Ebrew 1 - MEY HAYNA WAYNA MA YEZU KRISTE MA MEVEY

Bay ma Bəla a tsandukurawa guma na ta Bəzey ŋga

¹ Zlezle na, Bay ma Bəla ka tsatərawa guma ba a baba lakwa hay, dey haɗadzidzay ta ndaraw gəle gəle, ta huɗa mey ma ndaw sek hay, arka Bay ma Bəla,

² da har madakwaydok a neney lakwa kava neney na, ka tsandukurawa guma ba a lakwa neney da Bəzey ana daha, ŋga ma pada bəzey me zəmey zleley hay tabiyaha, ta har aŋga satsa na, ŋga ma kərawa bəla tabiyaha.

³ Bəzey ana hana na na, mewezley dey ma maram aŋga, ŋga na mey ’ərdey ma Bay’ərlam ana ɗerre, ŋga a zəgada bəla ta ma slafa ma guma ŋga. Andza ŋga ma ndaslada me bazləmey meŋgəsey ma ndaw hay ba na, ŋga me ndzey ta har zəmay ma Bay ma Bəla da Mekekəle hay.

⁴ A da tərey ɗuhwa ha tsaŋ ka madurlam hay, me ndzefey mezəley gəle ta na ma ta.

Bəzey ma Bay ma Bəla na a fənata madurlam hay

⁵ Akwa na ɗaɗa a ləvar pas asləta andza ha na a madurlam waray: Kah na Bəzey ɗaw, i ka yəkəwa ba na na? Arka satsa na: tasa na i da tərey baba ŋga ha, ŋga na a da tərey Bəzey ɗaw aha na na?

⁶ Dzadzak tok na, andza ŋga ma ɓada marakway ŋga ka bəla tok na, ŋga me ləvey: «Hayna madurlam ma Bay ma Bəla hay tabiyaha ka gərdam ka namar dəba.»

⁷ Ma madurlam hay na, guma ŋga na, ŋga ekəɗey: «Ŋga ma təradata madurlam aŋga hay Mesəfrey ahiya, ta gawla ma 'ay ŋga hay na, 'erneh ma waw aha.»

⁸ Ama ma Bəzey na neney: «Koriwal ma bay ɗek na, Bay ma Bəla, ma pa ha na, ma kwoza ha. Ka ka bay ma Slala ɗek na ta dzerey aha.

⁹ Ka da wuɗey na dzerey, meŋgəsey na ka wuɗey kakay. Hərwuiya tok na, Bay’ərlam! Bay ma Bəla eɗek ka fəɗafaka mal ma wuiya, ka wuɗaka ba, a fəna sa ma mandala ɗek hay.

¹⁰ Arka satsa na, Bay’ərlam zla da bəziya na, kah ma kərawa dala, arka ndasl ma 'ərlam na, mber ma har eɗek hay atsa.

¹¹ Taya na a zəɗam, ama kah na ka da ndzey, ayaw, andza ma zana na, tabiyaha tek hay a da kam maraw.

¹² Andza na ma kadama ta zana me memeɗ ana na, ka da paɗata andza ma zana na, ayaw a da mbəɗam. Ama kah na re andza ha, mevey ɗek hay na, a da ndəvam aha tikay.

¹³ Da walaŋ ma madurlam hay na, a ləvar na a na waray: Ndzey ta har zəmay ɗaw ana na, ta ndaw dugwan eɗek hay na, i da təradata na, slam me pey sek eɗek aha na na, a na waray?»

¹⁴ Taya tobiya ta hiya na mesəfrey ahiya, a kam mber, a sləradəmata ma ka da dzənəmata ndaw na, ma da buwəmata na hay.