Efeziyeŋ 1 - MEY HAYNA WAYNA MA YEZU KRISTE MA MEVEY

Me tsey guma a vaw

¹ Yah Pol, maslaŋ ma Yezu Kriste da me wuɗey ma Bay ma Bəla ana, i windatar a ndaw Kokwaɗ ana hay ta ndaw ma tsənam sləmay ana hay ma Yezu Kriste:

² Hayna hahaya ta zozoy ma Bay ma Bəla Baba lakwa, ta Bay’ərlam Yezu Kriste ka ndzey ta kuray.

Hahaya mandzara kokway ana

³ Hayna ma səmbəra Bay ma Bəla Baba ma Bay’ərlam a lakwa Yezu Kriste, ka pəsafandakwar mey ba da ma pəsa mey hay tabiyaha ta Mesəfrey na Kriste ma sadərawa da ’ərlam ana.

⁴ Ŋga ka gaɗəmandakwar ba a ŋga, amba ka zlərawa bəla, ma lakwa ka tərakwama kokwoɗ ahiya, mandzara me ŋgəley bəzay ka slam dey ŋga, da ma wuɗa vaw.

⁵ Ŋga ka dzala ba zla ka vaw ma i ka tərakwama bəzey ŋga ahiya zla amba ka kərawa bəla kavəday ma Yezu Kriste, hərway ma ma wuɗa vaw ŋga.

⁶ Ŋga ma rəhadandakwar ta hahaya ŋga haɗadzidzay ana, ŋga ma vəlandukurawa da Bəzey ŋga, ma wuɗa haɗa na.

⁷ Da me dzəmey vaw lakwa ta ŋga na, lakwa ma buwaya ba, ta har aŋga na, malay lakwa hay ma sa yam ahiya ba, hərway me zleley ma hahaya ŋga.

⁸ Bay ma Bəla ka vəladandakwar zleley a neney hay, ma wuradandakwar a me sərey 'ar ta me sərey tek hay tabiyaha.

⁹ Ŋga ka ɓadandakwar tek aŋga ma kəzla ha, me wuɗey ana ba, tek aŋga me dzeley ma da key hayna, zla da bəziya ka 'ar vaw ŋga na,

¹⁰ ma dada har ana hay a me ndesley ta na, ma da tsəhadara 'ar ta bəla tabiyaha, a bəzay ma Bay ana asləta: Kriste. Tek na da 'ərlam ana hay ta na ka dala na hay.

¹¹ Ta ŋga tiyatsa na, la ka ndzafakwa na ŋgalakwa ba; andza ma me dzeley ma ndaw, me key tek andza ma ŋga me wuɗey ana: lakwa ma kaya ba zla ka vaw,

¹² ma da səmbəra da maram aŋga, ndaw ma pamar dey a Kriste zla ka vaw ana hay.

¹³ Da ŋga satsa na, kuray ka tsənadama mey ma dərka ba, Mey Wayna na ma buwakwar ana. Da ŋga satsa na, kuray ka pam 'ar ba, ma kafakwar zeheɗ ma Mesəfrey na ma tsəmawa kava na: Mesəfrey Kokwoɗ ana,

¹⁴ ma rada sek ma tek a lakwa ma da zəmey ana, kasl ka ma da buwəmandukwar madakwaydok ana, na i da dzafakwa, ma səmbərada maram aŋga na.

Ma ɗula mey ma Pol

¹⁵ Nəkafama hərway ma mey na, yah ana tiyatsa na, zla i ka tsənada me pey 'ar a kwar da mezəley ma Bay’ərlam Yezu, ta kuray ma wuɗəmata ndaw Kokwaɗ ana hay tabiya ha na ba.

¹⁶ Kwa i ka mbəkada ma madara sise a Bay'ərlam hərway kwar kakay, da har andza i sləfakwar aha da me ɗuley mey ɗaw hay na.

¹⁷ Hayna Bay ma Bəla ma Bay’ərlam a lakwa Yezu Kriste, Baba na maram ma vəla ha ma ŋga na, ka vəlakwar mesəfrey ma ma səra 'ar, ka ɓadakwar kuray ka səradama dərka na.

¹⁸ Ka wuradakwar mevel a kwar ka dey waw aŋga, ma kuray ka səradama, ma zəlakwar aŋga na a vəlakwar na me pey dey waray, zleley ma maram aŋga na na, na waray? Tek a kwar, ma da zəmam, ma da wanəkadama andza ndaw Kokwaɗ ana hay na, na waray?

¹⁹ gədaŋ aŋga ɗuhwa ha na ta ma slafa ŋga ma kwasləɗa hərway lakwa ndaw me pey 'ar ana hay na hadzəgay; ta gədaŋ aŋga ma slafa tabiyaha na,

²⁰ ŋga ka padata ba ka kam mber da Kriste, da har andza ma ŋga ma mbəladərawa da walaŋ ma ndaw ma mətsa na hay, arka mandzada ta har zəmay ŋga da 'ərlam.

²¹ Ma pa ha tsaŋ ka 'ar ma maram hay, ka 'ar ma bay hay ta ma slafa, Ŋgalaka ta mezəley a sa na hay, akwa ka zələmata na, ka bəla ɗey dada tsa kakay, ama satsa na, ta bəla ma da sawa ka mey ana dzay.

²² Ayaw, ŋga ka padatara tek hay tsoy tabiyaha ka slam sek aŋga, ŋga ka vəladara ba ka ndzey lets ma tek hay tabiyaha, ka tərey bay 'ar ma Egliz,

²³ na vaw ŋga hana, me rəhey ma ndaw ana Bay ma Bəla ma rəhada, ta 'ar aŋga na kərem ana.