Ebrew 2 - MEY HAYNA WAYNA MA YEZU KRISTE MA MEVEY

Ma wafa vaw ka guma na ma tsəna ha ba na

¹ Kavəday ma mey na, hayna lakwa ka wafakwa vaw ka guma neney, lakwa ma tsənadakwa na haya hayaha, haɗaw a sandakwar i ka zləgakwama zlay na.

² Haɗaw azlakwa guma ma madurlam hay ma tələkadəmarawa mey ana, ma zlar me key meslərey, arka seweɗ ma ndaw hay tabiyaha, ta me tsəney sləmay kakay ana tabiya ha, ka ndzafama masa ta ba kassla tok na,

³ lakwa na tok na, i da ləhakwa na teŋgey? Haɗaw i kakwar aha masəfaya a me buwey andza na ma Bay’ərlam ma zlərawa ma tatəkadandukurawa na, ndaw ana ma tsənadəmərawa da huɗa mey ŋga na hay, ma ɓadəmandərawa a la, andza neney.

⁴ Arka Bay ma Bəla satsa na ma hərafa waw ta seydewe ŋga, ta zeheɗ hay, da tek me gegətsey ndaw ana hay, ta ɗeɗew hay sapa gəle gəle, arka ta tek ma hayaha ma mesəfrey kokwoɗ ana, ma wanəkaya, andza ma ŋga ma wuɗey ana.

Bay Yezu malam ma ndaw hay

⁵ Hərway Bay'ərlam a vəladara bəla ma da sawa ka mey ana, na lakwa ma tsakwa kava na na, a har ma madurlam hay kakay. A ləvəmawa da guma na ma winda ha daha andza neney:

⁶ Ɗagay ndaw ana na mey, ma kah ka da dzalafa 'ar ana na? Ɗagay ndaw zezeŋ ana na way, ma kah ka da nəkafa dey ana na?

⁷ Kah ka mada ba ta dəba nekəɗey ka madurlam hay tey; ta me wezley dey, ta hesəkey bəzay na kah ma vahara 'ar;

⁸ kah ka padata tek hay ba tabiyaha a huɗa sek aŋga, andza ma vəladatara tek hay ba tabiyaha na, ŋga ka mbəkey tek mandzara ŋga ka wa kakay na dakay. Arka azlakwa tok na, ka nəkadakwa ha andza ma wata tek hay na ŋga sakay sa.

⁹ Ama lakwa ma səradakwa na neney: ndaw ana ŋga na ma madama ta dəba nekəɗey ka madurlam hay ana na, Yezu. A da tərey hərway ma memətsey na, ŋga ma sa banay ana na, ma vaha 'ar aha ta maram, ma hasəka bəzay aha, kəɗey tok na, ta hahaya ma Bay ma Bəla na, hərway ma ndaw waray waray na, ŋga ma ndzəka memətsey.

¹⁰ Akwa a dam ka vaw na, ma ndaw ana tek hay tabiyaha ma kaya ta har aŋga na, a wuɗey na ma kəsadata wawa ŋga hay haɗadzidzay, a mewezley dey, a da ndaslada na ta tsetseh, ndaw ma zlərawa me buwey ta na.

¹¹ Hərway ndaw ma təradata ndaw hay kokwoɗ ahiya, ta ndaw ana hay ma təraya kokwoɗ ahiya na na, bəzay ta na asləta, kəɗey na hwaray a kar ma zəlata malam ahiya kakay.

¹² Arka a da ləvey: i da tələkadatara mey ta mezəley ɗek a malam a ɗaw hay. Da walaŋ ma ndaw hay ma kusaya na, i da səmbəraka.

¹³ Arka satsa na: yah na i da pey 'ar a ɗaw tabiyaha na ka ŋga. Arka satsa na: yah ekəɗey na, yah andza bəzey ana hay Bay ma Bəla ma vəladatiyawa na hay.

¹⁴ Kəɗey tok na, azlakwa bəzey ana hay mambaz a ta asləta, slaw vaw a ta asləta sana, ŋga na satsa na, kalkal andza ma ta na, ma wanəkadama mendzey ta asləta, ta memətsey ŋga na, ka mada gədaŋ ma ndaw ma zəgada gədaŋ ma memətsey ana ba ta dəba, ka ləva na Setene.

¹⁵ Arka ma da ləhadatərawa ndaw na, ma zluram ta memətsey ana hay, ma ndzama mendzey ta tabiyaha da mendzey ma beke na.

¹⁶ Hərway a sawa a da dzəney na madurlam hay kakay, amana bəzey ma hwaɗ ma Abraham hay.

¹⁷ Satsa, da tek hay tabiyaha na, ŋga ma tərada vaw ka nəkey na kalkal andza malam aŋga hay. Ma aza ka da tərey baba ɗuhwa na me key kuley ana, na ndaw ma kar da vaw ana, arka satsa na, ndaw na Bay ma Bəla ma vələrawa slam har, ma da davasada meŋgəsey ma səkway hay ba na.

¹⁸ Hərway ŋga na ta 'ar aŋga ka sey banay ma suwet ana, ma həlafama na ba na, a slafa madzənata ndaw na, ma həlafəmata suwet ana hay.