Ebrew 13 - MEY HAYNA WAYNA MA YEZU KRISTE MA MEVEY

Kominite hayna

¹ Hayna me wuɗey vaw andza malam hay na ka key daha!

² Ka da mətadama 'ar me ŋgəley mbəlak hay zlay, hərway ma mey na, ndaw hay daha mandzara ka sərafama na, kuse ma me ŋgəley mbəlak hay na, ka ŋgəlam madurlam hay ba a 'ay ta.

³ Sərafəmata ka ndaw taya da daŋgay ana hay, kalkal andza kuray da daŋgay ana dzaya, ka ndaw ma kadəmata tatakway ana hay, hərway kuray ana hay na, vaw kwar hay daha tiyatsa.

⁴ Ndaw hay tabiyaha ka hasəkadəmara bəzay a ma zəgey vaw ma ndza ŋgwas ta zel, ka da zləɓam zlay, hərway ndaw ma tsəlam so na hay ta ndaw ma kam madama na hay na, ma da kadatara sariya ta na na Bay ma Bəla na.

⁵ Hayna me səpey sumkwo ka da wakwar mendzey kwar zlay; sadama 'ar ta na kuray ma ndzafam ana, hərway Bay’ərlam ana ta 'ar aŋga a ləvawa na: A'ay! I da mbəkafaka ha har kakay, i da mbəkadaka ha kakay!

⁶ Arka da ma sərada lakwa tabiyaha, i slafakwa me ləvey: Bay’ərlam na a da dzənaya ha ba, i wesey na ta mey sa mey? Ndaw a da kadaya teŋgey?

⁷ Sərafəmata ka ndaw ma kələməkurawa ka mey ana hay, ma tələkadəmərawa mey ta Guma ma Bay ma Bəla na; nəkadama mendzey ta na hay a da ndəvam na teŋgey? Tsam dey na ka ma pey 'ar ata na.

⁸ Yezu Kriste na, na teleɓey, na teseɗey ana na, re ŋga asləta, ŋga na a da mbəɗey aha tikay ha ma kozaha.

⁹ Ka da mbəkadama vaw ka da zləgaɗəmakwar ta metetəkey a sa na hay gəle gəle, ma səmawa da 'ar bəla na hay zlay. Hərway hayna mevel ka ndzefey gədaŋ na ta hahaya zləna, ta tek mezəmey kakay, na ndaw hay ma waladəmata ba ka vaw ana hay, ka nafatar a taya na ma taya ka yəmam da bəziya kakay.

¹⁰ Ka ŋgwa ma kuley lakwa na, ndaw ana hay ma kam kuley da gwadzavok ana hay na, a slafama ma ndzafəmawa tek mezəmey ta da huɗa tikay.

¹¹ Hərway ma mey na, slaw ma gənaw ana baba ɗuhwa na me key kuley ana, ma dada mambaz ana a 'Ay me key Kuley ana, ma bazləmada meŋgəsey ana hay na, a da kakərəmata na pərazl ta wuraw.

¹² Kalkal andza ha satsa na, Yezu ma da bazləmadatara meŋgəsey ma səkway ba ta mambaz ma bay 'ar ma vaw ŋga na na, a da key banay na pərazl mambaw ma wuraw.

¹³ Bukwawa, da zlakwama 'ar da dəba ma zleɗ ma wuraw, zəgakwa hwaray ŋga na ka 'ar a lakwa.

¹⁴ Hərway ka dala neney na, wuraw a lakwa ma ndzey da huɗa ma tsoy aha na kakay, ama lakwa ekəɗey kava, ka səpakwama ha wuraw a lakwa, ma da ndzakwama da huɗa ka mey ana.

¹⁵ Ta har aŋga na, kakwar kuley a Bay ma Bəla zarra, kuley ma səmbərada, ka ləva na, guma ma bawa da huɗa mey a lakwa na hay, ma ɓada mezəley ŋga.

¹⁶ Ka da mətadakwa 'ar ta me key hahaya ta ma dzəney vaw da kominite zlay, hərway kuley andza na ŋga na na hay na, na ma dar 'ar a Bay ma Bəla ana.

¹⁷ Tsənəmatar sləmay a ndaw ma kələmakwar ka mey ana hay, ɗəmatar ndaw; hərway a nəkafəmakwar aha dey, ka ndaw ka ndaw ka mezek a kwar hay, hərway a da tsəhafəmata. Kəɗey tok na, a da kama meslərey ta na ta wuiya zləna, ta ma guŋguɗey mey aha kakay, zləna a da nafakwar aha sakay.

¹⁸ Ɗulam mey hərway la, ma vəday la səradama ha dey ta kava la ma ndzahiya mezek ala ’ar piokw, ta me wuɗey la me key tek ta tsəveɗ da mey da mey ana.

¹⁹ I tsəhafakwar, kama andza ha bəse na, aza i ka maɓa ka tsakay kwar da bəse.

Me pəsey mey ta me tsey guma

²⁰ Hayna Bay ma Bəla ma zozoy ma tsəladərawa Bay’ərlam a lakwa Yezu Kriste da walaŋ ma ndaw ma mətsa na hay, ta mambaz ma me dzəmey vaw ma kozaha na, ndaw me tsukurey hayna ma təɓaŋ hay,

²¹ ka təradakwar, ma ha slafama me key tek hayna, andza ma ŋga me wuɗey ana; ka ndaslada tek ana ma dar 'ar da lakwa na, ta har ma Bay Yezu Kriste, na maram ma vəla ha ma ŋga da mevey temere da mevey temere Amen!

²² Malam a ɗaw hay, i tsəhafakwar na, hayna ɓəsama guma ma me tetəkey a neney! Akwa i sləraɓa na guma hay nekəɗey dada.

²³ Hayna səradama, ka kəladəmərawa malam a lakwa Timotey ba da daŋgay. Kendzey ka husawa ba bəse na, i da dəmaɓa ma da nəkəməkurawa na tsetsuwe.

²⁴ Tsadəmatara guma a ndaw ma kələmakwar ka mey ana hay tabiyaha, ta ndaw Kokwaɗ ana hay tabiyaha. Ndaw ma Itali hay ka tsadəməkuraɓa guma aha.

²⁵ Hayna hahaya ka ndzey ta kuray tabiyaha!