Ɗeriwel a Tit 2 - MEY HAYNA WAYNA MA YEZU KRISTE MA MEVEY

Maraw hay

¹ Na ŋgeɗek na, tatəkadatara a ndaw hay na, tek na ma dam ka vaw ta me tetəkey hayna.

² Hayna baba hay ka da wam ta zom zlay, ka kam ɗa ka vaw ta, ka səradama 'ar, ka kam ma rəha vaw ahiya ta me pey 'ar hayna, ta ma wuɗa vaw ta matanduroŋ.

³ Ŋgwas maraw ana hay andza ha satsa, ka kadama vaw ta na andza ndaw kokwoɗ ahiya, kwa me ŋgəley bəzay dakay, kwa ma vəladara vaw a zom kambəlaɓa dakay, ka tatəkadəmata ndaw hay me key tek hayna hay.

⁴ Kəɗey andza ha tok na, ka tatəkadəmata ŋgwas bəza na hay me wuɗey zel ata hay ta wawa ta hay.

⁵ Ka təram ka səradama 'ar, mandzara ka zləɓey, ka səradama ma zəgada veɗ 'ay ta, haya haya ha, ka tsənəmatar sləmay a zel ata hay, ma aza ka da tsaɗama guma ma Bay ma Bəla zlay.

Ma mbəlazaw hay

⁶ Həladəmatara bəzay a bəzey ma mbəlazaw ana hay tiyatsa, ma ka səradama 'ar da tek hay tabiyaha.

⁷ Da tek hay tabiya ha na, haya ɓada vaw ɗek ana na, tek me tsey dey kava ha da mber hayna hay: me tetəkey tsəzlakka na, ɗa ndaw aha,

⁸ guma dzerey ana ndaw ma slafa ma zlar ma tsafa kakay. Ma aza kwa ndaw dugwan ka da slafa me ndzefey, ma tsafandakwar guma haykakay aha zlay na, aza hwaray ka kar.

Beke hay

⁹ Hayna beke hay ka tsənəmatar sləmay a bay ta hay, da tek hay tabiyaha, ka kəmatar na tek na ma mbafata na hay, mandzara ka madəmatara guma ka sler,

¹⁰ mandzara ka mbəkom tek. Hayna ka pas ka pas na, ka kadama vaw ta, ndaw me tsəney sləmay ahiya dərka na, kəɗey andza ha tok na, a da hasəkadəmara bəzay a mezəley ma Bay ma Bəla, me buwey lakwa.

Səkway na ma vəla ha ma ŋga na

¹¹ Hərway ma mey na, hahaya ma Bay ma Bəla na ka ɓawa vaw ba, 'ar yam ma me buwey ndaw hay tabiyaha.

¹² A tatəkadandakwar ma mbəɗar dəba a meŋgəsey ta tek me sey ma bəla neney, ma lakwa ka da ndzakwama da bəla neney ana, da me wey daw ka vaw, da dzerey, da ma ɗamara ’ar.

¹³ Ma da hutada wuiya ma me pey dey lakwa, ta ma da ɓada maram ma Bay ma Bəla a lakwa ɗuhwa na, ta me buwey lakwa Yezu Kriste.

¹⁴ Ŋga na ta 'ar aŋga na, ma vəlada vaw hərway lakwa, ma aza ma da mbəɗandukurawa da meŋgəsey hay tabiyaha, ma ka da bəzləma səkway ana ma vəla ha ma ŋga na, na ma həla vaw aha ma da key mber mambay ana hay.

¹⁵ Haya aza tsa guma na andza neney, ma həladatara bəzay a ndaw hay, ta ma katar say ta mazlaɗ aha haya hayaha. Kwa ndaw ka da rəsaka zlay.