Ebrew 12 - MEY HAYNA WAYNA MA YEZU KRISTE MA MEVEY

Matanduroŋ da me həley suwet

¹ Kəɗey tiyatsa na, lakwa neney ndaw seydewe lakwa hay kambəlaɓa ka tsakay ana hay na, kəladakwa tek a neney ma ləhandakwar ana, ta meŋgəsey a neney ma sərada ma ɗawalandakwar bəzakay ana ba, arka na hwakwama ta matanduroŋ aha, ma təɓa suwet ana ma həlafəmandakwar ana.

² Dey ma zazura ha zurra ka bay 'ar ma me pey 'ar, ma da husada a me ndesley ŋga na, Yezu ana, ma mbəɗar mey ba a wuiya na akwa ma vəla ha ma ŋga na, ma ɓəsa me derey ka 'ar ma tuwaw, ma rəsa hwaray, arka na me ndzey ta har zəmay ma koriwal ma bay ma Bay ma Bəla.

³ Ayaw, dzalam 'ar ka ndaw ma sərawa banay a veɗ ma ndaw ma ŋgəsa na hay na, ma aza ka da mətsakwar har zlay.

⁴ Ta me kəɗey vaw kwar ana ta meŋgəsey na, kuray ka dzaŋgəram ka vaw kwar kasl ka mambaz kakay.

⁵ Kuray ka mətadama 'ar ba ta guma ŋga ma səmadakwar andza bəzey ŋga hay ana: Dem a ɗaw, ka da rəsa me hətey ma Bay’ərlam zlay, kandze andza a ka ka ha say na, ka da mətsaka har zlay.

⁶ Hərway Bay’ərlam a hətey na ndaw aŋga ma wuɗey ana. A hətey na mendzey ma bəzey tabiyaha na ŋga ma ŋgəlata na.

⁷ Ka kam tsetseh a neney na hərway ma ma tsəmakwar guma a 'ar ana. Bay ma Bəla a kadakwar na andza bəzey ŋga hay. Akwa ɗagay na bəzey waray, andza baba ŋga a həta tikay ana na?

⁸ Haɗaw azlakwa ndaw a hətakwar aha tikay, andza wawa sa na hay tikay na, na ŋga na na kuray na, madazlay ahiya zləna, kuray bəzey hayna hay kakay.

⁹ Baba lakwa hay ka dala ma tsəmandakwar guma a 'ar ana daha, arka i ka ndzadukurawa ba haya ha; sakwa dzadzak tok na, i da tsənakwar sləmay a Baba ma mesəfrey hay na lakwa ma ndzafukwawa sifa, da har aŋga na kakay tok ɗaw?

¹⁰ Akwa taya na andza na ma ta ma dzalam ana na, a hətəmandakwar na da mendzey nekəɗey; ama ŋga na, ma da saŋgərada na lakwa na, hərway aza ka da vəlandakwar kokwoɗ aŋga.

¹¹ Ka slam ana deŋe na, me hətey na a vəley wuiya kakay, amana magwam. Ama aza ka mey tok na, a da tərey ka ndaw ana hana na ma hətəmata na hay na, tek ma sadərawa zoyzoy ta dzerey.

¹² Marəɗadəmata har mayaɗ ana hay, ta gurəmets ma waləɓa na hay,

¹³ arka a sek a kwar hay na, ləməmatar tsəveɗ na dender dender ana hay, ma aza ndaw vədal ana ka da teley sek zlay, ama dzadzak na ka ndeley.

Bay'ərlam a lakwa na waw me təɓey ŋgatata na

¹⁴ Səpam zozoy ta ndaw hay tabiyaha, ta me tərey kokwoɗ aha, hərway mandzara kokwoɗ na, ndaw a da nəkada ha Bay’ərlam kakay.

¹⁵ Wam daw ka vaw ma kwa ndaw asləta ka da wurzley vaw ka hahaya ma Bay ma Bəla zlay; kwa slasləlay ma tek ɗuwekeke ha ka da pətsawa ma da sadərawa dzendze, arka aza ka da zəvar a kominite tabiyaha zlay.

¹⁶ Wam daw ka vaw ka ndaw ma tsəley so ha, dakay na ndaw ma zləɓa na hay ka da key daha zlay, andza ma Ezaw, hərway ma tek me zəmey vəley asləta na, ma haɗəkada slam har ma ɗuhwa ŋga ba.

¹⁷ Ka səradama ha seŋgey, andza a wuɗey ka da pəsafama mey na, ma wurzla ha tsoy, a da key ma ŋga na, slam har ma mbəɗada dasakay, kwa andza ta amboh aŋga, ta yam dey ŋga tekeɗe na, a key vaw sakay!

¹⁸ Kuray ka guram ka tsakay ma tek ana me nəkey ɓərlehhe na kakay, waw ma mətsa 'ar ana, ləvoŋ, dəvaɗ, vavəray,

¹⁹ me tsəney ma tolom ta veɗ ma ɗay ma tsənawa; ndaw ana hay ma tsənadama na na, a wuɗam ka dzəkam sləmay ka guma na adiya sakay.

²⁰ Hərway a slafama ma ɓəsama slam har a ŋga na kakay: Ma da ləmar a mamba na na way? - Kwa ka key na gənaw tekeɗe na-, a kwaytsama ta ŋgwa vagay aha!

²¹ Tek ana me key ana na, a key zluwer, ha Moyiz me ləvey: zluwer a kaya, i wesey ka vaw.

²² Ama kuray na kuray ka guram ba ka slam ma mamba ma Siyoŋ, wurow ma Bay ma Bəla ta dey ana, Zeruzalem na da 'ərlam ana, arka madurlam hay a key gabal haɗadzidzay a mbəsley vaw kakay, ma tsəha 'ar aya ma magurlam,

²³ arka ta ma tsəhey 'ar ma marakway hay, na mezəley ta ma winda hiya da 'ərlam ana, arka ta Bay ma Bəla, ndaw me key sariya ma ndaw hay tabiyaha na, arka ta mesəfrey ma ndaw dzerey ana hay ma husam ba ka ma ndesley ana,

²⁴ arka ta Yezu, adziya ma me dzəmey vaw wayna ta mambaz ana me wetsey, me weley mey a fəna ma Abel ana.

²⁵ Wam vaw ka ma ka tsənamar sləmay a ndaw ma tsakwar guma na! Hərway da har ana na, ka ləhəmawa da memətsey kakay, da varay ana ma wuɗam ma tsənamar sləmay a ndaw ana ma katərawa ka 'ar ɗaf ka dala na kakay tok na, sakwa lakwa tey dzadzak na, i da ləhəkwawa ha kakay, haɗaw andza ka mbəɗakwar dəba a ndaw ma tsadukurawa guma da 'ərlam ana na.

²⁶ Ŋga aŋga na vəɗe ma ɗay ŋga ma mbəzlada dala na na, ekəɗey ana na a tələkey aha mey andza neney: Dey asləta madakwadok ana na, i da ɓəlada dala, amana dala dada tsa kakay, amana ta 'ərlam adzay tiyatsa.

²⁷ Guma neney me ləvey dey madakwaydok ana asləta satsa na na, a ɓada ma da devesey ma tek ma ka hiya ka bəla neney bəle na, arka a dəba na tok na, tek na me ɓəley tikay ana na, a da key daha tok.

²⁸ Haɗaw azlakwa i ndzafakwa na Slala na ma mbəzley kakay ana na, zəgafakwa har haya hayaha ka hahaya neney tok na, kadukwara meslərey a Bay ma Bəla andza na ma mbafa na, da ma tsənar sləmay ta ma wesey aha.

²⁹ Hərway ma mey na, Bay ma Bəla a lakwa na waw me təɓey tek ana.