Ebrew 5 - MEY HAYNA WAYNA MA YEZU KRISTE MA MEVEY

Kriste na baba ɗuhwa na me key kuley

¹ Akwa mendzey ma baba me key kuley ana waray waray na, ma zəgam da walaŋ ma ndaw hay, ma padama, ma da dzəmadata ndaw hay ka vaw ta Bay ma Bəla. Mber aŋga na, me vəley tek ma haya ha, ta tek me key kuley hərway ma meŋgəsey hay.

² A slafa ma dzənata ndaw ma səradama kakay ana arka ma zləgam ana hay, hərway ŋga na tiyatsa na, bəle a ləmar ta sləna ta sləna.

³ Arka hərwuiya tok na, a slafa me key kuley hərway ma bay 'ar ma vaw ŋga na, arka satsa na, a slafa me key kuley hərway ma meŋgəsey ma səkway.

⁴ Ndaw a slafa ma hasəkadara bəzay a vaw ŋga na andza ha kakay, ma ndzefey ŋga na na, da Bay ma Bəla me zəley ndaw andza na ma Aaroŋ.

⁵ Kəɗey andza ha sa tey na, Kriste ka hasəkadara bəzay a bay ’ar ma vaw ŋgana kakay, ma da tərey baba ɗuhwa na me key kuley ana kakay. A da ndzafa na da har ma ndaw ana ma ləvar: «Kah na Bəzey ɗaw, teseɗey na i ka yadəkawa ba na»

⁶ Andza ta bəzay ma guma neney mekelehe na: kah na baba me key kuley aha ma kwaza ha, andza na ma Melkisedek.

⁷ Ŋga na, da har ma mendzey ŋga ka dala na, me ɗuley mey, me key amboh ta ma wudey aha, ta yam dey aha, a ndaw ma slafa ma buwa ba da memətsey ana, arka na Bay'ərlam ka təɓa me ɗula mey ŋga na ba, hərway me matsəney sləmay ŋga.

⁸ Kwa andza ŋga Bəzey ŋga tekeɗe na, a tatəka me tsəney sləmay na, ta tsetseh aŋga me key,

⁹ arka andza me husey ba kasl ka ma da ndaslada ŋga na, a da tərey ka ndaw ma tsənamar sləmay ana hay na, ndaw me buwey ta ma kwaza ha na,

¹⁰ hərway Bay ma Bəla ka tələkada mey ba, ŋga na baba ɗuhwa na me key kuley ana, andza na ma Melkisedek.

Me tərey Kretieŋ na ɗa ka vaw ta na hay

¹¹ Ka bəzay ma guma neney na, tek ala me tsey kava haɗadzidzay daha, ama me wendzeley ŋga na na, ka tərey ba ta ger aha, hərway kuray ka kam mazazaŋ la ma tsənadata tek hay.

¹² Akwatay na kuray ka təram ba miter ahiya zla ekəɗey kakay, ama ekəɗey satsa na, ka wuɗam ka tatəkadəmakwar mey ma Bay ma Bəla na tsəfəmey ana hay mba. Kuray ma madama vaw kwar hənek, ma a sakwar na, ka vələmakwar na 'uwa mba, zləna tek me zəmey tsaray kakay.

¹³ Kwa way way haɗaw a sey aha 'uwa mba na, a slafa ma waladata tek na ɗerre na kakay, hərway ŋga gwendez aha mba.

¹⁴ Ama ndaw ɗuhwa na hay na, a zəmam na tek na me ndzey ka may ana hay, taya na ma saɗəkaya tsoy ma waladata tek hayna hay ba ka vaw, ta na hayakakay ana hay.