Ɗeriwel a Tit 3 - MEY HAYNA WAYNA MA YEZU KRISTE MA MEVEY

Mewey na ndaw me pey 'ar hay a dafa ka kam ana

¹ Ləvatar a ndaw hay tabiyaha ka sərafama na, ka tsənəmatar sləmay a ndaw me key sariya hay, a ndaw ma ŋgumna hay, hayna ka tsənam sləmay, ka həladama vaw me key meslərey hayna,

² ka da tsaɗam ndaw zlay, ka da səpam dzendze zlay, ma ɓada vaw andza ndaw haya hiya, haya zarra ɓada vaw ɗek na ləfeɗeɗe ka ndaw hay tabiyaha.

³ Hərway, zlezle lakwa na tiyatsa na, la səradakwa 'ar kakay. I tsənakwama sləmay kakay, lakwa ma zləga hiya, beke ma tek me sey ahiya ta tek ma dey 'ar ana hay. Lakwa ma ndza hiya da suweɗ ta tek me sey haya kakay ana hay, i ŋgəlakwama dey ka ’ar vaw lakwa na hay kakay.

⁴ Ama andza kokwoɗ ma Bay ma Bəla me buwey lakwa, ta ma wuɗa vaw ŋga ma ɓawa vaw ba, hərway ma ndaw hay na,

⁵ a buwandukurawa na hərway ma mber a lakwa, na lakwa ma kukwama dzerey ahiya na kakay, amana, ka vəday ŋga na, ndaw a kar da vaw. A buwandukurawa na, ta me dzuhəɓey ma ma yawa wayna ma Mesəfrey Kokwoɗ ana me vəley ana.

⁶ Mesəfrey ana ŋga na na, ka batəkwadəmərawa ba haɗadzidzay ka lakwa, ta har ma Yezu Kriste me buwey lakwa,

⁷ ma aza lakwa ka da tərakwama dzerey ahiya ta hahaya ŋga, lakwa ka tərakwama andza me pey dey ana, ma da zəmey mendzey me ndəvey kakay ana.

⁸ Guma neney ana na, təɗe, kassla me pey 'ar kava, arka a saya na, kah ka dzəkafa sləmay kava haya hayaha, ma aza ndaw hay tabiyaha, na ma pəmawa 'ar ka Bay ma Bəla ana hayna, ka kəɗam vaw na, me key mber hayna hay haya hayaha. Neney na tek mambay ana, ma nafatar a ndaw hay ana.

⁹ Ama andza tek me səpey tedehe na hay na, me səpey baba tete hay, me tərey vaw, me kəɗey waway hərway ma Mewey na, katar tsakay, na ŋga na na, tek tedehe ahiya, a nafam kakay.

¹⁰ Ndaw ma sadərawa me tsey vaw ta guma na ŋga na hay na, wurzla ba, a dəba na andza kah ka tsar tsoy kava dey pal, dey tsew na;

¹¹ ka sərada ha ndaw andza na ŋga na na, ma zləga ha, ma ŋgəsa ha, ma dzuwa bay 'ar ma vaw ŋga na na, ŋga na.

Guma me tsey a 'ar ta me tsey guma a vaw

¹² Andza aza i ka slərəkaɓa Artemas ba, dakay Tisik na, kawa gədaŋ ma kah ka sawa ka ndzafaya da Nikopolis. Akwa i ma dzala a saya na, ma da ndzawa har ma memeɗ kusey na da huɗa.

¹³ Nəkafatərawa dey haya hayaha ka tek ma tsəveɗ mandza Zenas ndaw ma sərada mewey ana ta Apolos, tek ka da hətsatar zlay.

¹⁴ Hayna ndaw ma 'ay lakwa hay ka tatəkadama me key mber hayna hay haya hayaha tey, ma aza ka nefey da tek ma sawa dekeslef ana hay, kəɗey na, a da ndzam na, a nafam kadəba.

¹⁵ Ndaw a hay tabiyaha ka tsakay ɗaw ana ka tsadəməkuraɓa guma. Tsadatara guma a ndaw ma wuɗəmandakwar da me pey 'ar ana hay. Hayna hahaya ma Bay'ərlam ka ndzey ta kuray tabiyaha.