Ebrew 10 - MEY HAYNA WAYNA MA YEZU KRISTE MA MEVEY

Kuley na dey asləta ma tur dey ana

¹ Mewey a da ndzefey na zeheɗ ma tek ma da sawa ka mey ana hay, zləna ma tek ana hay dərka na kakay, a slafa me key tek kakay, kwa andza ta kuley ana hay ma kam re ŋga ha ka mevey ka mevey andza ha tekeɗe dzay na, me ndəvey ŋga na daha tikay ana na, a slafa ma kəsadata a me ndesley ndaw ana ma səmawa ma kam dzaya na hay kakay.

² Akwatay dakay na ka mbəkadama me key kuley ana ba, hərway ma mey na, ma bazləmama vaw ahiya ba dey asləta na, ndaw ŋga na hay ma kam kuley a da ndzam ’ar ata piokw, waya meŋgəsey ka vaw la kwa asləta dasakay.

³ Ama ta kuley ana hay na a vurəhwadama meŋgəsey ana hay ka mevey ka mevey.

⁴ Hərway ma mey na, mambaz ma malazok ta gusaŋ ma sla dada na, a slafa ma zəga meŋgəsey kakay.

⁵ Satsa na, andza Kriste ma sawa ka bəla na, me ləvey: gənaw ma təlam ana ta kuley ma kəmata me meŋgəsey ana hay na, kah ka wuɗey kakay. Amana, kah ma ləmiyawa vaw aha.

⁶ Kuley ma gənaw ana ma təladəmaka na ta kuley ana ma kadəmaka hərway ma meŋgəsey ana na, ka mbafəmaka kakay.

⁷ Arka i me ləvey: Yah ekəɗey, hərway a windəwa da ɗeriwel ma paɗa na na, ka yah. Ayaw Bay ma Bəla ɗaw, i sawa na ma da key tek a ɗek me wuɗey ana.

⁸ Dzadzak ŋga me ləvey ba ɗagay: Kuley hay, tek ma vələmaka na hay, kuley ma gənaw ma təladəmaka na hay, ma kam kuley hərway me meŋgəsey ana hay, kah ka wuɗey kakay, ka mbafəmaka kakay. Hayna səradakwa, na ŋga na hay na, tek me vəley na Mewey me tsey kava na.

⁹ Arka ŋga me ləvey tok: nəkafa i sawa na ma da kadaka tek a ɗek me wuɗey ana. Ŋga ma davasada me tsekesley ma kuley tsəfəmey ana ba, me pey na me tsetsew ana a veɗ ana.

¹⁰ I da tərakwama kokwoɗ ahiya na, hərway ŋga ma wuɗey andza ha, ma Yezu Kriste ma vəlada vaw ŋga andza tek ma kuley aha dey asləta tur dey.

¹¹ Dzadzak tok na, baba me key kuley waray waray ka pas ka pas ma lətsa ha, me key mber aŋga da 'Ay me key Kuley, re a key na kuley ana asləta, kuley aŋga na hay me key ana hay na, a slafa ma zəgata meŋgəsey hay tata kakay,

¹² dzadzak ŋga na, a dəba me key kuley ŋga dey asləta, kavəday a meŋgəsey hay na, me ndzey ma kozaha ta har zəmay ma Bay ma Bəla,

¹³ a hutey dzadzak na ndaw dugwan a ŋga hay, ka təram slam me pey sek aŋga ha.

¹⁴ Ta ma vəlada tek aŋga dey asləta ana, akwa a key na a kəsadata a me ndesley ma kozaha, ndaw na ma təradata kokwoɗ ahiya na.

¹⁵ Andza na ma Mesəfrey Kokwoɗ ana me key seydewe na satsa: hərway ɓa ŋga ka ləvey ba,

¹⁶ neney na ma dzəma vaw na la ma da dzəmam ta taya na, da har ana ŋga na na. Bay’ərlam ma ləvey: ta ma vəlaɓa mewey ɗaw hay na, i windadatara na a mevel a ta na, ta ma dzeley 'ar a ta na hay,

¹⁷ arka ka meŋgəsey ta na hay, ta malay ta na hay na, i da sərafata ha sakay.

¹⁸ Arka andza ka slam ana me sey yam daha na, me vəley tek ka meŋgəsey dasakay.

Me ndzey ta matanduroŋ

¹⁹ Malam a ɗaw hay, lakwa ekəɗey ka səradakwa dərka dərka na, slam har ma vəlaha tsoy me fuləkwey a slam ma kuley, ta mambaz ma Yezu.

²⁰ Da huɗa na, lakwa ka ndzafakwa tsəveɗ na hayna, ta dey ana ba, ma zlar me tserey ta petəle, ka ləva na slaw vaw ŋga na.

²¹ Lakwa ka ndzafakwa baba me key kuley la hayaha bəza kakay, na ma pa ha ba da 'ay ma Bay ma Bəla ana.

²² Gurakwama tok, ta mevel dender dender ana, da me pey 'ar me teɓerey kakay ana, mevel ma bazləma ha ba da meŋgəsey ma mendzey ’ar piokw ana, vaw ma pəra ha ba ta yam tsezler tsezler ana;

²³ mandzara lakwa ka makwa ta dəba na, ka da gəradakwa ma ɓada me pey dey a lakwa zlay, hərway ndaw ana ma ləvandakwar i da vəlakwar ana na, a mbəɗar sler a guma ŋga tikay.

²⁴ Nəkakwama dey ka vaw, ka 'ar vaw lakwa na hay, ma aza ka da həladandakwar vaw ka ma wuɗa vaw, ta me key tek hayna hay.

²⁵ Ka da mbəkadakwa ma daway a slam me tsəhey 'ar a lakwa hay, andza ma ndaw a sana hay ma kam ana zlay, amana səmakwama vaw ka 'ar vaw lakwa na hay, hərway ma mey na, ka nəkadama Pas ana a gurawa ha seŋgey.

²⁶ Haɗaw ka ŋgəsakwama ta har a dəba ma la ka ndzafakwa ma sərada dərka tsoy na, kuley ma tek ma zawa ma da key ka meŋgəsey ana hay na dasakay,

²⁷ ama sey me hutey na sariya me key zluwer ana, ta me təley ma waw ma da kakərata ndaw ma bəra na hay.

²⁸ Haɗaw ndaw ana a tsənar sləmay a mewey ma Moyiz kakay na, a da key aha da vaw a ndaw dakay, ka guma ma ndaw seydewe hay tsew makar na, ŋga na to to ba vagay aha.

²⁹ Akwa təɗe ma sadama banay kakay na teŋgey? Kendzey andza ndaw ana ma ndarsla Bəzey ma Bay ma Bəla ta sek, ma zləɓada mambaz ma ma dzəma vaw ana ma təradama kokwoɗ aha da huɗa na ba, arka satsa na ma kar tek me tsey mevel aha a Mesəfrey ma hahaya na na?

³⁰ Akwa na ka səradakwa seŋgey, ndaw ana andza ma ləvawa: Ma da madara gandaf aŋga na na yah ana, ma da kar ka sele na yah ana! Arka satsa na, Bay’ərlam a da kadara sariya ma səkway ŋga.

³¹ Me kəley a har ma Bay ma Bəla ta dey ana na, a key zluwer.

³² Ama hayna sərafama ka na kuray ma zləmərawa zla da bəziya ana: andza kuray ma ndzafəmawa waw me nəkey dey ba nekəɗey tsa na, kuray ma ɓəsam me kəɗey vaw ɗuhwa ha, me tsey aha,

³³ ka sləna na, a kadəmakwar tatakway ana na, ka slam dey ma ndaw hay tabiyaha, ta me tseɗey aha ka slam naŋgar satsa; kuray ma dzəma mey ahiya hərway ma ndaw ma sam banay andza ha na hay.

³⁴ Akwa na, kuray ka kam viya ba dzaya, andza ndaw da daŋgay ana hay, ma təɓadəmakwar zleley kwar hay ba na, a mbafakwar, hərway ka səradama zleley kwar hayna a fəna sa, me ndzey ana daha.

³⁵ Ka da mətadama 'ar ta tek a kwar ma səradama na zlay, hərway ka da ndzafadama masa ɗuhwa ha.

³⁶ Akwa tek a kwar ma wuɗam na, matanduroŋ ma da ndasladara tek ma Bay ma Bəla ma wuɗey ana, andza ha tok na, ma ndzafadama tek na ma tsawa kava na.

³⁷ Hərway a zarawa mendzey nekəɗey, da har nekəɗey na, Ndaw ma da sawa na a da key ŋga daha, a da ndzawa ha kakay.

³⁸ Ndaw a ɗaw dzerey ana na, ta me pey 'ar aŋga na a da səfrey, ama haɗaw ka zləgey ba na, a da mbafaya sakay.

³⁹ Lakwa na, lakwa ndaw ma zləgey ana hay tikay, ama lakwa ndaw me pey 'ar ahiya, ma da buwada mezek a lakwa hay.