋga ta mevel asləta.

¹³ satsa na, i tsəhafakwar: har ka da mətsakwar da viya neney i me sey hərway kwar ana zlay, na ŋga na na, maram kwar.

Ma sərada ma wuɗa vaw ma Kriste

¹⁴ Ekəɗey i gərdey ka mey 'ərdey ma Baba na hərwuiya.

¹⁵ Baba na veɗ 'ay hay tabiyaha a ndzafam mezəley na da ŋga, da 'ərlam ta ka dala.

¹⁶ Hayna ka wuɗey andza zleley ma maram aŋga, ka vəlatar tek ma har ma ma slafa ŋga, ta Mesəfrey ŋga, ka vəlar gədaŋ a ndaw ana da vaw kwar ana.

¹⁷ Hayna ka ndzada Kriste da mevel a kwar ta me pey 'ar, ma pa slasləlay aha, ma kar ha ha da ma wuɗa vaw,

¹⁸ kəɗey tok na, ka da ndzafam gədaŋ ma tsənada, andza ndaw Kokwaɗ ana hay tabiyaha, andza ma zlepetem, ma zozom, a 'ərlam, ma siom a tsəvay…

¹⁹ Arka ma sərada ma wuɗa vaw ma Kriste na, a fənata tek me sərey hay tabiyaha, ma ka rəham, ma kuray ka ndzafama ɗuhwa ma Bay ma Bəla tabiyaha.

²⁰ A Ndaw ma slafa ta gədaŋ aŋga me key mber da vaw lakwa, me key a fəna, a fəna haya haya dzay sa ka na lakwa ma slafakwa ma tsəhakwa na ta na lakwa ma dzalakwa na,

²¹ maram da Egliz hay tabiyaha, ma vəlaya ma ŋga da Yezu Kriste, ka bəzey ma hwaɗ ka bəzey ma hwaɗ, da mevey temere da mevey temere. Amen!