Ebrew 11 - MEY HAYNA WAYNA MA YEZU KRISTE MA MEVEY

Me pey 'ar ma Abel, Enok ta Noey

¹ Me pey 'ar na a vəley slam har, ma ndzafada tek na ma hutey ana, pandzay ma sərada tek na ma nəkam kakay ana hay.

² Me pey 'ar ka vəlatərawa seydewe hay ba, a ndaw zlezle na hay.

³ Ta me pey 'ar na ka tsənadakwa a ləmatərawa tek ma bəla hay na, ta guma ma Bay ma Bəla, bəla neney ma nəkey ana na, a zlərawa me key daha na, a tsawa dey ka bəla mekelehe me nəkey kakay aha kakay.

⁴ Ta me pey'ar na, Abel ma kar kuley haya ha a Bay ma Bəla, a fəna na ma Kayieŋ. Kuse ma me pey 'ar na, ma kama seydewe ŋga na na, ka kawa dzerey ba, arka Bay ma Bəla ma kadara seydewe ma tek ma kuley aŋga ma vəlar ana. Kuse ma me pey 'ar na, kwa andza ŋga ma mətsa ha ba tekeɗe na, re a tsey aha guma mba təŋga.

⁵ Ta me pey 'ar na, ma tsakafama Enok a 'ərlam, ma aza ka ləhey ba da har ma memətsey, arka na kwa ka ndzafama kakay, hərway ma mey na Bay ma Bəla ka tsakafa ba; akwa amba ka tsakafama na, ŋga ka ndzefey seydewe ba, ŋga na ka mbafa ba ka Bay ma Bəla.

⁶ Azlakwa tok na, ndaw a slafa ma mbafa ka Bay ma Bəla mandzara me pey 'ar kakay. Hərway ma mey ndaw ma gurey ka tsakay ma Bay ma Bəla na, a dafa na ka pey 'ar ŋga daha, arka na a vəlatar masa a ndaw ma səpama na hay.

⁷ Ta me pey 'ar na Noey ma tsənada guma ma Bay’ərlam ka tek ma da key na, ndaw a nəkada ha tsaray kakay ana. Ŋga na ma təɓa guma na ka mevel aŋga, arka me ləmey kwambiwal ma da ləhada veɗ 'ay ŋga. Kəɗey na ŋga ka dzuwa bəla ba, ma da zəmey dzerey ana me ndzefey vaw da 'ar me pey ana.

Me pey 'ar ma Abraham ta ndaw ma veɗ 'ay ŋga hay

⁸ Ta me pey 'ar na, Abraham ma ŋgəɓar a Bay'ərlam, ma tsənar sləmay na, ma daway 'ar a dala na ma da ndzafa me zəmey ana, arka ma daway mandzara ka sərada a daway a may kakay.

⁹ Ta me pey 'ar na ŋga ma daway me ndzey mbəzlew aha da dala na ma tsəmərawa a da vəladəmara na, ma ndzaya da gwadzavok andza Izak ta Zakob, ndaw ma da zəmam tek aŋga na, ŋga na ma tsəmərawa kava na.

¹⁰ Hərway a huta ha wuraw ana ma pa bəzay aha, ndaw ana ma dzalərawa na ta ndaw ma zla na na, Bay ma Bəla ana ta 'ar aŋga.

¹¹ Ta me pey 'ar na, Sara tiyatsa kwa ŋga maraw aha tekeɗe na, ka təradama ba ka ndzefey bəzey tey, ma vəday ŋga ka təɓa ba, ndaw ma tsərawa ka tek ana na, a mbəɗey sler a guma ŋga tikay.

¹² Arka na hərway ma mey satsa na, da ndaw asləta na, - ɓa memətsey ka kafa zeheɗ aŋga tsoy na - ma yəmawa ndaw hay a mbəsley kakay, andza wurzla ma 'ərlam hay, wurəmeɗ wurəmeɗ andza wuyeŋ ka mey ma bəlay.

¹³ Da me pey 'ar na ma mətsam tobiya ta ha, mandzara taya ka ndzafama tek ana ma tsəmawa kava na, ama andza taya ma nəkadəmərawa, ma tsəmərawa guma da dəreŋ na, a dəba ma ma səradama vaw ta ba mbəlak ahiya, ndaw me heley ahiya ka dala.

¹⁴ Hərway ndaw ma tsam guma soŋ soŋ andza neney ana hay na, a səpam aha dala ma da ndzey da huɗa.

¹⁵ Hana na akwa da 'ar a ta daha na, dala na taya ma bəmawa da huɗa na na, akwatay taya ka mam ba a huɗa;

¹⁶ akwa na, a səpam da 'ar a ta me dzeley na dala na haya ha a fəna na, dala na da 'ərlam ana. Hərway ma mey na, hwaray ka kar a Bay ma Bəla ka zəlama Bay ma Bəla ata kakay na kava; arka dərka na na, ŋga ka ləmatar wuraw ba.

¹⁷ Ta me pey 'ar na, ma həlafama suwet ka Abraham, ma ka kada kuley ta Izak; a key kuley ana na ta bəzey malay aha, azlakwa tok na, ɓa ka tsəmərawa ba kava,

¹⁸ a ləvəmərawa: Ka da ndzefey bəzey ma hwaɗ a ɗek dərka na hay na ta Izak.

¹⁹ Abraham me ləvey ka 'ar vaw ŋga na: kwa ndaw ma mətsa ha tekeɗe na Bay ma Bəla a slafa ma mbəladərawa; andza kəla ma zeheɗ ma tek aha na, ŋga ma ndzafa wawa ŋga təŋga.

²⁰ Ta me pey 'ar satsa na, Izak ma pəsafata mey ka ndza Zakob ta Ezaw, ka tek ma da key ka mey ana.

²¹ Ta me pey 'ar na, andza Zakob a da mətsey aha təŋga na, ma pəsafata mey ka bəzey ma Zozef hay ka ndaw ka ndaw, ŋga ma ney dəba ma ŋgurəma har aha ka mey ma duŋgwar aŋga.

²² Ta me pey 'ar na, Zozef tsoy mazlambar aha a da mətsey na, me tsey ka ma da gurey ma bəzey ma Israyel hay, ma vəley mewey ka ndasl ma vaw ŋga hay.

Me pey 'ar ma Moyiz ta na ma Israyel

²³ Ta me pey 'ar na, a dəba ma ma yəmərawa Moyiz na, baba ŋga ta may ŋga ma kəzladama kiya makar, hərway taya ka nəkadama mambay ma wawa ta na ba, arka na taya ka wasam ta mewey ma bay kakay.

²⁴ Ta me pey 'ar na, Moyiz andza ma gəley ba na, a wuɗey ka zəlama wawa ma dem ma Faraoŋ sazlay.

²⁵ Ŋga me hiyey na, ka kam tsetseh andza ndaw ma səkway ma Bay ma Bəla hay, zləna ka wuɗey me ndzey da wuiya da mendzey nekəɗey da meŋgəsey kakay.

²⁶ Ŋga ma nəka ma pamar hwaray a dey ma Kriste na na, zleley ɗuhwa ha ka fənatara 'ar ba a zleley ma Ezipte hay, hərway dey ŋga na ma pa ha na ka masa.

²⁷ Ta me pey 'ar na, ŋga ma gəradərawa Ezipte mandzara ka wesey ta me tsey mevel ma bay ɗuhwa na, ma vəday ŋga na, a nəkada ndaw ma nəkey kakay ana, arka na kwa ka teɓerey kakay.

²⁸ Ta me pey 'ar na ŋga ma ka magurlam ma Pak, arka ŋga me wetsey mambaz, ma aza ndaw me bezley ndaw ana ka da ləmatar a marakway ma bəzey ma Israyel hay zlay.

²⁹ Ta me pey 'ar na, taya ma tazlaradərawa Bəlay Gagaza na, andza kal kal ta dala ma ŋgwala ha, ama andza ndaw ma Ezipte hay ma dzadama tey na, yam ma həlata ba tabiyaha.

³⁰ Ta me pey 'ar na, zleɗ ma Zeriko hay ma mbəzlam, andza ma tawadama ba da meney tsəla na.

³¹ Ta me pey 'ar na, ka ləmamar a Rahab ŋgwas aŋga na me tsəley so na tikay, hərway ŋga ka ŋgəlata ndaw ana, ma da nəkawa dey ana hay ba da kokwoɗ.

Me pey 'ar ma ndaw me key matanduroŋ ana hay

³² Me ləvey na teŋgey seŋgey? Bəzay a da rafaya dakay, ma i ka waladata bəzay ma guma na hay ka ndza Zedeoŋ, Barak, Samsoŋ, Zeftey, David, Samuwel ta ndaw sek hay,

³³ taya na, kuse ma me pey 'ar na, ka təɓam slala hay ba daha, ka kadama meslərey ba ta dzerey, tek na ma tsəmatar kava na hay ka kam ba ma dey ta na, ma dzuwadəmatara mey ma mabar hay,

³⁴ ma mətsadama gədaŋ ma waw, ma ləham da mey ma sleɗ ma tsakay, ma ndzafam gədaŋ mekelehe a dəba ma dzedzey ta, ma ɓadama vaw ta bay gawla ley ahiya da vərom, ma ɓələmata ndaw ma vərom ma dala mekele hiya na hay ba.

³⁵ Ŋgwas hay daha ma ndzafəmata vagay ma ndaw a ta hay ma mbələmawa. Ama sa na hay na ma puwəmata, ka wuɗam ma buwam vaw ta tikay, a wuɗam ɗoh na ma da ndzefey ma mbəlawa na hayna;

³⁶ sa na hay satsa na, ma saŋgərafəmata, ma kəɗəmata ta laway, ma dzuwəmata, ma kuiyadəmata a daŋgay;

³⁷ ma kwaytsəmata ta ŋgwa vagay ahiya, ma sləmatara ɗay; ma slakəmatata ta sleɗ ma tsakay vagay ahiya, ma ndzaya na ma kalalaŋ ahiya, a pam ka vaw na mbal ma təɓaŋ, dakay na zana ma mbez ma ɗaw; ka səradama may ba, ma kəra hiya, ka kadəmata tatakway ba.

³⁸ Taya aŋga na bəla ma ɗatar ndaw kakay ana; a dzadzam da palah hay, da mamba hay, da bədom hay, da gwagudzoŋ wayaŋ hay.

³⁹ Taya tabiyaha, ka ndzafəmawa seydewe hayna na, kuse me me pey 'ar a ta, amana ka ndzafəmawa ma ndaslada tek ana ma tsəmawa kava na kakay.

⁴⁰ Hərway Bay ma Bəla a padandukurawa a fəna satsa na, a lakwa, akwa a da husey aha a me ndesley ŋga na mandzara lakwa kakay.